مازال والدي يعامل أخي بقسوة رغم كل المعاناة التي مر بها

مرحبا مابعرف من وين ابدأ نحنا عيلة مكونة من ام واب واربع اولاد شباب واربع بنات حالتنا المادية ممتازة جدا والحمدلله القصة بتبدأ من انو والدي تزوج على امي وحدة ثانية من مدة طويلة وجاب منها ولد واحد وبعدها طلقها وتخلى عنها وعن الولد كبر الولد وصار عمرو 7 سنين وبعدها ماتت امو بمرض ورغم هاد الشي ابي ضل متخلي عنو لدرجة انو كان رح ينوضع بملجأ الايتام لولا تدخل عمتي لي قبلت تربيه ببيتها لانو حتى اهل امو مارضيو يربوه او يعتنو فيو ربتو عمتي حوالي خمس سنين بعدها اقنعو ابي انو يجيبو لعنا عالبيت وفعلا جابو وعاملناه احسن معاملة رغم انو ابي ماكان يحبو وكانت معاملتو جافة كثير هو يعتبر الابن التاسع واصغر واحد فينا وهو اصغر مني بسنتين قعد عنا حوالي ست شهور وبعدها ابي طلعو مرة ثانية وعمتي رفضت تستقبلو وراح الولد هرب وهو عمرو 13 سنة وعانى من مرض نفسي وحاول ينتحر مرة بس الله نجاه ب اعجوبة ورغم هاد الشي ضل بابا قاسي عليه لحد ما اجا واحد كان قريب من عيلتنا اخد اخي ورباه ببيتهم وصار ياخدو معو على ورشتو وهي حدادة السيارات الكبيرة وصار يعلمو هنيك وغير نفسية الولد بالكامل ورجعو للحياة مرة ثانية القصة ومافيها انو الولد كبر وصار عمرو 19 سنة وحامل الهم بكير والرجل ضل معاه وسلمو ورشة بعد ماعلمو المصلحة طبعا رغم جفاء ابي وبعض اخواني معو الا انو هو كان طيب كثير وضل يبادرهم سنين رغم تخلي ابي عنو بس اخر فترة بلش يحقد بقوة على ابي لانو اول شي منع عنو حقو من الورث وثاني شي الطفولة المريرة لي عاشها وتخلي والدي عنو وكثير مواقف كان والدي قاسي فيها على اخي طبعا اخي بهي الفترة قطع علاقتو بشكل كامل معانا ومابيطيق يسمع ب اسمنا رغم اني بحبو كثير وكنت حن عليه كثير انا واختي لي اكبر مني بس باقي اخواني بيعاملو بجفاء لدرجة انو اخي الكبير لما تزوج ماعزمو على عرسو برغم من هالشي بادر وحضر اخر موقف قبل مايقطع علاقتو بالكامل فينا اختي عملت عيد ميلادها ال 15 ورغم انو ماعزمناه الا انو هو بادر وجاب هدية بس للاسف كانت معاملة والدي وبقية اخواتي الو جافة وكأنو شخص غريب والضربة الاقوى انو اختي الصغيرة احرجتو وكسرت خاطرو لما قالتلو انا ماعزمتك وتأففت طبعا هو انحرج كثير وصار وجهو اصفر قدام الكل وتحجج انو عندو تليفون وغادر المزرعة هو وعم يركض ومن بعدها قطع علاقتو بشكل نهائي معانا حتى برمضان الماضي والعيد ماقرب علينا وماقال مرحبا رغم انو بيعرف اني بحبو كثير انا واختي الثانية بس هو شمل الكل وقطع اي صلة قرابة بينا ابي حنون كثير علينا وكريم كثير بس مع ابنو مابعرف ليش هيك عم يعمل وامي باردة ومابتهتم بهالامور انا كثير زعلانة على اخي لانو فقير وبيضل بيشتغل من الصبح لليل مشان يقدر يأمن لقمة عيشو رغم انو ابي غني كثير ونفسيتو مدمرة بشكل كامل بسبب ابي ونظرة المجتمع الو ومسخرة الناس اخر فترة تحول من شخص طيب ومسالم لعدواني وحقود بشكل ماطبيعي حتى طريقة حكيو تغيرت لما حاكيتو اخر مرة قبل ثلاث شهور وكان حامل غل كبير بقلبو حتى الي وطلب مني انو ما اتصل فيو مرة ثانية لانو هو تخلى عن الجميع افيدوني بدي لاقي حل لمشكلة اخي قلبي عم يتقطع عليه كثير لانو حياتو ومستقبلو مدمر انا واخواتي درسنا وهو لا ماكمل مدرستو ونحنا عايشين بسعادة غامرة وهو عايش بتعاسة وكل السبب ابي لي لهلق على نفس المعاملة