ربيته وتعلقت به والأن يعاملني بقسوة أنا وبناتي

السلام عليكم زوجي مطلق وعندو صبي، تعرفت على زوجي بعد طلاقه بسنتين، كان عمر ابنو ٤سنين، حبيت الصبي حب ما بينوصف وهو تعلق فيي كتير، كان يفتقد للحب والحنان، بعدين اكتشفت انو امو كتير جامدة معو ومش حنونة ابدا عليه، من يوم كتب الكتاب بلش النكد، عطتنا ابنا وبعتتو بتياب مخزقة، كان زوجي من الاساس ناوي ياخد الحضانة بس لما نستقر ونتزوج، فهي اصرت تعطي يا، وعاش الصبي مع بيو ببيت عمي، البيت اولا غير صحي في رطوبة وغير هيك حماتي متوفية وما في غير عمي وسلفي يعني ما في امرأة تهتم في وتطبخ..مهم كان الصبي يقضي نهارو عند عمتو قريبة ع بيت عمي و بس يرجع زوجي من الشغل ياخدو من عندا، وبس تكون طالعه تصيف ياخدو معو عالشغل او يجيبو لعندي، مع العلم كنت صر دايما يجيبو بس هو كان يخجل من اهلي.. بس تزوجنا صارت تنزعج امو كتير انو الصبي بقلا تجبلي هدايا وكان كتير يحكيلا عني، هو بس تزوجنا قلي بدي عيطلك امي فهي جنت ونبهتو ممنوع يعيطلي امي وانو انا امك  ما رد عليها، كان ينفر منها كتير وما يقبل يرد عليها بس تدقلو، وانا مع كل شي عملتو معنا، يعني فترة كتب الكتاب ما عشناها متل ما لازم، دايما ملبكين بالصبي ما فينا نضهر عندو مدرسة... كنت دايما حننو عليها وتجي تاخدو من بيتي اتعامل معها باخلاق وقلها تفضلي بس اكراما لابنها اللي حبيتو حب مش طبيعي، وكنت قول هو احلى شي بحياتي..مهم هيدا الوضع ما عجب الام، وطلبت من زوجي ترجع تاخد الحضانة لكن الصبي رفض كان عمرو وقتا ٥ سنين، وانا مرضت من قهري خفت تضغط علي ويقبل لان كنت شديدة التعلق فيه.. فصارت تنكد علينا ساعه تحاول تتقرب من زوجي وتضل تدقلو ويفيق ع مسج وينام ع مسج مش مسج غرامي طبعا لكن كانت عاملة كتير حدود بينا وبينو قبل ما نتزوج، لغتها بس تزوجنا،وصارت تجبلو هدايا بحجة ابنا انو هو اللي استحلالو، وكتير حركات عملت يعني صار اذا بدو ياخدو عند الحكيم تلحقو، تدق بدا تحكي مع ابنا قبل ما يروح عالمدرسة... كل هول ما كانت قبل تعملن المهم زوجي مش كتير اهتم ومش دايما يرد عليها بس انا نهارت اعصابي وصرت حس زواجي بخطر.. واكتر من هيك بتدق كل شوي بدا تحكي ابنا، اكلت شو اكلت ، ليش ما اكلت، شو بدك تاكل وكأنو مقعدينو بلا اكل، فصرت حسا عم تتعامل معي كأن خادمة لابنا اللي استفزني انو لما كان عايش عند بيت عمي ما كانت تسأل هالاسئلة واصلا كانت تدق مرة ،صارت تحاول تعمل كتير حنونة فصار الصبي يتعلق فيها، مع العلم انو كانت تجي تاخدو من عندي كل ٥ ايام ما تقرب تبوسو ولا تعبطو وهو نفس الشي جامد معا بينما انا كتير مدلعيتو وبعبرلو ، واوقات تجيبو مريض ابكي من قهري علي ونيمو حدي واسهر علي كل الليل.. مهم انو الصبي صار يلين كتير معا وصارت تحرضو عليي فصار يكرهني، وصار يقلا بدي اجي لعندك تفكر انا بدي ابعتلا يا مزعوجة منو فما تقبل لحتى صار عندو مشكلة نفسية صعبة جدا، يفيق بالليل يخبط ع حالو ويبكي، ويضل يدعي بالموت وصار عندو تبول لا ارادي والله بيشهد كنت متحملة وابكي من قهري علي واحكيه قلو ماما مش قادرة تاخدك طول بالك لتقدر بتاخدك... مهم تعبت نفسيتي كتير وزوجي ما حاول يعمل شي ليوقفا عند حدا ع اساس ما تعطيها اهمية وطلبت الطلاق اكتر من مرة لان تعبت نفسيا كتير بس اتراجع لان بحب زوجي كتير وهو كنت حسو ببادلني الشعور بس ما بحب يعطيها اهمية وما الو خلق يوجع راسو معا لان كتير نكدة وحتى علاقتا باهلا مش منيحة كانت دايما تفل من بيت اهلا وتستأجر بيت وتعيش لحالا. بعدين صارت بدا تتدخل شو منحضر عالتلفزيون وشو منعمل بالبيت دقت لزوجي عم تتشكالو انو انا برقص ادام ابنا، مع العلم انو انا الله بيشهد انو كتير واضعه حدود بيني وبين الصبي وما بلبس شي ملفت ادامو مع انو متل ابني، واوقات بلاقيني نايمة بيجي بنام حدي ببعد عنو حتى يكون في مسافة بيني وبينو مع انو حلال عليي وهيك كل ساعه قصة ساعه الصبي متعرض لتحرش مهم زوجي ما سكتلا كذا مرة علق معها وحكي مع اهلا وما نفع... حتى انهرت عالاخر ووصلت لمرحلة من الاكتئاب صعبة جدا، وضل معصبة وارجف واحيانا كرز.. فتدخل صديق زوجي وحكا معها اخد شيخ لعندا عالبيت وكمان ما نفع، بالاخر قال لزوجي اعطيها ابنا خليها تربي وبلا ما تضل عاملة شغلة بال، فرجعت اخدت الحضانة وقطعنا علاقتنا فيها وصار التواصل مع بيها، وحاليا بيجي اخر الاسبوع يومين لعنا علاقتي في منيحة الحمد لله بس مش منيح ابدا مع اخواتو يعني بيضربن وبدفشن وكتير عنيف معن، مع انو بناتي بموتو علي، وبقول لاختو الكبيرة عمرا ٣ سنين بكرهك... بحاول حننو علين وما خليت وسيلة لقربو منهم ودايما مندقلو منحكي انا وبيو واخواتو جبنالو تلفون لنصير نحكي دايما وكتير مندلعو بس يجي وغير هيك انو بميزو ع بناتي بكل شي؛ بضل حريصة انا وزوجي ما نقصر معو ماديا مع العلم امو وضعا المادي احسن منا بكتير .. وكمان ما برد عليي ابدا بس ع امو كتير برد اذا دقتلو وطلبت منو شي دغري بنفذو،فصرت احيانا افقد اعصابي وقلو حكي مش مفروض احكي، انو انت لئيم متل امك، او لمين بدك تطلع الخبث وراتي وهالحكي، ومن قهري من امو اوقات بحاول ذكرو شو عملت معو لان عندي حقد عليها مش طبيعي لانا خربتلي حياتي ومش عارفة كيف انتقم منها بس احكي هيك ما برد، وبصير يحاول يتقرب مني ومن اخواتو برجع براضي وبعتذر منو، فشو العمل كيف بدي خلي يحن ع اخواتو ومعقول يحقد عليي ع كبر لان بحكي ع امو، معقول يكون نسي اعمالا لان كان صغير وهلأ صار عمرو ٩ بس يتذكر كلامي الجارح ويحقد عليي؟ انا بحبو كتير وبهمني تكون علاقتي في وباخواتو منيحة ما بدي يحقد عليي وينتقم منهم بعدين و عذرا عالاطالة