تعبت من الانتقادات الموجهة لي ولا أعرف ما الحل؟

السلام عليكم انا عندى مشكلة فى حياتى انى غريبة بالنسبة للى حواليا ... يعنى انا عندى ١٦ سنة وتعاملى مع أمى مش كويس للدرجة وانا متفهمه ده علشان اختلاف التفكير وانها من جيل وانا من جيل وكده ..بس انا برضو عندى مشكلة مع صحابي ف المدرسة ... انا طول عمرى متفوقة دراسيا جدااا وبطلع الاولى كل سنة لغاية م دخلت ثانوى وانا مش حابه اذاكر ولا افتح اى كتاب ودايما مليش نفس ومش بحب المدرسة الثانوى دى ومش بطيق أى حد فيها وبروحها بالعافية وبغيب كتييير وبعتمد على الدروس الخصوصية فمش بهتم بالمدسة اصلا ...... نتيجه لكده أصحابي بقيوا يكرهونى علشان شايفينى فاشلة وانى مش بروح المدرسة وكده ودايما مستقلين بيا وبيهينونى بأى طريقة يقدروا عليها بس انا بواجههم بقوة وصمد بس من جوايا انا متضايقه منهم وزعلانه على ظلمهم ليا ... دول مبقيوش يكلمونى اصلا ولا بيسلموا عليا وانا لما بروح المدرسة دايما مش طايقه حد فيهم وببقي عايزة اليوم يخلص بأى شكل والمدرسين بيسألوا الطلبة ف المنهج وكده فهما بيجاوبوا وبيرفعوا ايديهم ويتبسطوا انهم جاوبوا بس انا مش برفع ايدى اصلا مع انى عارفه اجابات كل الاسئلة ومش بحب اقف اجاوب بقيت اكره الموضوع ده وبقيت بحتقرهم هما نفسهم وشايفاهم تافهيين وانهم لسه صغيرين وبيعملوا شغل الاطفال ده .... بقيت حاسه اننا كبرنا على اننا نعمل كده فبقعد مش طايقه الحصص والمدرسين بيهينونى وبينقصونى درجات كتييير مع انى بقعد ساكته ف الحصة مش بأذيهم ف حاجة !! وبينقصونى فى اعمال السنة و فعلا بجيب درجات وحشه جداا بسببهم ... التيرم اللى فات جبت درجات حلوة جداااا مقارنة بالضغط النفسي اللى كنت فيه وكمية الحزن اللى عيشتها وبأقل مجهود مذاكرة منى ومع ذلك برضو محدش محترمنى وبيحتقرونى وده مخلينى اكرههم كلهم واحتقرهم واعرف انهم شخصيات سطحية وكدابة .... انا بشكى لأمى بالحاجات دى بس هى مش بتسمع منى فمش بشرحلها كتير وباخدها من قصيرها واكتم ف نفسي كل اللى مزعلنى.... ده انا حتى معنديش اخت احكيلها انا بنت وحيدة وكل اخواتى ولاد فمحدش منهم هيهتم بكلامى ... امى لما بتقولى حلول بتبقي كلها حلول عكس بعضها وانا بتنرفز وغصب عنى بشد معاها وبنزعق ف بعض ونتخانق وانا مش عايزة اتخانق معاها نفسي تبقي تسمعنى تبقي امى بجد مش تتريق عليا كل شوية علشان شكلى مش حلو وجسمي ضعيف ودايما تقولى انتى عامله زى الولاد وانا اصلا مش ناقصه هم وزعل اكتر من اللى انا فيه !!!! ممكن حل لو سمحتوا من حد متخصص او أى حد عنده رأى مفيد ومنطقي علشان انا تعبت بجد من اللى عايشاه ده