خطيبي كان حبي الأول ولكن تصرفه لا يفعله الرجال!

مرحبا انا بدي احكي قصتي الحزينة وبتمني انو حدا يساعدني . انا بنت خلصت تعليمي و من عائله محترمه بعد التخرج من الجامعه اجو كتير ناس يتقدمولي علي الطريقة الطبيعة اللي احنا متعودين عليها بي مجتمعنا الشرقي الزواج التقليدي . كتير ناس اجو عالبيت بس ما ارتحت لا ولا حدا منهم كنت دايماً ارفض . بدو اهلي يتدايقو مني ومن تصرفاتي انو ليش عم برفض العالم بس والله ما كان في شي في بالي كنت لاني متربيه تربية صحيحه وبعرف الصح من الغلط ما عمري صاحابت اي شب كنت اامل انو في يوم من الايام راح يجي فارس الاحلام اللي يستحق تربايتي وانتظاري . عالعموم مرقت الايام واجا شب بدو يتقدم انا كنت كتير مدايقة لان صار موضوع الجواز بالنسبة الي موضوع بشع لان ما عم لاقي الانسان اللي حبو ويفهمني ويريحني ويحترمني متل ما انا بدي . عالعموم اجا هادا الشب وصراحة لما شفتو وقعدنا وحكينا بلشت اعجب في وقلت الحمد لله اخيرا اجا اللي عم استنا . مع انو في فروقات بينا كان من ناحية اسم العيلة كانو اهلي مش كتير شايفينو مناسب لاسم عيلتنا بس بالاخير حكولي اذا انتي شايفه هالانسان منيح بنتغاضا عن كل شي تاني . المهم بعد فترة خطبنا كتيير خلاني احبو وهو بالاول كان مبينلي انو بيموت فيني ومش قادر يعيش بدوني . بعد الخطبة تغير كتير معي صرت انا مش اول اهتماماتو وكمان اهلو كانو يدخلو كتير بكل شي وغصبو انو نعيش معهم بعد ما نتجوز مع انو وضعهم المادي جدا منيح . بس جدا بخلاء وبيتدخلو بكل شي وكمان هو كان كتير يخاف من اهلو ويسمع كلامهم في كل شي. وصارت مشاكل كبيرة قبل كتب كتابنا بي كم يوم . المهم بعد المشاكل الكبيرة اللي صارت انا خفت منو ومن اهلو ووقفت خطبتنا ورجعتلو غراضو . وهون بلشت المشاكل الاكبر . صار يكلمني من ارقم جديدة يشتريها و يشتمني ويهددني ويبعت مسجلت لامي ويشتمها ويشتمني . وبعدها يرجع يبعتلي انا اسف وانا اسف وبعدها نفس الشي . مرة يشتم ويهدد ومرة يعتذر ويحكيلي بيحبني وما بيقدر يعيش بدوني . الصراحة بعد ما انفصلنا انا نكسرت لان كان هوا اول حب بحياتي حبيتو من كل قلبي . صرت مش قادرة اعيش ولا انبسط ولا اعرف اشتغل منيح صارت حياتي فارطة ما الها معنا صرت افكر في 24ساعةً. مع انو جرحني وشتمني وهددني وكسرني بس صرت انا انسانة من كبر الجرح اللي سببلي ياه صرت الهم مبين علي . وهلا بلشوًعرسان جداد يجو عالبيت بس كمان رجعنا لنفس الموال وناس مش مرتاحالهم . الصراحة انا تعبت من كل شي وصرت احس الدنيا معاكساني بكل شي كنت بدي ياه والقدر كمان لعب لعبتو معي . كنت بحلم الانسان اللي اتجوزو احبو وارتحلو لان الجواز مش شي سهل . اقل شي لما اتجوز حدا ارتحلو واحبو عشان اقدر اعيش معو بس للاسم ما عم يزبط معي شي واستسلمت ... مش عارفة شو اعمل اقبل بي اي عريس هلا عادي مع انو انا حاسة حالي مش طايقا ولا شو اعمل بالزبط . انا مش قادرة الاقي حل تعبت . يمكن لاني حبيبت خطيبي الاول كتيييير كتيير مش قادرة اتخيل حالي مع حدا تاني . تعبت والله تعبت . حاولت اني انسا بكل الطرق لانو طلع مش بني ادم اللي بيشتم وبيهدد مرا بس مش قادرة والله تعبت نفسي اعيش حياه جديدة مع انسان احبو ويحبني بس بدون مشاكل ساعدوني والله محتاجه مساعده ....