خطيبي تركني.. فهل أطلب منه العودة؟

عاوزة اكتب مشكلتى وياريت تفيدونى .. نفسيتى تعبانة جدا لدرجة كبيرة .. انا اتخطبت لشخص من سنة ونص والخطوبة استمرت ست شهور بس . قبلها كان قصة حب كبيرة استمرت خمس سنين وانا كنت رافضة ف الأول لانى كنت خايفة أتعلق بيه ومايحصلش نصيب . كان لسه شاب ف بداية حياته معدم من كل شيء يدوب لسه مخلص دراسة وبيشتغل اى شغل لحد مايلاقى الشغل المناسب . والدته كانت تعبانة ومريضة وهو كان بيراعيها . لا شقة ولا شغل ثابت ولا اى حاجة تضمن مستقبل . بس للاسف انا اتعلقت بيه جدا وكنت كل يوم ادعى وأقول يارب لو خير قربه ولو شر أبعده. يارب انت وضعت حبه ف قلبي وغصب عنى وهو كان بيتمنالى الرضا أرضي كنت بالنسباله كل حاجة وتصرفاته كلها كانت حب وتفانى . انا كنت بصلى قيام ليل وادعيله أن ربنا يوفقه وأننا نكون لبعض. ماتلوموش عليا حبي ليه وتقوله دا أخرة الحب والكلام الفاضى لأن فعلا كان غصب عنى ولأن قلبي طاهر بجد . فضلت جنبه سنين وسنين . يتعب ادعمه وأقوله مهما حصل انا جنبك ومش هسيبك. يضايق والدنيا تضيق عليه أكون معاه وادعمه نفسيا واصبره لحد مابقيت كل أهله وأصحابه وقوته. لحد ماسافر برا عشان يشتغل وعدت سنتين وجه اتقدملى واتخطبنا بس فعلا حسيت انه مش هو . اتغير معايا شوية ولما كنت اواجهه يقولى الدنيا والحياة وقرف الشغل والغربة لحد ماجه معاد أننا نحدد الفرح وروحت حجزت القاعة وكل شيء بس عشان هو من محافظة تانية حصل مشاكل عشان الفرح وهو وقف ف صف أهله وجه عليا وهانى وبهدلنى انا كنت مصدومة ومنهارة من كل أيلى بيحصلي ادمرت نفسيا وفضلت فترة مش حاسة انى عايشة لحد ماقفل ف وشي كل الأبواب انى اكلمه وقالى خليكى جنب اهلك ينفعوكى وعملى بلوك وقطع عنى اى اتصال مع انى ماكنتش هتجوز ف شقة ولاهفرشها وقت الفرح لأنه كان هيسافر على طول بعدها وانا هسافرله وان أهلى كمان أيلى عملوا الخطوبة وكلفوها وانا ماطلبتش منه اى حاجة أو حتى فستان يجبهولى .. لقيت انى لازم اخد قرار واحافظ على كرامتى وقلت خلاص وهو بعد فترة كان عملى بلوك فتحه تانى وحط صور عشان اشوفها وانا ماحاولتش اتصل بيه ولا اكلمه برسالة لحد مابعتله رسالة من رقم تانى وقلتله تعالى خد شبكتك لما تنزل إجازة. . وفعلا جه ونزل وبعتلى رسالة يهزئنى وإهلى عشان ماردناش عليه من الاول وفاكر أننا هنطمع ف الشبكة وف الآخر جه خدها وهو ماشي قال لوالدى وللناس انا كنت بحبها بس مابقاش ينفع ... انا دلوقتى نفسيتى تعبانة اوى وبفتكره على طول الأيام دى لدرجة كبيرة مع أن عدى على الموضوع ده سنة ونص .. انا بقول هل ممكن يرجع والا انا بتوهم نفسي وهو أيلى سابنى وانا ضعيفة ومكسورة بعد ما حددت فرحى وهو بقا ثابت ف شغله ف دولة عربية وبقاله بيته وشفله وعربيته وانا سابنى محطمة .. كتير بحنله اوى وافتكر كل لحظة حلوة اسعدنى فيها وأبكى وأقول اكيد لسه بيحبنى لأنه سايب كل اميلاته والفيس والواتس مفتوح يمكن مستنى اكلمه ... أوقات بدعى وأقول يارب لو هو لسه بيحبنى يرجعلى ولو هو شر فعلا يدوق زى مادوقنى عشان حرقة القلب والله والله مالهاش حد ... انا دلوقتى بفكر ابعتله رسالة واقوله لو لسه بيحبنى يرجع .. قلبي بيتقطع فعلا وحاسة انى ضايعة .. قولولى اعمل ايه .. ياترى الحب ممكن يرجع تانى؟ فيدونى بالله عليكم انا أجمل أيام حياتى عشتها وكان هو فيها ...