زوجي مريض بالشك

انا واحدة عندى ٢٢سنة متزوجة ، انا عايشة مع جوزى حياه باردة وغريبة ، لسة متجوزين من شهرين، اكتشفت انه انسان مريض بالشك يخرج من البيت و هو طالع على الباب قبل ما ينزل يقولى طبعا انا هنزل من هنا و انتى هتستنى الواد الصايع اللى تعرفيه ويبصلى ويضحك وبيقول الكلام ده بهزار يعنى اروح ابصله باستغراب واقوله ايه اللى بتقوله ده يروح يضحك ويقولى بهزر معاكى فببتسم كدة واسكت واقوله بس الحاجات دى مفيهاش هزار..قبل الجواز واحنا مخطوبين كان دايما يسالنى اذا كنت اعرف حد قبله او حبيت حد وانا اقوله لا طبعا انت اول راجل فى حياتى علما ان انا من عائلة محافظة جدا ووالداى ربونا على عدم الاختلاط وان مافيش صداقة بين الولد والبنت وانا كنت بقوله الكلام ده المهم كان يسكت ويقولى ماشى.بس كل فترة يتكرر سؤاله و يفضل يحكيلى عن انه عرف بنات قبلى كل واحدة صاحبها شوية وخلاص .وانا كنت بزعل اوى من كلامه ده وبقوله بس الكلام ده طبعا مفيش دلوقتى بعدالخطوبة لانى مش هسمح بكدة ابدا يقولى اه ده كان زمان ايام الشقاوة وخلاص. مرة حكالى ان فى شركة تابعة لعمله فكان بيتعامل مع موظفينها بالتليفون وهو كان بيتعامل مع واحدة فى التليفون بس عمره ما شافها بس هى اللى بتكلمه كل فترة قال ايه وتحكيله على بعض خصوصيتها مرة حرامى سرقها ومرة هى عايزة تتجوز واحد وابوها مش موافق،روحت قولتله لا انا مش بحب كدة ولوصداقة بس واحتراما ليا المفروض تقطع كلامك معاها قبل ما نتجوز قالى هى اللى بتتصل قولتله لما لقيتك مرحب وعنك استعداد والا ما كنتش هتحكيلك عن اسرارها قاللى ماشى خلاص. المهم انا زعلت بينى وبين نفسى وبعدين قولت خلاص طالما حكالى يبقى هو مش بيعمل معاها حاجة غلط ويبقى هو صادق معايا وحايلت نفسى انه هيسيبها .المهم بعد الجواز لقيته بيكلمها هى وغيرها وغيرها وعرفت بالصدفة وانا بتكلم من موبايله فى مرة من سجل مكالماته . وسكت وما قولتلوش حاجة علشان ما نتخانقش. المهم كانت بتحصل مشاكل تانية بيننا علشان تدخل اهله فى خصوصياتنا وكان بيشتمنى و بيضربنى ومازال . وفى الخناق يقولى كلام غريب بيقولى مش كفاية بخرج من البيت وبسيبك لوحدك فيه!! قولتله ليه انت خايف اسرقك مثلا ده انا مراتك. قالى لا بس انا ايه اللى يضمن انك ما تجيبيش واحد فى الشقة وانامش موجود!! قعدت اعيط من كلامه وانا مصدوووومة واقوله ازاى تقولى الكلام ده انت تعرف عنى انى اعمل كدة قالى وانا اضمن منين .خاصمته طبعا على كلامه وبعدين صالحنى وقالى متزعليش كنت متعصب، وسامحته. بعدها بفترة اتخانقنا على سبب تافه وفضل يشتم ويضرب فيا وبهدلنى وفوجئت بكلام جارح جدا منه بيقولى انى واحدة مش كويسة وانه اتجوزنى ونضفنى ولمنى من الشوارع وان الناس قالوله قبل الجواز انى بنت مش تمام وانى مش كويسة وبروح شقق واعمل حاجات وحشة ،تتخيلو وانه هيقول للناس انه شافنى مع واحد فى بيتنا وانه مصورنا وانى ازاى اكون ام اولاده ،كل ده وانا مصدوومة ومش قادرة ارد من صدمتى بسمعه وببكى حاسة انى بحلم مش مصدقة انه يجى عليايوم ويتقالى انا الكلام ده ده الناس كلها بتحلف باخلاقى وبيتكلمو عن ادبى احترامى. انا اللى عارفة خياناته ليا وساكتة وكلامه مع الستات المش متجوزين والمتجوزين و ساكتة كمان هو يتهمنى الاتهامات دى ويفترى عليا بالكذب وفى وشى ويقول مصورنى!!!!!حسيت الدنيا بتلف بيا وقتها وانى واقعة فى مصيبة كبيرة مش عارفة احلها لواحدى.هل هو مريض بالشك ليه بيعمل كدة فيا ده انا بحبه جدا ومدلعاه ومش مخليا نفسه فى حاجة.انا سبتله البيت ومشيت وحكيت لاهلى كل حاجة وهما مصرين على الطلاق لان حياتى هتبقى جحيم معاه و قبل ما يكون عندى منه اولاد .نسيت اقول لما كنا مع بعض بنتفرج على التليفزيون كان بينسجم فى افلام ومسلسلات فيها ست بتخون جوزها ويبقى مركز اوى ويقولى شايفة الستات الخاينةوبجاحتهمش وانا ارد واقوله حرام اللى بيعملوه ده ربنا هيحاسبهم وكل شوية ييقولى اعترفى بالماضى قولى مش هزعل . انا تعبت معاه جدا مش عارفة ليه معيشنى علطول دور البنت الوحشة الخاينة اللى بتعرف رجالة وهو مستحملها،علما انى مش بخرج من البيت الا معاه وعلطول بيشوفنى انى مش بكلم فى التليفون غير بابا وماما واخواتى .ساعدونى انا تعبانة اوى ونفسيا متدمرة انصحونى قبل فوات الاوان.