ما الحل مع تصرفات أختي الكبيرة وطلباتها التعجيزية

إحنا خمس خوات أعمارنا كبيرة فوق التلاتينات والاربعينات .. عشنا حياة شوي صعبة واحنا صغار، أهلي عاملونا بشدة . وانحرمنا من شغلات كتير بطفولتنا كانت متوفرة عند أغلب الناس واحنا لا، المهم وبلا طول سيرة كانت أختنا الكبيرة إلها معاملة مختلفة ، يعني كان في تمييز. كانوا اهلي يميزوا اختنا الكبيرة عن الجميع حتى عن الاخوة الذكور، اللبس والأكل والشوكولاتات والعطور و الرحلات حتى انها الوحيدة اللي درست بعد التوجيهي ، أما احنا كان ممنوع عنا كل هالشغلات.. بالمقابل أختنا الكبيرة كانت تعتبرنا عبيد عندها وتعاملنا متل الخدم والعبيد واحنا كنا نخدمها ونخاف منها لأنه أهلي مانحينها الصلاحيات كاملة بكل شي، وكانت أحيانا لما تزعل منا تعاقبنا بطرق مقرفة ما في داعي أذكرها، وكنا لما نمرض ممنوع نكح عشان ما تنزعج ، يعني نخنق حالنا خوف منها فوق المرض اللي بنعاني منه، وكنا نوزع علينا أدوار خدمتها ونعمل جدول ونكتب فيه بنود الخدمة ومين يللي الدور عليها في هدا البند، وكانت تتأمر وتتحكم فينا وتمنعنا من ابسط الحقوق، المهم .. بعد ما كبرنا وبعد ما أختنا تزوجت شاء القدر انها تترمل بعد سبع سنين زواج ، يا الله قديش هالحدث حزين وصعب علينا كلنا، بس بعد ترملها بشهر ونص اجاني انا عريس أنا ع فكرة أصغر بنت في الخمس خوات وبيني وبين اختي الكبيرة 12 سنة ، العريس كان فيه كل المواصفات لصاحب الخلق والدين وكتبنا كتابنا ، اختي انجنت وصارت تغلط وتشتم لانه فلان مات وجبتوا فلان بداله (على حد قولها) وصارت كل ما تيجي عنا تضربني وتكسرني بدون سبب وتسبني وتتعمد تزعجني باولادها عشان ما اعرف ادرس لاني كنت وقتها توجيهي..معاملتها السيئة معانا كلنا يعني مش بس انا، عندها غيرة قاتلة منا ، رغم انه وضعها احسن منا جميعنا واولادها كبروا ودرسوا بالجامعات وتزوجوا ووضعها ماشاء الله منيح ومرتاح ماديا ونفسيا لكن بتفكرنا عايشين احسن منها رغم انه احنا مسخمين وعنا هموم ومشاكل وفي منا ناس فقرا والله، لكن هي بتغار منا بدها كل اشي الها لحالها ، لما تعرف حدا من القرايب حكى مع حدا منا بتصير تسب علينا وتحكي ليش ما حكوا معي انا ، ما بتحبنا نزور بعض ، ولو اتصلت في حدا منا ولقت تلفونه مشغول بتصير ترن على البقية عشان تشوف مع مين بنحكي وبتبهدلنا ، ما بدها نحب بعض، لو حست وحدة فينا مبسوطة بحياتها بتزعل وبتسب ، لو عرفت انه في حدا من الناس بحبنا بتزعل بدها يحبها هي ، هايها وصلت الخمسين والغيرة عندها قاعدة بتزيد وبتضل تسب وتشتمنا ، وشكاكة وظنانة وشايفة حالها علينا، بدها ايانا نكون كلنا في الحضيض وهي في القمة... والعجيب انها بتحب الناس الغربا وما بتغار منهم وبتحترمهم اكتر منا. شو بدي احكي لأحكي انا مختصرة كتير من عمايلها معانا.. شو الحل من شان الله عجزنا معاها ، ابونا مات وامنا ًمريضة وعاجزة وما بإيدها اشي تعمله لانها بتنال مرات جزء من بهادلها .. احنا حاولنا بكل الطرق بس على الفاضي .. والله حتى ما بننساها بالدعاء في صلواتنا .. هي بتضل اختنا ما بهونلنا فيها مع انه احنا بنهون عليها ، أمانة ما حدا يسب عليها او يتحسبن عليها.. بدنا نصائحكم ..