أشعر أني تائهة فكيف أبدأ من جديد؟

مدري من فين أبدا بس بقلبي كثيير ومحتاجة احد يسمعني وينصحني لأن كل اللي حولي مايستاهلون الثقة .. أنا حاسة بفراغ .. حاسة اني صرت انسانة مالها هدف ولا شيء بالحياة بس اروح الجامعة وارجع منها واقعد ع الجوال صلاتي متقطعة وندمانة على هالشيء ومستحية من ربي لأني كثيير اتوب وارجع مرة ثانية .. درجاتي نازلة مرة ومعدلي سيء مع اني ادرس طب ودخلته برغبة كاملة مني وبنسبة عالية .. حياتي جدا ملخبطة وعندي مشاكل كثير ومافيه اصحاب ينقال عنهم اصحاب .. ابوي الله يسعده وضعه المادي صار مرة على قد حالنا وحنا 3 بالجامعة ف كثرت عليه المصاريف مع انه كريم ومايقصر بس نحس فيه .. لي 3 سنوات عايشة بهالدوامة وعجزت اطلع منها .. قبلها والله كنت انسانة محافظة على صلواتي ودراستي واحب اقرا كتب واتثقف وزي كذا .. بس بعدمادخلت الجامعة حياتي انقلبت فوق تحت ومدري كيف اعدلها .. كيف ارفع درجاتي .. كيف ربي بيسامحني على هالصلاة اللي العب فيها ومدري وش صار لي ولا حتى ليه صرت اهملها .. كيف ارجع انسانة تحب الثقافة والعلم مرة ثانية انطفت هالرغبة فيني صرت احس بالجهل ..حتى شكلي ومظهري ماعاد يهموني مع اني كنت مرة مهتمة والحمدلله رب العالمين اكرمني بوجه جميل .. انصحوني كيف ابدا من جديد ابي احد يوجهني كيف اتصرف من الصفر انا ضعت