ما سبب نفوري المفاجئ تجاه الجميع

السلام عليكم... انا فيني صفة من وأنا صغيرة وهي النفور المفاجئ.. مثلاً وانا طفلة اللعب مع بنات فجأة وخدة تتكلم عن يء انا اتقرف منه او مثلاً يعني مابتستحم مهي نظيفة انفر منها لا شعورياً وكنت كثير اتألم.. وبعد ماكبرت خفت كثير هذه واتزوجت لين سارت شبه معدومة.. وانا كنت البنت الوحيدة بين اخواني الذكور ماعندي اخوات.. بعد ماتزوجت سرت اكلم مثلا صحباتي اقولها ياقلبي وحبيبتي... الخ يعني كلام طبيعي.. وهذي الفترة انفصلت من زوجي.. ورجعت عندي مشاعر النفور.. يعني وحدة اتكلم معاها طبيعي صحيح احس تبغا تعرف أمور كثيرة عني بس بحسن نية يعني هي كذا طبعها مع محيطها والبنت طيبة وبعد ماانفصلت من زوجي سار عندي شعور اللي ماابغا اتكلم مع احد غير أهلي المقربين وهذي البنت ترسلي وحشتيني وابغا اسمع صوتك وع طول بترسلي كذا.. هي ترسلها من محبتها لي وهي من اقاربي.. بس انا احس بنفور سرت مااحب كلام الحب مثلا زي لمن تقولي ليه ماتردي علي انا موقادرة انام وابغا اسمع صوتك وووو... هي كل ماتقول كذا يزيد النفور منها بزيادة... يعني بيجيني شعور النفور لمن اسمع عن وحدة تتكلم عن امور غصباً عني اشمئز "من ناخية النظافة الشخصية" بس هذا الشعور يعني اقاومة من هذي الناحية.. لكن من ناحية اني اسمع كلام في حب وانا اشوفه مبالغ انفر.. يعني انا فيني طبع حركات ادلع بين البنات الزايد عن حده او زي الشذوذ بين البنات اتقرف وانفر.. حتى وحده من قريباتي كانت لمن تسلم تحضني وتتلص مرة بعدين كلمتها بمزح ان انا مااحب احد كذا يحضني.. يعني انا مااتقبل الا من اهلي اللي جداً مقربين.. انا اخاف النفور هذا يزيد عندي واخسر الناس.. وابغا اعرف قريبتي هذي اللي تقولي وحشتها وبتسمع صوتي كيف اتصرف معاها خاصة في أمور هي زودتها من ناحية اتصالها مرة تطول ممكن في اليوم ٣ساعات وعندي طفلة ََوطفلتي بتتأثر لمن هذي تتصل لأنها بجد تشغلني لكن في البداية لمن تتصل كنت اكلمها عادي والبنت شافت ان عادي عندي انها تطول واتعودت وبتسألني كثيييير يعني لو خارجة فين خارجة.. هي تسألني يعني زيادة ميانة حتى مع قريباتي تتصرف معاهم نفس الشيء بس انا مااحب احد يتدخل في أموري كذا وفي نفس الوقت انا مااحب اجرح احد يعني بالمختصر حابة علاقتي مع هذي البنت محدودة بس مااعرف كيف وانا اصلا مو متحملة ابغا اتفرغ لنفسي ولطفلتي ابغا اهدأ من دوشة الناس وافكر كيف اربي بنتي واشوف اموري.. والله انفصالي من زوجي ماسرت اقدر اجامل واتحامل ع نفسي.. انا احب جدا الخصوصية ومفكرة اطلع رقم ثاني واريح راسي.. وانا الفترة اللي كنت اتواصل معاها كنت بصراحة انبسط من كلامها وانا دحين ماابغا اكون انسانة مصلحية وبنفس الوقت انا ابغا ابعد شوي عشان ارتب نفسي والدمار اللي في داخلي واقوي نفسي..