سرقت زوجها والغيرة تدفعني لانتقام أكبر

مرحبا.. أنا إنسانة مظلومة بمجتمعي والكل بيكرهني رغم طيبة قلبي.. قصتي باختصار مع بنت خالتي.. هيي إنسانة مغرورة وأنانية وما بتفكر إلا بحالها، والمشكلة إنها من صغرنا كانت مدللة أهلها وشو ما بدها بيحضر أما أنا لأ، هي كان عندها رفقات كتير وأنا لأ، وهي كانت شاطرة بمدرستها وأنا لأ وهي كانت تتلقى المدح من المعلمات وأنا لأ، ودايما حياتها أحسن مني.. كنت دايما قول معلش الله ما بيظلم حدا.. بما اننا بالصغر هيك فأكيد لما نكبر الله رح يعطي المظلوم حقو ورح يكافئني ويعاقبها ويبعتلها رجال يظلمها وأنا يبعتلي رجال يدللني، وبعدين يا جماعة الخير اجتني الصاعقة إنها انخطبت وأنا لأ، والمشكلة إنها انخطبت لشب بتحلم فيه كل بنت رغم إنها ما بتستاهل وأنا المظلومة بين الناس الله ما عوضني بس عوضها إلها طيب ليش ليش!!! ليش بيعطيها إلها وإلي لأ!! بس كنت واثقة إنو الله رح يعطيني شب أحسن من خطيبها (لأن كل تأخيرة وفيها خيرة) بس المشكلة إنو ما حدا عم يفكر فيني أبدا رغم إني أحلا منها. بس بعدين لما هيي تزوجت وأنا كبرت بالعمر ولسا ما حدا دق بابي قلت خلص لازم اتحرك واعمل شي فهيي من كتر ما كانت توثق فيي وتحكيلي عن زوجها قمت حبيتو لأني بتمنى هيك شب خاصة انو بيحبو بعضهم كتير كنت اتمنى كون محلها ويكون بيحبني هالحب إلي أنا، خاصة إني كنت بعرف إنها ما بتستاهل شب متلو لأن أنا اللي بستاهلو لأنو هو شب طيوب ومظلوم متلي فحاولت كتير إني خليها تأمنلي وتدخلني بيتها بوجود زوجها كرمال اتقرب منو وخليه يحس إنو في حدا بيشبهو بالطيبة وفعلاً هيي كانت تعتبرني إختها وواحدة من البيت وأنا صرت حاول اتقرب من زوجها من دون هي ما تعرف وهو كان يرفض بالبداية ويهددني إنو ما رح يخبرها لحتى ما ينزع علاقتي معها بس لو عدتها رح يخبرها بس لما صرت إلبس شغلات حلوة ومغرية صار يتجاوب معي خاصة إنها كانت مأهملتو بفترة وفاة والدها وحبني كتير أكتر منها وصار يشوفني أحلا منها وكنت دايماً اسألو مين أحلا أنا أو هي يقلي طبعا إنتي وإلا ما كنت حبيتك عليها وبعد فترة طلبت منو يطلقها ويتزوجني لأن بضل اتخيل حالي عايشة ببيتها ونايمة على تختها لأني بستاهل هيك عيشة. بس هو رفض وقلي ما فيني طلقها بس أنا زعلت منو وقلتلو لساتك بتحبها قلي ما بحبها بس هيي طيبة وبتحبني وبتحبك ليش حتى طلقها دامها ما عملتلنا شي؟ صرت اغويه لحتى يطلقها وقلتلو إنو هوي بيستاهل وحدة متلي أنا، صح إن الكل بيقولو إنها حلوة بس أنا بشوف إني أحلا منها وزوجها كمان هيك بيقلي، وهي كل الناس بيحبوها لأنها منافقة وبتجامل الناس كتير أما أنا صريحة واللي بقلبي على لساني لهيك مظلومة (اللي قلبو طيب بهالزمن بينظلم) بحس حالي بستاهل عيش عيشتها وبعد فترة انخرب بيتها وطلقها وصارت سيرتها على كل لسان وتزوجني أنا وصرت غنية وبعمل شوبينغ وبشتري ماركات وصرت نام بغرفتها وعلى تختها وحتى صرت إلبس تيابها وعملت لون شعري متلها بس مع هيك بضل حسو لساتو بيحبها رغم اني بحاول احكي بالمواضيع اللي هي بتحكي فيها وبحاول اعمل حركاتها كرمال يحسني متلها بس هو لهلأ بيتذكرها والمشكلة إنو يا جماعة تخيلو بيحكي عنها بالخير قدامي من دون مراعاة مشاعري ولما كان متزوجها كان يخاف على مشاعرها ويراعيها أكتر، بجي رح جن وموت من الغيرة بس بسكت منشان ما يقول عني نكدية، بس بحس تعبانة نفسيتي ومالي مرتاحة وبعدين لما عرفتها انخطبت لحدا تاني جنيت أنا، انو كيف هي هيك بتكمل حياتا من دون ما تنظلم متل ما أنا انظلمت (أنا توقعتها تبقى مطلقة وتغار مني لأني متزوجة هيك شب غني وطيوب ووسيم) بس انصدمت إنو خطيبها أحسن من جوزي بكتير وأنا صرت متزوجة واحد أقل من زوجها؟؟؟ يا جماعة كيف فيني انهي خطبتها بأسرع وقت لأنها قربت تتزوج، بتطلق من جوزي وبطلب السماح منها كرمال تترك خطيبها وترجعلو؟ أو هي الطريقة مانها فعالة؟ أنا قلت لجوزي إنو لازم نخرب عليها وننتقم منها بس هو رفض وقال إنو هوي ظلما كتير وما حابب يظلمها مرة تانية ودعالها بالتوفيق. معقول ترجعلو لو تركتو؟