أفكر بم حصل لي كي أتعلم من أخطائي

السلام عليكم...انا امراة عندى ٢٥ سنة ،موظفة ،مطلقة ، مشكلتى انى طيبة جدا وضعيفة الشخصية والناس كلها بتضحك عليا وبتستغلنى ،كل ما حد يتعرف عليا يستغلنى ،فى الشغل الناس بتيجى عليا عشان مش بعرف اخذ حقى وبسكت عشان اتجنب المشاكل ، حتى زوجى كان بيستغلنى بس انا مكنتش عارفة ولا فاهماه ،كنت بحبه جدا للاسف فمكنتش عارفة اشوف عيوبه ،كان متجوزنى علشان يستغل مرتبى وكنت بعطيه المرتب ، و كان بيعمل فيا حاجات كتير ويقولى متقوليش لحد علشان دى اسرار بيننا وكنت بصدقه ومش بقول ، لحد مع الوقت عرفت ان حياته كلها معايا محدش يرضى بيها وكان بيقولى متقوليش علشان لو حكيت لاى حد مثلا ماما كانت هتنصحنى وتعرفنى انى مقبلش انه يعاملنى بالاسلوب ده ،مثلا كان بيضربنى ويصالحنى وبسكت مش بقول بس كان بيكررها تانى وتالت وكان بياخذ مرتبى بالاقناع فيا ان ده الصح وكنت بعطيه المرتب ، كان مش بيقعد معايا فى البيت الا وقت الاكل يتغدا وينزل يقعد عند مامته لحد بالليل ويجى يتعشى وينام والكلام ده كل يوم من ساعة ما اتجوزنا وكنت بتكلم معاه واقوله ان مفيش اى حوار بيننا واننا بنيجى من الشغل بيبقى واحشنى عايزة اقعد معاه بس بيقنعنى انه بيزهق من قاعدة البيت ووبيحب ينزل بس انا مش عارفة يزهق ليه هو مكنش بيلحق يقعد فيه عشان يزهق والكلام ده واحناعرسان جدد . مع انى كنت بهتم بنفسى وبيتى وبيه ومش مقصرة فى البيت خالص ، كل ده غير عدم تحمله المسئولية وكذبه عليا وتكذيبه ليا وانتقادات المستمرة ليا وكلامه فى التليفون مع الستات وكان بردو بيقنعنى عادى الزوجة حاجة والصديقة حاجة كل ده وكنت بسكت ،وكل ده كان فى ٣شهور جواز بس . هل كل اللى حكيته كل الازواج بيعملوه مع زوجاتهم عادى ؟؟ المهم انا اهلى بعد مشاكل كبيرة عملها وضربه الوحشى ليا اتدخلوا وطلقونى منه . انا بس بفكر فى كل اللى حصل ده علشان اتعلم من اخطائى وافهم ايه اللى ممكن يتسكت عليه وايه اللى ميتسكتش عليه عشان مقعش مرة تانية .ارجو النصيحة .