موضوع الأبراج والفلك بدأ يؤذي علاقاتي مع الناس

اسمي لمى وعمري 29 سنة، مش متزوجة، متخرجة من الجامعة، دارسة تسويق وبشتغل في شركة، وشغلي منيح والحمد لله. بتابع علم الفلك من وقت ما كنت في المدرسة وعندي عشق لهاد العالم لدرجة انه بعرف كل شي عن كل الكواكب والابراج وبعرف صفات الرجل والمرأة والطفل من كل برج، وبقدر احسب مدى توافق الازواج من تواريخ ميلادهم، طبعا مو بس عالابراج الغربية، كمان عالابراج الصينية. بقرأ توقعات الابراج اليومية والاسبوعية والشهرية والسنوية، بتابع كل الفلكيين والتوقعات السياسية للعالم وبشتري كتب التوقعات والابراج والفلك. بقدر احكي عن حالي اني محترفة في هاد العالم لدرجة اني صرت احلل شخصيات الناس اللي بتعامل معهم حسب تاريخ ميلادهم، وفعلا بزبط معي التحليل وبقدر اعرف صفات الناس، وحتى بتوقع للناس حظهم خلال السنة الجديدة وقصص زي هيك. مشكلتي اني حاسة انه الهوس هاد بدا يأثر على علاقاتي مع صديقاتي والناس، أولها كانوا يشوفوا الموضوع مسلي، بس بعدين صاروا يخافوا اني اكون كاشفة عنهم اكتر من ما بدهم يخبروني، او اني احكي عنهم لغيرهم صفات همه مو حابين يحكوها، يعني بعرف إنكم حتشوفوا الموضوع أهبل شوي، لكن فعلاً بديت أحس انه عم بيأثر على علاقاتي، وإنه الناس عم بتخاف مني، رغم انه كل شي بحكيه هو بناء على علم ودراسة وتحليل. كانوا قبل الناس يسألوني ويتسلوا كتير في قعدتي بس هلا ما بعرف شو صار، في كتير عم بتجنبوني رغم اني ما بحكي من وراهم، بحكي الاشياء بس قدامهم. صار الموضوع يزعجني. شو رأيكم؟