يريد الزواج بي بالغصب

انا فتاة عمري 20 سنة تقدم لي شخص من اقارب امي يصير ولد عمها اعرفه من الطفولة و اكبر مني بـ 7 سنين رفضته بحكم اني صغيرة وما ابغى شئ يشغلني عن دراستي بعدها تقدم لي مره ثانيه عن طريق خالي بما انه ولد عمه وزوج اخته وامي اصرت علي كثير بأني افكر واستخير لكن عاندت اكثر وزعلت امي عليه كثير وابوي تارك القرار لي وهو للامانه ما يبغاني ارتبط بعمري هذا لذلك هو واثق من رفضي اساسا بعدها بشهر اتصل علي رقم غريب تجاهلته وارسل رساله نصيه بأسمي وقال ردي توقعتها وحده من صديقاتي مغيره رقمها اتصل مره ثانيه ورديت وكان صوت رجال سكرت بوجهه وارسل رساله كاتب فيها حرفيا " تكفين فكري انا شاريك وابغاك ومستعد اتقدم لك مره ومرتين وثلاث لحد ما توافقين والزواج تحددينه متى ما تبغين لو بعد 10 سنين تكفين لا تكسريني بعد هالمره " رجع كمان وتقدم لي بنفسه من ابوي وقاله ابوي ان بنتي عنيده ومصره على قرارها ومستحيل ترجع فيه خلها شوي تنسى بعدين افاتحها بالموضوع واعطاه مهله شهرين جاء ابوي وقال الولد يبي منك كلمة ايه ولا لا رفضت الحق اني كرهته مب غصب السالفة كل شوي يتقدم لي ويدخل الناس بذا السالفه وغير كذا يكلمني ويرسل لي من ورى اهلي وانا متأكده ان متقدم لي عشان شكلي مو ان مرتاح لي او شئ زي كذا لان قبل سنه وقبل يتقدم لي كان فيه اجتماع لاهل امي راحو الرجال لصلاة العشاء وانا دخلت مع ثنتين من بنات خالاتي المجلس نأخذ الاغراض ونجددها قالو بنروح نجيب باقي الاغراض وقلت خلاص انتو روحو وانا برتب على ما تجون فجأه دخل شخص توقعت ان البنات دخلو لكن لما التفت لقيته واقف يناظر رجعت لفيت وهو طلع بسرعه وولد اختي كان معه عمره 18 سنه قال انه نسى جواله ورجع يأخذه وما كنا ندري انك هنا يعني بالغلط .. بعد رفضي له للمره الثالثه رجع ارسل مره ثانيه ان وش اللي ناقصني وانك تحبين واحد عشان كذا رفضتيني ترا ماراح يتزوجك ومن ذا الكلام رديت عليه بالحرف " انت رجال وكفو وانا ما رفضتك لذاتك رفضت الزواج نفسه المفروض اني ما ارد عليك لكن شفقه عليك وعلى تفكيرك المريض بأني رفضتك عشان شخص ثاني وحتى لو حقيقي هذا ما يخصك وشكك هذا كافي بأني ارفضك بدون تفكير ." رجع قال انه بيأخذني غصب وراح يتقدم لي من جدي ابو امي واذا قال لجدي خلاص السالفه كذا انتهت بأخذه غصبن عني ابغى حل وش اسوي كيف ارفضه من جدي قسم بالله يشرشحني اذا رفضته جدي ابدا ما عنده تفاهم وابوي بيوقف معي متأكدة لكن ما ابغى مشاكل بين ابوي وجدي كرهته زيادة حتى اكره طاريه ويضيق صدري من يفتحون سيرته اذا بتقولون وافقي واجلي الزواج عشان ما تنشغلين هذا الحل ما ينفع لان الارتباط وحده شغله .