تصعُب علي نفسي عندما أري حماتي وبناتها يتمتعون على حسابنا

انا متزوجه وعندي طفلين وجوزي وحيد على بنات وباباه متجوز وسايبهم حماتي كانت سبب في مشاكلهم بس هو ماحاولش يحل حاجه وعندا فيها راح اتجوز وسابها ٣٥ سنه وهي صعبانه عليا طبعا وبعذرها في اللي بتعمله فيا بس ده مش زنبي هي محسساني اني حاجه مالهاش قيمه وبتستخسر فيا حتى الاكل ولو جت عندي وكنت نايمه مثلا الاقيها بتفتش في شقتي عن الحاجات الجديده وكتير بتطلب مني حاجات من جهازي تاخدها والمشكله اني لما اقول لابنها هديها الحاجه اللي طلبتها يقوللي ماليش دعوه لو احتجتيها في يوم ماتقوليش هات غيرها غير طبعا تريقتها هي وبناتها عليا في كل حاجه بعملها مع اني الحمدلله مش وحشه ومتعلمه ومش هقول اكتر منهم بس الحمدلله وبيقوموه عليا في حاجات كتير وانا كنت بتحمل وعادي بس المشكله الأكبر انه هو كمان مقصر جامد معايا مخليني بقول لنفسي اتحمل علشانه ليه يعني هو مرتبه كويس جدا بس للاسف مش بتلاقيه خالص يعني من اول ما اتجوزت ويقولي بسدد ديوني وبعدين بعمل جمعيات ومش عارفه الحقيقه فين غير انه ممكن نفضل كام يوم ممشين البيت بأي اكل لحد القبض واول ما القبض ينزل الاقي مامته بتتصل عاوزه فلوس مع انهم كلهم بيشتغلوا ومرتاحين في بيوتهم وانا واولادي اللي بتدفع التمن واي حد يتعب فيهم يجروا على انضف عيادات واغلى علاجات وانا تعبي وولاداتي على حساب التأمين لحد مابقى عندي أمراض تخليني ماتحركش من السرير ومفيش حتى مصاريف في أيدي ولا لبس ولا اي حاجه وكل اما اكلمه يقوللي منين يعني لا بقيت شكل ولا صحه ولا اي حاجه وكل ده في ٥ سنين بس وللعلم والدي مرتبه ربع مرتب جوزي وعلمنا تعليم عالي وعيشنا ملكات وجهزنا احسن جهاز بمرتبه الصغير ده انا مش ماديه بس ساعات بتصعب عليا نفسي لما يكون نفسي انا واولادي في حاجه وماقد ش اجيبها واشوفهم هما آخذين حقنا وعايشين بترف واحنا مش لاقيين ياريت نصيحه بدون تجريح