أبي سرق مني أجمل أيام حياتي بسبب عقليته المتخلفة

عندى سؤال بسيط الانسان لو مكنش يحس بالامان ف بيت عيلته هيحسه فين و بالذات البنات يعنى لو محسيتش بالاحتواء الحنية من ابوها و بالذات لو معندهاش اخوات ولاد سؤال بسيط تحسه فين ؟؟؟ و اكيد المكانة دى عمرها م بتتعوض من الوزج يعنى فيه كتيرين لو حسوا انه زوجاتهم كانت حياتهم صعبه ف بيت اهلهم بياخدوها نقطة ضعف ليهم مبياحولوش يعوضوا الجانب ده ف حياتهم , و هيا دى مشكلتى عمرى ما حسيت بالامان من والدى كان طول الوقت مسافر بره يعنى 80% من طفولتى معاشهاش معانا و زمان فعلا كان بيخرجنا و بيفسحنا قبل ما يسافر و لما كان بيتشاكل كنا بنقول اهوة يومين و ماشى انما لما كبرنا و وصلت لمرحلة المراهقة يعنى سن الاعدادى و استقر معانا حياتنا اسودت حرفيا و بسبب مشاكل تافهة جدا و ياما كانت بتضيع منه حاجات و يتهمها فينا و يطلعنا حرامية و بعدين يلقاها و يبقى شكله وحش حتى م يفكرش يعتذر لينا و بيفتعل مشاكل من الهوا و ياما شتم والدتى من غير وجه حق و وصلت لانه اتهمنا بشرفنا مرة كنت سهرانة عالنت بلعب عالفيسبوك عادى مع صاحبتى و كنا جايبين كميرة نكلم بيها خالتى اللى مسافرة زعق و بهدلنى و اتهمنى انى بكلم شباب بالكاميره مع انه كان شايف اللعبة شغالة و مرة اتهم اختى انها بتجيب ولاد البيت ده وهيا عمرها 15 سنة!! من غير دليل و طلع انه فهم غلط بس ضربها و عملها صددمة نفسية و بس و مرة كان جاى كهربائى يصلح السخان و ماما بتطلعلهم الشاى قام اتهمها انها بتضحك للعامل وخدها فوق السطح و بهدلها ضرب مع ان والدتى متدينة و بتحفظنا القران و عمرها م اتساهلت مع راجل غريب و لا هزرت معاه حتى لو ف وجود جدى الله يرحمه حتى كان على طول يجربنا اننا نقعد نسمع خطبه العصماء قد ايه هوا مظلوم و ان امى غلطانه حتى لما يشوفنا بنزاكر يخلينا نسيب المزاكرة لدرجة انه ايم الامتحانات كنت باخد كتبى و ازاكرعلى محطة القطر او فى الجنينة العامة و اكيد مكنتش بجيب درجات حلوة و اكيد كان بيزلنى بسببها و كنت بخاف منه جدا و حتى عفوا يعنى كنت بخاف اروح الحمام باليل بسببه عشان كلامه ده و جالى مشاكل فى الكلى بسبب كده و فقر دم كمان عشان مكنتش بتعشا باليل عشان ميجيش يلاقينا و يتخانق معانا و الغدا كمان مكنتش بلحق اكل لانه بيبقى جاى من شغله و طبعا صوتنا كان واصل للجيران و مفضوحين بالثلث انا كنت بستغرب جدا من البنات اللى بيتكلمو عن والدهم بتقدير وحب اشمعنه معنديش زيهم حتى كنت بستغرب لما بلاقى واحدة صاحبتى زعلانة على والداها لما يتوفى ليه كلمه بابا بالنسبه لى يعنى الخوف صوته دايما مربوط ف خيالى بالزعيق و الشتايم مع انه مع باقى الناس زى الملايكةو لما نحاول نعترض على اى حاجة يقول انا ابوكو مالكوش تتعاملو معايا كده اكيد امكو مقسية قلبكم عليا على اساس ان احنا صم و بكم و مبنحسش مثلا !! و يتهمنا بالعقوق !! مكنناش بنلاقى منه اهتمام عمره م خدنى ف حضنه الا لما اتهمنى بالكاميره او لما بيعمل مشاكل طول عمره قرايبه و الناس احسن مننا وانا ف ثانوية عامة ايام الامتحانات مكنش بيطمن عليا ولا بيسالنى عملتى ايه الا نادرا لما يشوفنى و بنت خاله لما كانت ف 3 ثانوى و كان هوا مسافر كان لازم يكلمها كل يوم يسال عنها و لما قولتله كده زعق فيا و قالى ايوة ما هى اكيد امك محرضاكى و هيا مكنتش قالتى حاجة و الله كتير واحنا صغيرين قولنا لامنا اطلبى الطلاق احنا مش عايزينه رفضت و قالت انتو بنات محدش هيقبل يتجوزكو و امكو مطلقة عشان المطلقة دى زى ما تكون عفريته الكل بيخاف منها و من ولادها حتى انا واختى فكرنا نقتله و نحطله سم فى الاكل بس امى قفشتنا بالصدفة و رمت الاكل ف الزبالة يعنى معشناش طفولتنا و لا سننا زى باقى قرايبنا و طبعا لكم ان تتخيلوا كم الازمات النفسية اللى عدت على اطفال بالظروف دى المهم انا دلوقتى عندى 21 سنة و اختى 18 سنة و عندنا فراغ عاطفى رهيب جدا و الحمد لله نقلنا من البيت ده و روحنا محافظة تانية اللى فيها كليتى عشان نهرب من ماضينا بس هوا متغيرش لسا من اقل حاجة بفتكر كل اللى فات و هوا طول الوقت بيهددنا انه هيسبنا و يمشى و هوا عارف ان امى بينها و بين نفسها خايفة من كده انا خايفة جدا مش عارفة واحدة زيى ممكن تبقى زوجة وأم ازاى مع انى نفسى جدا اتحب واتجوز وابقى ام زى باقى البنات حتى لما بعدى على محل فساتين عرايس ببقى نفسى جدا ابقى عروسه و البس واحد بس لما تخيل انه ممكن جوزى يعمل فيا زى ما ابويا يعمل ف امى و اجيب اولاد يتعبوا فى الحياة زى انسى الفكرة و حتى لما بيجيلى حد برفض حتى عمى بيقولنا انه ده بسبب مشاكل ابوهم معاهم و هما صغيرين طب واحنا ذنبنا ايه ؟؟ لما هوا مش قد الجواز مكنش يجوز و يعذبنا , و كمان مش موافق انى اشترك فى اى عمل تطوعى و مش عايزنى ابقى ناجحة فى مجالى شايف انى فاشلة مادام مدخلتش طب او هندسة وهوا طالما فشل ف حياته عاوز الكل زيه ,انا تعبانة جدا حاسة انه سرق احلى ايام حياتى و مش عاوزاه يسرق اللى باقى منها اعمل ايه ارجوكم ساعدونى و اسفة على الاطاله بس فعلا ماليش حتى اصحاب افضفض معاهم و غير كده ارجوكم ادعولى بظهر الغيب كتير و شكرا