ماذا أفعل لكي أحب خطيبي؟

انخطبت من حوالي سنة لشاب طيب وخلوق ولكن الخطبة صارت لما كان مسافر وكان تواصلنا مقتصر على المكالمات الهاتفية والرسائل فقط، وبخلال فترة سفرو ما قدرت حس بمشاعر تجاهو، ولما كنت احكي لحدا عن هالشي كانو يقلولي انو لما رح يجي وتقعدو سوا رح يتغير كل شي وتصيري تحبيه بجنون، وكنت متأملة اني حبو متل ما حكولي، بس من حوالي شهر اجا على البلد وقعدنا سوا كتير بس لهلق ما عم بقدر حس بالحب اللي هو بيحسو تجاهي، كتير بيوجعني قلبي عليه وبحس حالي عم غشو لأن لما بيسألني اذا بحبو بجاوبو اي بحبك، ولما بحكي لحدا اني ما عم بقدر حبو بيقلولي انو ما رح يصرلك متل هالشاب لهالسبب حاولي تحبيه، خطيبي انسان رائع بكل ما تعنيه الكلمة من معنى الكل بيحبو والكل بيمدح بأخلاقو والكل رح يلوموني اذا تركتو قلولي شو الحل كيف بقدر خلي حالي حبو مع العلم اني ما بكرهو ابدا.. بالعكس كتير بتمنى حبو لأني عارفة اني ما ممكن لاقي حدا بأخلاقو (معلومة عني.. أنا بحس حالي باردة لأني ما بتأثر بأي كلمة غزل بيحكيها الي وبحس انو الغزل والكلام المعسول حكي فاضي وما بيعنيلي شي ولما منكون عم نحكي حديث عادي بكون كتير مدموجة معو وبحس بالانجذاب الو بس لما بيحكي غزل بحس بالملل وبصير بدي اياه يخلص بسرعة.. حتى ما بشتاقلو ولا بزعل اذا مضي ايام ما اجا لعندي). بترجاكم بدي حل..