ابن الجيران في المنام

‏السلام عليكم ورحمة الله وبركاته .. رأيت رؤيتين ممتشابهة كانت قبل حوالي ثلاثة سنين الرؤية الأولى كانت قبل رمضان .. والأخرى كانت قبل العيد .. ‏الرؤية الأولى : رأيت إن ولد جيراننا خطبني واسمه "سعد" وكنت مو راضية في الحلم وأقول ان سعد ذا مطلق مرتين ومو مستقر على زوجة .. وأنا ماراح أملى عينه و هو شايف أجمل مني وما اقنعوه .. لكن حاولوا معايه أهلي وإني لازم أوافق وأجرب .. ووافقت وأنا مو مقتنعة ولبست الفستان الأبيض فوق البجامة أعتقد وماكنت متزبطة وشعري على طبيعته .. لكن جا يلبسني السلسلة الذهب وكان ينظر لي نظرة إعجاب وأثرت النظرة في نفسي و قلت في نفسي "الظاهر إنو لقي فيني اللي مالقيه في غيري" ولبسني السلسلة ذهب .. ويوم جا يلبسني الخاتم طلع الخاتم صغير جدا جدا ومسدود من الوسط فقط فيه فتحة صغيرة كخرم إبرة .. زعلت ليش الخاتم صغير قال :قالولي إن أصابعك نحيفة .. قلت : ايوا نحيفة بس مو لذي الدرجة . ‏الرؤية الثانية : رأيت إني في مدرستي القديمة الظاهر المتوسطة أو الثانوية .. و كنت على أساس وقتها إني أنخطبت .. وفيه لوحة إهداءات في المدرسة للي بتهدي صديقتها .. مسكت اللوحة ولقيت فيها اسمي .. قلبتها من الخلف لقيت إهدائين لي "عقد ذهب متين عريض عليه ورقة صغيرة مكتوب فيها اسمي ولقبي واسم اللي مهديتني اسمها "سعد الأسلي أو الاسي!" و الإهداء الثاني سلسلة إكسسوار فضي وفيها فص لونه أزرق أو أخضر .. أخذت العقد الذهب وكنت أوريها أخواتي وصديقاتي وأحاول أتذكر اللي مهديتني العقد على أساس إنها وحدة من صديقاتي أيام المتوسط وشوية لقيت لي شنط يد صغيرة حوالي أربعة أو خمسة شنط .. وكنت شايلة همها كيف أشيلها البيت وكيف خليتها هنا .. لميتها ودخلتها في وسط بعض وكان لمها سهل وشلتها بكل سهولة مو زي ما اتوقعت .. وكانت فيه شنطة من ضمن هذه الشنط ملفوفة عليها سلسلة طويلة جدا ونحيييفة ولونها فضي ..