هذا القلق النفسي سببه؟

السلام عليكم، انا اكتب مشكلتي بعد ما طفشت فعلاً منها! انا انسانه ابغا اعرف من ايش اعاني بصراحه لأني طفشت من زمان وأنا ابغا حل لمشكلتي، بحاول اختصر مشكلتي مع انها أعمق بكثير من اللي بشرحه.. أنا دايماً اقلق.. دايماً لما اكلم صديقتي وما ردت علي أخاف انها "تغيب" يعني ما تجي المدرسه وأقعد لوحدي واذا رحت المدرسه كل شوي اطالع الساعه واحسب متى بتجي وبهذا الوقت بتجي، ونبضات قلبي تتسارع واخاف أحس بحراره كذا بجسمي وتوتر وأتعرق، لكن لما تجي صديقتي نبضات قلبي ترجع طبيعيه وكل شيء يرجع طبيعي وأتطمن وأصير مبسوطه وحتى تجيني جرأه، لكن لما تغيب مثلاً اصير هاديه وما اكلم احد احتاجها معي، دايماً افكر لو اننا نتهاوش ما ابغا اقعد لوحدي، ومثلاً مره من المرات دخلت صديقتي للمدرسه بعبايتها في وقت الاختبار وقعدت أفكر بخوف وحسيت بحراره بجسمي واقول بنفسي "ليش لابسه عبايتها؟ ليش معصبه؟ اخاف تطلع بعد الاختبار واقعد لوحدي" واقعد افكر وافكر بقلق لين خلص الاختبار وفكت العبايه وجلست معي طول اليوم (: ، انا دايماً اعطي الاشياء اكبر من حجمها حتى الناس وهذا شيء مره متعبني وصايره مره افكر كثير بأشياء زي كذا واخاف مدري ليش حاولت اغير هالشيء فيني لكن ما قدرت! هذا قلق نفسي؟ ودايماً افكر دايماً دايماً لكن تفكيري غالباً يكون مقلق، خاصةً اذا ابوي تكلم مع امي وكان وجهه جدي افكر "بتصير مشكله، وش اسوي؟" ولما يتهاوشون افكر واقول "اخاف يتطلقون" واشياء كثيره افكر فيها زي كذا وبعدها ابدأ ارجف شوي واخاف وكالعاده نبضات قلبي تتسارع وانا اشيل هم مره وافكر اذا تهاوشو ومره ابوي تهاوش مع امي هوشه قويه جداً وكان يهددها وامي راحت وبعدها قال لي "امك حيوانه" قلتله "وش حيوانه انت لا تسب!" وبعدها طلع من البيت وانا بكيت بكاء اول مره ابكي زيه بحياتي، قعدت اشاهق بشكل قوي وارجف مره ما قدرت اهدأ كان جسمي يهتز، والى الآن ما علمت امي انه قال عنها حيوانه ودعيت عليه دعاء قوي، خفت انه يقتل خوالي لأنه بينهم مشاكل ، حاولت اختصر وانا افكاري مره اعاني منها وما اقدر اعبر عنها بالكتابه لكن حاولت، ابغا اعرف ايش فيني؟ ساعدوني.