حلمت أن والدي عاد للحياة بعد وفاته

سلام عليكم من فضلكوا محتاجة تفسير الحلم دة انا والدى متوفى من 3 شهور بسبب تعب وبعد عملية كبيرة ... حلمت بيه انه نايم فى اوضتى وانا لما فتحت باب الاوضة ولقيته نايم على سريرى اتخضيت وعيطت من الفرحة وكان فى بالى وقتها انه توفى ورجع تانى " مش عارفة ازاى " قعدت اقوله حمدلله على السلامة يا بابا بس هو كان شكله تعبان زى ما كان تعبان قبل الوفاة ... انا فضلت ماسكة ايده ولقيته بيقولى اخرجى يا حبيبتى مع اصحابك عادى عشان متتاخريش عن ميعادك قعدت اقوله صحابى ايه بس يا بابا انا عايزة اقعد معاك انت ... وبعدين قالى حاجة بعدها انا مش فكراها " بس الى انا فكراه انى حسيت انه بيعاتبنى فى الحلم انى كنت ممكن وهو موجود اقضى معاه وقت اكتر " بس انا مش فاكرة بالضبط هو قال ايه .. يا ترى دة تفسيره ايه ؟؟ وكمان انا كان مقرى فاتحتى قبل وفاته وممكن البس دبل الفترة الجاية هل دة ليه علاقة بحاجة ؟؟ ودة اول حلم اشوفه ويتكلم معايا فيه بعد وفاته وشكرا جدا مقدما