هل أنا طبيعية أم أعاني من برود في المشاعر؟

السلام عليكم أعزائيسأبدأ بطرح مشكلتي مباشرة ومن دون مقدمات. مشكلتي هي أنني أشعر بأنه ليس لدي قلب يحب ويعشق، فمنذ أن ولدت وإلى بلوغي الان عشرين عاما لم أغار ولم أشتاق ولم أحن لأحد. (بالطبع أحب أهلي وأحب أصدقائي وأحب الناس الذين يعيشون من حولي) ولكن لا أعلم لماذا لم أعشق حتى الآن، أتمنى أن أجرب الحب وأعرف ما معنى الشوق والغيرة، وأعرف ما معنى أن يكون إنساناً عزيزاً على قلبك، أتمنى أن أجرب كل هذا. منذ حوالي سنتين انخطبت لشب، دامت الخطبة حواليى سنة، كنت في بداية الأمر متحمسة كتير ومالي مصدقة اني رح عيش قصة حب واخيرا، بس طلعت بخيبة لما ما عشت الشي اللي كنت ناطرتو، جربت وحاولت كتير وما قدرت حس تجاهو أي مشاعر، ما كنت حبو ولا اشتقلو ولا غار ولا خاف او اقلق عليه، يعني بالمختصر ما كان يهمني أمرو، ما كنت اكرهو بس ما كنت حس تجاهو بالحب يعني ما كان عندي اي مشاعر تجاهو مع العلم انو انخطبت وما كنت بعرفو من قبل وما شفتو الا بالصور بسبب ظروف شغلو برا البلد. فسخت الخطوبة بسبب عصبيتو وعنادو وتحكمو فيني ومحاولتو إلغاء شخصيتي وإمحاء كياني وهاد الشي اللي خلاني افسخ الخطوبة، كنت غار من رفقاتي لما يحكو عن سعادتهم مع خطّابهم ربي يهنيهم ويباركلهم ويبعد عنهم العيون والحسد وخاصة لما فلانة تقول بغار بجنون على خطيبي وعلانة تقول ما بقدر اتخيلو مع غيري وفلانة تقول بشتقلو وما بتمنى غيابو وهالشي كان يخليني انقهر لأني ما كنت قادرة اني حبو وحس بشعور باقي البنات حتى بلشت مثّل عليه واعمل حالي بحبو وبغار عليه بس ما نفع هالشي معي ولا قدرت دخلو على قلبي. ولما فسخت خطوبتي صرت قول اكيد رح يجيني واحد حبو واعشقو وموت فيه ورح صير غار متل البنات واشتاق وفعلا اجا اليوم اللي تقدملي فيه شب اخلاقو عالية ومنيح كتير بس مشكلتي ان حتى هاد الشب نفس الشي، صرلي سبع شهور مخطوبة إلو وما تحركت مشاعري تجاهو ابدا رغم حبو الي ودلالو واهتمامو فيني كلو ما بيأثر فيني. مع العلم ان حتى خطيبي التاني لهلق ما بعرفو الا بالصور والتلفون وقرب موعد رجعتو على البلد ان شاء الله. (حابة اعرف.. هل أنا طبيعية أو عندي برود بالمشاعر؟)