أشفق على حال أمي فهي التي تدفع الثمن

السلام عليكم أنا بنت عمري 18 سنة والمشكلة لي بدي أحكي عنها بتخص أمي ، هو أمي وأبي من لما تزوجوا ساكنين ببيت حكومي ومر على زواجهم 20 سنة وأمي صابرة على هاذ الشي مع أنو البيت صغير ويسبب حساسية وانا وأخواتي كلنا وأمي كمان كلنا مرضنا بالحساسية وانا عندي ربو وممكن اخواتي كمان وامي كل حلمها يصير عندها بيت واسع بس المشكلة أنو أبي شوي من النوع المماطل وبيسمح للناس ياخذو حقو منو ولأنو هو عندو أخواتو وأبوهم أعطاهم من الأرض لحتى كل واحد فيهم يقدر يبني بيتو بس صارو مشاكل بين الإخوة طبعا وأبي سمح في حقو لكي لا تحدث قطيعة وهكذا وأمي صبرت بس هاذ الشي صار يتكرر كتير يعني كلما ظهر في مكان ممكن تكون عندو فرصة ما بيعمل شي وبيخلي الفرصة تفوتو وامي كانت تصبر وتسكت بس خلص هي زهقت كتير وصارت تنكد عليه كتير على أمل أنو يعمل شي بس هو ما تغير بالمرة وما أخذ بالو وأمي وحدها لي تدفع الثمن وتزعل كتير وتبكي كتير ووصل لما تحاكيه يقولها روحي لعند أهلك وهاذ الشي يالي خنقها أكتر شي لأنو مافيها تروح لعند اهلها لأنو زوجات أخواتها راح يضحكو عليها والحكي بمنطقتنا يمشي كتير ، مع العلم أنو زوجات أخوة أمي أصغر منها وكلياتهن عم يبنو بيوت واسعة وهيك ، وأمي مخنوووقة كتير على حظها وصارت عصبية كتير وصار عندها قولون عصبي ، والوضع صعب عليها كتير وما بعرف كيف بدي ساعدها