يراني أجمل من كل النساء الذين خانني معهم

السلام عليكم. أنا مشكلتي مع زوجي. إلنا ١٠ سنين متزوجين. اتزوجنا بال ٢٠٠٧ و من أول ليله كان في صعوبه انه يقرب مني. حبني بال ٢٠٠٣ من بعيد كتير. قليلا ما كنا نلتقي. كانت ٩٩٪‏ من العلاقه على الموبايل لأنه كل واحد كان ببلد مختلفه. ضل ٣ سنين يترجى أهلي يقبلو فيه و انا كمان كنت رافضه كل العرسان عشان حبيته. بس من ليلة العرس انصدمت! حسيته غير منجبذلي مع انه الكل والله لحد الآن يقولولنه زوجتك جميله جدا و تعليم عالي الحمدالله و من عاءله محترمه جدا. المهم صار كمان فجأه يحتقرني و يقولي اني مش perfect و انه كان يفضل وحده سمراء و أطول و عيونها صغار و غيره و كل شيء عكسي. المهم كان ينحرق قلبي و خايفه أحكي لأهلي عشان لا يحكولي اتحملي نتيجة اختيارك. و كانت امي تسألني من أول شهر ليش بعدك ما حملتي؟ و أنا خايفه أقولها زوجي بنفر مني و ع طول ببهدلني على أي شي سخيف مع انه كان بشوفني يوم الجمعه فقط لإنه كل واحد فينا كان ساكن بإماره مختلفه. بعد ٥ او ٦ شهور زواج اكتشفت انه مدمن علاقات و جنس على الانترنت. زعلت و كلمت أهله. أمه قالتلي ما أخبر حد و لا حتى أهلي و قالت هيه بتكلمه. اعتذر كتير و صار في علاقه كل يوم ل مدة شهر و طبعا اكتشفت اني حامل. بعدين حكيت اكيد بصير أب بتغير و ببطل النزوات. المهم بعد اللي صار ترك شغله و اجا سكن عندي بس كل واحد ب غرفه. و أنا كنت أصرف علينا و كنت زعلانه انه ما بنام جنبي و بدعي الله يهديه. بس طبعا شوي شوي رجع ل طباعه القديمه و الإهانات و ما يقرب علي. حتى لما حملت بعد سنتين ب ابني الثاني حمدت الله مليون مره اني حملت مع انه ما كان يقرب مني إلا مره كل كم شهر و بعد ما أتخانق معاه! اتعبت كتير من الوضع خاصه بعد سنين رجع اشتغل و صار ما ييجي لبيت لا يشوفني و لا أولاده. مع انه رجع وزني و جسمي زي ما كنت و أنا عروس و كتير بهتم ب حالي و طبخي و بيتي مع اني بشتغل. كنت حاسه اني متزوجه على الورق و كل اللي حولي و شايفين حزني كانو يقولولي اطلبي الطلاق ١٠٠ غيره بتمنوكي. المهم بعد سبع سنين و نص من العذاب و الحرمان من كل الحقوق الجوزيه و الماديه و كل شي و اتحملت صراخ و شتايم و اهانات... اكتشفت انه بعده مداوم على العلاقات انترنت الجنسيه و كمان صارت العلاقات متطوره شخصي. طبعا خلص رحت المحكمه و طلبت الطلاق و بصعوبه حصل و كنت حاسه ضغط انشال من فوق صدري. بعدين للأسف خبر أهلي و صار يترجاهم يرجعوني إله و مع إنه قليل اللي عرفو ب خبر طلاقي لكن بهذه الفتره القصيره تقدم لي للزواج ٥ رجال و ساعد ذلك طبعا ب تحسين معناوياتي و نفسيتي المدمره من سنين. لكن للأسف من كتر الضغط منه و من الأهل بعد ٦ شهور فقط عقدنا قرار جديد و حطيت شروط جديده. صار على هذا الموضوع سنتين. بس مش قادره أنسى الصور اللي شفتها و اللي عمله مع نسوان واطيه. و كيف كان حارمني حقوقي الجنسيه و الكلمه الحلوه و كل شيء عشان يعطيهم ل نسوان تانيين. جبت منه بنت من شهرين. كنت حابه انه مشاعري تتغير. بس للأسف ع طول بلاقي حالي بحلم بالطلاق. علما اني انا الحمدالله مش محتاجيته ماديا. انا من زمان بشتغل و معتمده ع نفسي بفضل ربي. بحس انه ضيع عمري و طول فترة العشرينات من عمري. و بقول انه بموت فيني و اني أحلى من كل البنات اللي خاني معهم بس مش عارف ليش كان يخوني. بقولي انه كان يقدر و انا ما إلي أهل بالبلد اللي ساكنين فيها ف عارف اني ما بقدله. انصدم لما رفعت قضية طلاق بالمحكمه لأنه ما اعتقد ابدا اني ممكن اتركه. هوه اتغير كتير بس قلبي مش قادر يتقبله و دايما عايشه ب خوف انه يرجع يجرحني و الله والله قلبي ما بتحمل. اتعبت والله اتعبت!!!