خائفة أن أدخل بدوامة ديون أبي الظالم

السلام عليكم ورحمة الله وبركاتهحبيت اطرح مشكلتي لعل وعسى الاقي من يرشدني ويريح بالي.. انا طالبة جامعية امي وابوي منفصلين وانا عايشة مع والدتي الله يحفظها ويطول لي بعمرها.. مشكلتي تتعلق في ابوي .. مع الاسف ابوي انسان غير مبالي ما يتحمل المسؤولية وانسان غير مستقر لا على حياة ولا على وظيفة.. من كنت بنت صغيرة كان ما يهتم فيني وما يداريني لي درجة ان كنت امرض ما يوديني المستشفى حتى احتياجاتي ما كان يشتريها.. امي الله يخليها اهي اللي اشتغلت وصرفت علي وعلى البيت على الرغم من وجود ابوي.. مرت السنوات ومع كثرة المشاكل بين امي وابوي حصل الطلاق بينهم.. انا وامي في البداية سكنا في شقتنا الاجار بعدها انتقلنا لبيت جدي وبعد وفاة جدي امي شرت بيت وانتقلنا انا واهي وجدتي سكنا فيه.. وامي وجدتي ما قصرو وفرو لي كل شي ما خلوني احتاج حد.. بس طبعاً في شي كان دائماً ناقص اللي اهوه مكان ابوي كنت دايماً اشتاق له واتمنى لو يرجع.. ابوي بعد ما تركنا وتزوج مرة غير امي نساني و عمره ما سأل عني وله كلمني قطعني ثمان سنوات.. ليما في يوم من الايام امي راحت سفرة عمل وأحد اقاربنا اللي كان على تواصل بابوي استغل الوضع وخله زوجته تكلم جدتي ان هم بياخذوني عشان اغير جو مع عيالهم وانا تحمست وجدتي وافقت عشان وناستي ولان ذيج الفترة امي كانت مسافرة فكنت طول الوقت في البيت.. المهم مر قريبي مع زوجته وخذوني معاهم وقالو لي احنا ما بنوديج حق العيال لا بنوديج حق شخص تحبينه واهوه مشتاقلج.. انا وقتها كان عمري 13 سنة وكنت افهم فاستغربت من كلامهم وبديت اخاف لي حد ما وصلنا بيت كان في منطقة قديمة وكلها اجانب والمنزل كانت حالته سيئة جداً انا هني خفت وايد وكلمتهم ان رجعوني البيت قالو لي لا ماله داعي تخافين هذا بيت ابوج خلينا ندخل وانا ما صدقتهم وقلت لهم مو مصدقتكم رجعوني البيت قالي قريبي نطري الحين بتصله عشان اهوه يطلع لنا وفعلاً اتصل وطلع الرجال وكان فعلاً ابوي حزتها ما قدرت امسك نفسي وبديت ابكي لان كنت مشاتقتله ومحتاجته في حياتي وفرحت جداً من اللي صار.. ومن يومها تغير الوضع وصرت اواصل ابوي واهوه كان يواصلي ويعطيني مصروف جداً بسيط ومرة خذ قرض من البنك وسافرنا رحنا الكويت ثلاثة ايام ورجعنا.. طبعاً هاي كانت فترة بسيطة.. وبعدها ابوي رجع ما يصرف علي وكنا بس نتواصل وازوره كل فتره .. ومرت السنوات ودخلت الجامعة وابوي بدأ يتغير ويلمح حق شي.. في يوم كنت طالعة معاه رايحين نزور جدتي اللي هي امه وابوي في الطريق طلع ورقه وعطاني اياها قالي اقريها.. انا فتحتها وكان فيها اسامي ناس وبنوك وارقام كبيرجداً مجموعها يتعدى الخمسين الف بكثير.. سالته عن الورقة قالي هاي الورقة كل الديون المتراكمة ابيج يا بابا اذا مت وما سددتهم تحاولين تسددين اللي تقدرين عليه.. انا قلت ان شاء الله اذا ربي رزقني ما راح اقصر.. وقبل فترة ابوي فنش من شغله وقعد في البيت وياه وكلمني قالي ابيج تشتغلين انا من غير لا اسألة عن السبب قلت له ما اقدر هالفترة عندي جامعة وراح انضغط وتم دائماً يفتح معاي الموضوع.. ليما عقب فترة غير الفكرة وقال اذا تخرجتي يا بابا ابيج تاخذين قرض نسدد الديون اللي علي ونخلص من القضايا المرفوعة انا قلت له ان شاء الله لكن من داخل حسيت ان ابوي يبي يستغلني.. ابوي ماخذ مبالغ جداً كبيرة انا راح يضيع عمري كله وانا اسددها هاي اول شي ..وثاني شي امي اولى يعني امي دخلت الاربعين ومريضة فيها الضغط والسكر وتحتاج تسوي عملة حق ظهرها والعملية تكلف وانا كنت مفكره ان اذا اشتغلت ان شاء الله اخليها تتقاعد وانا اشيل البيت وبعد اشترك في جمعيات عشان اجمع فلوس علاجها .. اهيا كل فلوسها وعمرها وحياتها ضيعتهم واهيا تربيني وعمرها ما قصرت علي اما ابوي ما سوه شي غير ان صرف علي فترة معينة وبعدها قطع عني المصروف وبعد خذ دين الف دينار سفرني فيهم الكويت ولو اجمع الفلوس اللي صرفها علي كلها ما تتجاوز الالفين او الثلاث.. وبعد مرة طلبت منه فلوس عشان اشتري كتب حق الجامعة وكانت المرة الوحيدة اللي اطلب منه وما عطاني.. اهوه وضعه يكسر خاطري ومتعاطفة معاه بس خايفة مابي ادخل نفسي في دوامة الديون انا ما ارفض فكرة اني اساعده في المصرف واعطيه مبلغ يكون على قد استطاعتي.. شورو علي هل اللي افكر فيه صح.. وان كان غلط شلون اتصرفومسامحة طولت عليكم وعذروني اذا اسلوبي كان غير واضح وضعيف