الخجل مسيطر على حياتي

انا مراهقة 16 سنة معنديش اصحاب او بمعنى اصح معنديش حد اثق فيه احكيله اسرارى اقوله انى مضايقة وده لانى مش بثق فى حد شايفة انى او حكيت لحد اى حاجة عنى هخليه يمسك سلاح ضدى يذلنى بيه لو حصلت اى خناقة بينا ....يمكن يكون فى بنات بيحكولى اسرارهم بس انا بحس ان الكل بيحب يحكى مش بيحب يسمع بحس انى لو حكيت لحد مشاكلى هكون كدة بزعجه ....خايفة لما اتجوز اتجوز جوازة تقليدية عشان عندنا الواحد بيتقدم للواحدة على حسب شكلها وسمعتها واحترامها وسمعة والدها بس مبيكونش عارف اى حاجة عن شخصيتها وانا مش عارفة هوصله ازاى كل حاجة انا بحس بيها وكل مشاكلى حاسة انى بكدة هكون بزعجه ولو مقولتلوش هكون ببنى حياة وانا مخبية عليه وكدة مش هكون مرتاحة وخصوصا كمان انى خجولة لدرجة انى بتكسف امشى فى الشارع لوحدى لانى مبحبش نظرات الشباب والبنات ليا وحتى لما بمشى مع حد بكون مكسوفة من نظرات الناس ليا لانى ساكنة فى منطقة شعبية مع انى مبكونش لابسة حاجة غلط والحمدلله شكلى مش وحش ....بستغرب اوى لما اشوف حد فى التليفزيون رايح مطعم وبياكل لوحده ....الخجل ده مسيطر على حياتى بطريقة فظيعة ومش عارفة اتخلص منه.... هو انا بكون غلطانة لانى مش عايزة ازعج حد بمشاكلى ؟؟؟...بس انا حاسة انى بظلم نفسى انى بكتم جوايا كل الحاجات اللى بتضايقنى.....فجأة بحس انى مخنوقة وكارهة نفسى وكارهة حياتى وبفضل اعيط وبكون نفسى اصرخ وابطل كل ده ...مش عارفة هكمل حياتى كدة ازاى ...الخجل ده كمان سبب فى فشلى فى دراستى انى بتكسف اسأل لما بكون مش فاهمة ....مش عارفة امتى هلاقى الشخص اللى هقدر احكيله كل حاجة واكون صريحة معاه لانى عمرى ماكنت صريحة مع اى حد ...بس انا نفسى فى شخص يفهمنى الاول انا لغاية دلوقتى مش لاقية اى حد يفهمنى صح مش عارفة انا اللى شخصيتى معقدة ولا انا ظالمة نفسى ولا انا بضحك ع الناس انى مبينة انى قوية ومبسوطة ...حتى ع الفيس عاملة اكونت باسم مستعار بس الناس اللى بتكلم معاهم مش قادرة اكون صريحة معاهم ...مش قادرة اعيش كدة ...مش عارفة هى دى فترة وهتعدى ولا انا هفضل كدة على طول.....