بعد ظهور النتيجة انهدمت كل طموحاتي

السلام عليكم جميعا أولا أنا معجبة بصفحة حلوها جدا نظرا لخصوصيتها الشديدة وعرضها لآراء المختصين بشفافية وحيادية ربنا يجازى حضراتكم خير يا رب .بإختصار شديد أنا طالبة جامعية فى المرحلة الاولى لسه فى كلية من كليات القمة وهنا المشكلة انها مش الكلية اللى كنت بطمح بيها أنا أو أى حد من الطلاب . فى الحقيقة مشكلتى ابتدت من ظهور نتيجتى واللى كانت صادمة لكل اللى حواليا خصوصا اساتذتى وده اللى لغاية دلوقت مش قادرة اتخطاه .أنا من نوع الطلبة اللى بيذاكروا بس بمجهود قليل خالص والحمد لله على كده. لدرجة إنى لما حد كان يسألنى من زمايلى واستاذتى وأقول كده كانوا يكدبونى وبصراحة ده مكانش فارق معايا كتير لأنى مش بحب أبرر نفسى لحد . بعد ظهور نتيجة التنسيق اتصدمت وأتهدمت كل طموحاتى لأنها حطمت كل طموحات أهلى وكان نصيبى فيها ميتعداش اخر كلية فى تنسيق المرحلة الاولى . يومها بجد أحبطت ولأول مرة فى حياتى أبكى على اختيار الله نصحونى أساتذتى بالسعى وراء إعادة تعديل نتيجة الثانوية العامة. وكانوا على ثقة أنها أقل من حقى ويشاء الله انه والدى ميوافقش قطعا على الرأى ده ومنعنى. فى وقتها صدقا مكنتش عندى القوة بجد إنى اجرى وراء الحق وأحاول اقنع والدى محاولتش ولو مرة واحدة لأنى كنت محبطة جدا .لكن امى كانت عايزة ترضى ربنا وتسعى معايا لأخر لحظة فى اى طريق عشان تحس أنها بذلت كل السبل معايا ومسابتنيش لحظة .سافرت معايا لأنى من العاصة ولفت معايا فى كل الاماكن الحكومية المختصة لغاية ما وصلت لاوراق امتحاناتى واللى صدمتنى للمرة التانية وفعلا طلع اساتذتى على حق .ربنا اراد ومجاليش غير جزء من حقى واللى غير مسار حياتى 180 درجة .بس برضه وقتها مفرحتش بمجموعى مفرحتش بكليتى . حسيت أنه طالما أمنيتى راحت يبقى كل جاجة حلوة راحت معاها حياتى وسعادتى وقوتى وكل حاجة . وكنت عايز انوه على أنى فى خلال كل اللى مريت بيه بجد كنت جبل من بره ببتسم بس عمرى ما ضحت من قلبى من ساعته لغاية ما نسيت الناس بتضحك ازاى .حاولت ابان للكل إنى لسه قوية ومفيش حاجة تهدنى أو تأثر فيا زى ما أتعودوا عليا دايما وكمان عشان والدتى متتأثرش باللى أنا فيه لأنى حسيت أنى شيلتها فوق طاقاتها .ومحكتش لأى حد عن النار اللى جوايا لأنه دا طبعى ومكنتش حتى فى وقت الضعف الكبير اللى كنت فيه وقتها وما زلت أنه اخلى حد يشوفنى ضعيفة لانه ساعتها صورة البنت القوية صاحبة قرارها والمستقلة فى حياتها تتهز فى نظرهم . دخلت الكلية وأنا مش مقتنعة بيها وكرهاها بس وقتها فاض بى الكيل وعرفت والدتى بكده وانا عارفة مفيش حاجة بأيدها تعملهالى بس كنت عايزة أعبر عن اللى جوايا حسيت إنى كنت هموت لو محكتش لحد على اللى أنا فيه لأنى كنت وصلت لمرحلة صعبة . ببكى فى المحاضرات من غير ما حد ياخد باله وكنت لما احاول اركز فى المحاضرات لأنه كان هيفوتنى كتير وقتها وخلاص اللى حصل حصل. كان النوم يغلبنى للحظات قليلة بس كان بيبقى النوم عميق ولما أحاول افتح عنيا وأجبر نفسى إنى اصحى وأركز كانت عنيا تخونى ومعرفش أنا كنت بعمل كده أزاى بجد حتى النوم العادى كنت بنام نوم مش طبيعى وأنا عارفة إنى بعمل كده عشان اهرب من مذاكرة المواد اللى محبتهاش وكمان كان اتصالى دائم بأمى كل نص ساعة تقريبا ببكى ومبكلمهاش وهى تبكى لما تسمعنى . فى الوقت ده حاولت اتعرف على بنات دفعتى بس بطريقة كانت تستفزنى انا شخصيا كأنى بفرض نفسى عليهم بشخصية ضعيفة وكنت بقول دى مش أنا أيه ده أنا من أمتى بحتاج حد ليه بتصرف كده كل الحاجات اللى كنت بقول عليها ضعف وغباء بقيت بعملها من غير ما احس أخدت قرار أنى ابعد نفسى عن اى موقف يبينى غبية وضعيفة بس كان الأوان فات وأخدوا الإنطباع ده عليا . بقى عندى بلاهة وغباء اجتماعى . فى الوقت ده كان بيوصلنى إشادة أساتذتى ليا وذكرهم لسيرتى فى كل جلساتهم مع بعض . ما اكدبش عليكم كنت بفرح اوى بس بعدها بزعل أوى اوى لأنى خذلتهم ومحققتش اللى بيرسموهولى ويا سلام بئا لما بيجيبوا سيرتى للدفعة اللى بعدى ويقولهم على صدمتهم بمجموعى ويقلولهم إنى كنت على مستوى من الذكاء الدراسى وحصل معايا كده.متخيلين انهم بقوا ينصحوا بيا الناس . متخيلين واحدة زى ما بيقوولو هم بمستوى عالى من الذكاء تبقى غبية للدرجة دى ومحدش يعرف .انا مستواى الدراسى ما زال فى النازل ونتيجة الكلية ظهرت من يومين ورسبت فى مواد .أنا بجد انتهيت أنا عارفة إنى طولت على حضراتكم فى عرض حاجة تافهة بالنسبة للبعض بس بجد انتم مش متخيلين التافهات دى مأثرة عليا ازاى . بس أنا كنت بفضفض معاكم لأنى خلاص حاسة حمل الجبال فوق كتافى . عايزة اقول لحضراتكم ملاحظة اخيرة أنا دلوقت لما ببص على المراية مش بعرف نفسى بجد .