يخونني ويطلب أن لا أحزن وأغضب

بالله عليكم حد يرشدنى ويقولى انا صح والا غلط باختصار شديد انا بحب جوزى جدا ومخلصة له لابعد الحدود اعشق تراب رجليه هو حب منذ الطفولة مقدرش استغنى عنه ابدا وفيه صفات حلوة كتير لكن للاسف بيكلم ستات على الفيس واكتر من مرة وانا اكتشف اعاتب وكل مرة تحصل خناقة ومشاكل بينى وبينه ويعمل حظر ليا ويلغى صداقتى لمجرد انى باعتبه دايما يكدب عليا ويقولى مش باكلم حد خالص لدرجة انى اتوصلت مع واحدة من صديقاته واللى لقيتها بالصدفة ودا طبعا لانه عامل اخفاء لاصدقاء الفيس وبالفعل عرفت منها انه بيكلمها وفى ادق تفاصيل حياتنا حاجات محدش يعرفها الا انا وهو وصل به الامر فى مرة من المرات انه يتواصل مع واحدة من صحباتى وهى صارحتنى وكانت صدمة لما ورتنى الشات وكالعادة حتى كلمة اسف ما بيقولهاش ومش عايزنى ازعل ولا اغير ولا يكون ليا اى مشاعر طب دى تبقي عيشه ازاى ما اعشمش فى حنيه من جوزى ولا انى احس بقيمتى مرة واحدة ..كل مشكلة تحصل يعمل لى حظر وبعدها بكام يوم عايز يرجع يتكلم من غير عتاب ..طب ازاى حد يفهمنى ويا ريته بيتوب مبيتوبش ..المشكله انى بعد ما كنت باشتاق له وحبه مالى عليا حياتى دلوقتى انا حاسة بفتور جامد ومش قادرة اوقفه دا بيزيد لدرجة انى عرضت عليه اننا نكون زوجين على الورق وقدام الناس بس عشان العيال ولو عايز يجوز عادى يجوز ..مشكلتى انى مقتنعة بالكلام دا جدا وزعلانه قوى انى قدرت ابعد كدة .هو عنيد جدا وحتى السؤال ما بيسالش يا جماعة افيدونى بالله عليكم ادونى نصيحة انا مشتته ومش عارفة اعمل ايه كل الحورات دى محدش يعرف عنها شئ ولا عمرى باحكى لانى باخاف على شكله قدام الناس ايا كان اللى باحكى له ..انا ساعات افضفض معاه وابعت له عشان يعرف انى مضايقة لكنه حتى ما بيفتحش الرسايل مع انه بيبقى اون على طول ..الدنيا اسودت فى عينى وانا معايا طفلين وبقالى متجوزة ١٥سنة والله عمرى ما قصرت معاه دا انا وصل بيا الحال لدرجة انى بقيت اطلب منه الاهتمام واشحت منه الحب واقوله نفسي تقولى بحبك نفسي تشوف ايه اللى بيزعلنى ومتعملوش وتراضينى وتجبر بخاطرى مرة وخاصة انى وقفت جنبه كتير اديته كل حنان وحب وساعدته لغاية ما وقف على رجليه فى حين ان حتى اهله اتخلوا عنه ..حد يفيدنى يا جماعة بالله عليكم انا باتحطم اعمل ايه وهل انا صح والا غلط ..اسفة للاطالة لكن والله اختصرت ..لان اللى انا فيه متحملوش الجبال