أخي أصيب بصدمة من بعد وفاة أختي

اخويا اتغير ٣٦٠ درجة بعد وفاة اختى انا بنت اكبر واحده فى اخواتى عندى اخ عمره ١٠ سنين واخت الله يرحمها اتوفت بعد نتيجة الثانوية العامه بيومين ملحقناش نفرح بنتيجتها كانت داخله اولى طب الايام دى جابت تقدربر ٩٩.٤ فى المية اتوفت قبل ما تفرح بنجحها اخويا كانت متعلق باختى جدا من هو طفل كان قريب منها وصلت انه اوقات كان بيناديها بماما من شدة حبها ليه وخوفها عليه اكيد كان وفاتها صدمة للكل وصدمة ليا كبيرة انا واختى كنا قريبين جدا من بعض انا عايشه فى محافظة تانيه غيرهم مع جوزى هى اتوفت وفاة طبيعيه وهى نايمه وللاسف اخويا بينام فى حضنها من وهو عنده ٥ سنين ويوم ما اتوفت كان نايم فى حضنها اخويا منزلش دمعه واحده عشان اختى بالعكس كان ثابت ووقف العزى ليها وراح معانا ليها المقابر وفى صلاة الجنازة كان مع بابا بيصلى عليها كنا مرعوبين على اخويا بس لقيناه طبيعى بعد وفاتها بس للاسف داه اللى اعتقدناه اخويا اتغير خالص بقى عدوانى حتى فى الاكل بقى يرفض الاكل اللى اطبخه انا او امى ويرمى الاكل و داه لان اختى هى اللى كانت بتطبخ اوقات بشوفه قاعد على السرير اللى اختى اتوفت عليه ويفضل باصص عليه وساكت الدراسه يعتبر بدأت اشتريت لاخويا الكتب الخارجية وراح الدروس انهاردة كلمنى مدرس اخويا قالى مستواه قل خالص وعاد شارد طول الوقت وعصبى اخويا عنده نسبة ذكاء عالية جدا لدرجة ان مدرسينه اطلقوا عليه لقب زويل روحت اتكلم معاه وبقوله المستر زعلان منك ليه اتعصب عليا اتخانقت معاه وقلتلته مستواك قل فى الدراسه ليه قالى ملكيش دعوه بيا انا حر من امتى بتهتموا بيا فى مذاكرتى روحت اشتكى لماما قالتلى اختك هى اللى كانت بتذاكر ليه وكانت مقسمه وقته وكل حاجة حتى بيخرجوا سوا يتفسحوا بيبقى من ضمن التقسيمه ليه حاوت اتكلم معاه وانصحه واعمل نفس اللى اختى كانت بتعمله ليه بالعكس بيعند اكتر واكتر عاد بيروح كتير لاختى المقابر بيروح ويخلى السواق يوصله والسواق حكى لماما انه بيشوفه بيفضل ساكت وباصص بس على مقبرة اختى من غير ما يعيط ولا يتكلم حتى انه بيرفض يروح معانا واحنا رايحين لاختى