أنا المسيطرة في علاقتنا وخطيبي سعيد بهذا الوضع

مرحباعندي مشكلة تاعبتني كتير ومخنوقة منهااقسم بالله عم اكتب ودموعي على خدي طول الوقت عم فكر وما عارفة شو اعملمشكلتي هيي إني من حوالي 3 شهور تقدملي عريس منيح كتير وأخلاقو عالية ومتدين وبيصلي والكل مدحلنا فيه فوافقنا عليهعملنا الخطبة وسافر فورا بعد 5 أيام لأنو هوي بيشتغل بالبحر وما لحقنا بهالفترة القصيرة نتعارف منيح لأننا ما قعدنا سوا الا مرتين بوجود الاهل، ومن خلال كلامي معو ع التلفون ومحادثاتي معو على الواتس اب لاحظت إنو شخصيتو مالها متل ما أنا بتمنى، شخصيتو ضعيفة ما بحسب لزعلو حساب لأن أصلا ما بيزعل من شي، كلامو ما بيهمني لأنو ما بيعصب ولا بيزعل اذا ما سمعت لكلامو، بعمل شو ما بدي واللي بيحلالي ولا بحس انو عندي رجال لازم يبدي رأيو أو يكون صاحب قرار، لما منختلف على شي بعصب منو وبرفع صوتي ما بيزعل ولا بيتأثر بس بيقلي يا فلانة ليش انتي فورا بتعصبي خلينا رايقين، بحس ضغطي بيطلع من برودو ومن هدوئو الزايد، والابشع انو بيصالحني حتى لو انا الغلطانة، دايما بقلو لا تصالحني انا الغلطانة أنا اللي لازم صالحك، حسسني انك رجال والك كلمة عليي لا تخليني حس إني أقوى منك ما بحب هيك، أنا بحب احسبلك حساب وخاف ع زعلك بحب حس انو كلمتك ما بيصير تنكسر، بيقلي خلص من اليوم وطالع رح تشوفي معاملة تانية، بس عبث ما بيتغير، هيك طبعو وهيك شخصيتو صعب يتغير، ما بحس الو كلمة عليي وكلمتو لا بتقدم ولا بتأخر، حتى اذا نهاني عن شي بعمل الشي اللي نهاني عنو منشان يعصب عليي بس ولا كأن في حدا، قلبو بارد كتير، ولهلق ما حبيتو ولا تعلقت فيه وهوي بيحبني كتير بيوجعني قلبي لما بيطالب باهتمام مني او لما بيطالب اني اتصل فيه وابعت رسايل بس ما بإيدي بشعر بملل لما منحكي ع التلفون لأني دايما بحس انا المسيطرة وهالشي ما بيعجبني حتى ونحنا رايقين وعم نضحك بحسو تحت أمري وهالشي تاعبني، بحب حس انو رجال قادر يحميني، كلمتو مسموعة، بحترمو وبهابو بس ابدا ما بيتغير.. حتى كنت احلم اني انخطب لحتى يكون عندي سند يحميني لما اتضايق، اشكيلو يعطيني معنويات ويعطيني نصائح ويحسسني اني قوية بس لقيت معو العكس، دايما بيحكيلي مشاكلو وبيقلي ما حدا بيفهمني غيرك، دايما بعطيه نصائح وبحسسو اني حاسة باللي مضايقو وبعطيه دافع وثقة بالنفس وبخبرو انو قوي وانو رح يتغلب على كل شي، بس احيانا بتعب من هالشي، بتعب لما بحس حالي انا السند، ولما بحس اني انا اللي بدي اعطيه القوة، وحتى اذا شكيتلو شي ما بحس نصايحو مهمة، ما بوثق برأيو ولا بهتم لشي بيحكيه، اصلا ما عدت حكيتلو شي.. بتمنى لاقي حل غير اني اتركو لأني مستحيل اتركو من دون ما يكون عامل معي شي لأنو انسان محترم وبيحبني والكل رح يلومنيخاصة انو الكل بيعرف انو بيحبني كتير والكل بيمدح بأخلاقو حتى لما بتخانق معو امي بتجي معو وبتقلي هاد الشب محترم كتير ومستحيل يعمل شي يزعجكهالشي تاعبني بجد خاصة لما بشوف خطيب اختي ربي يباركلها حنون وشخصيتو قوية وصاحب رأي الله يهنيهم ويباركلهم (صدقوني ما حسد بالعكس لما بسمعها عم تحكي شو قلها خطيبها وكيف انها استشارتو وعطاها رأيو بشي موضوع، بحس بنوع من الغيرة بقوم بصير اذكر الله بقلبي وادعيلها بالبركة والهناء وبدعي ربي يبعد عنها العين والحسد)