بعد عذابي مع زوجي لا أثق برجل

انا امراة عندى ٢٣سنة تزوجت لمدة شهر واحد وانفصلت عن زوجى بعد العذاب اللى شوفته منه خلال شهر واحد خيانة عبر الهاتف وبرود وحبس وضرب وتعذيب ولا مبالاه من اللى بيعمله ضربنى مرتين وسكت ما اشتكتش منه لحد وحاولت اتكلم معاه واقوله ان تصرفه غير مقبول ،فقالى خلاص مش هكرر ده تانى ولكن بدون جدوى كل نقاش نختلف فيه يقوم يضربنى ويسحلنى ويرمينى فى الارض ويقف عليا ده غير الشتايم والضرب ، اللى محيرنى انه ماكنش كدة فى الخطوبة خالص ودايما يقولى انه هيبقى حنين جدا معايا .المهم اتطلقنا بعد عذاب وبعد ما فاض بيا وحكيت لاهلى عن الاهانة والضرب فطلقونا علطول بالذات بعد ما شافو جسمى المشوه من اثار الضرب والورم اللى فى رجلى وذراعاتى من ضربه. الحمد لله انى مش عندى منه اطفال .المشكلة انى حاسة انى اتعقدت من الرجالة كلها حاسة ان كلهم كدابين وممثلين .مشكلتى دلوقتى انا بقالى شهرين مطلقة منه ومتقدملى دلوقتى واحد عن طريق اخته انا معرفهوش هى بتقولى انه طيب ومتدين وكويس وعايز واحدة جميلة ومحترمة زيك كدة، بس هو مش عنده شقة ومش عنده وظيفة ثابتة كويسة وحكومية مثلا ،بتقولى فى شقة فى مكان عشوائى بتاعة ابوهم ،هو ميت وامه عايشة فى الشقة ، انا موظفة فى وظيفة كبيرة حكومية ،عندى دخل كويس وثابت والحمد لله ،وهو على كلامها ده انه اقل منى فى المستوى الاجتماعى والمادى ،ويكبرنى ب٦سنوات ،بابا وماما مش موافقين عليه عشان حاسين انه مالوش شقة لوحده وعلشان هو عايش فى عشوائيات ومستواه المادى والاجتماعى اقل مننا ، اما رايى انا انا خايفة ومتعقدة من كل الرجالة وخايفة من تجربةفاشلة تانى مش هستحمل ، فخلاص انا قولت لاخته انى مش بفكر فى الارتباط دلوقتى خالص ، بس هى بتلح عليا وتقولى فكرى تانى.مش عارفة اعمل ايه .انصحونى ..وهل ممكن احب واتجوز تانى ،طيب هل ينفع اتجوزه وهو اقل منى اجتماعيا وماديا، ولا هيبقى حاسس دايما بنقص ،علما ان زوجى الاول كان بيحس بنقص عشان كان اقل منى فى المستوى التعليمى.ارجو النصيحة وشكرا لكم يا اخواتى...