قررت أن أصلح أخوات زوجي وزوجاتهم في بيتي، هل تصرفي صحيح؟

طاب وقتكم أعضاء الموقع والمشرفين الكرام عاوزة آخد رأيكم بحاجة، من فترة قريبة كم شهر كدا حصلت مشاكل بين جوزي وأخواتو بسبب زوجاتهم، هم متفقات علي لأنهم بيقربو بعض، وأنا الكبيرة فيهم وجوزي الكبير، والأمر تطور أوي لحد أن أخواتو صاروا يؤذوه لجوزي بقلة احترامهم ليه وإيذاؤه في عمله، وأنا عارفة إني دا كلو بسبب النسوان، لأنهم قبل ما يحصل حاجة بيني وبينهم كانو كويسين مع أخوهم وما فيش مشكلة، بس دا كلو تحريض من نسوانهم، إحنا عايشين ببلد غير بلدنا، ودي الوقت حماتي وعمي جايين زيارة لعندنا، وعمي قعد يقول لجوزي أنت واخواتك كل واحد لاحق مراتو وما بيكلمش أخوه عشانها، وأنا ربنا يشهد ولا بعمري حرضت جوزي على خواتو أو طلبت منه ما يكلمهومش، بس هو بقى يتدايق منهم لوحدو من كتر التصرفات السيئة الي بيقابلوه فيها، المهم أنا عشان بحب جوزي وبخاف ربنا وعشان حماتي وعمي ما يرجعوش بلدهم زعلانين قررت أعمل عزومة للصلح عندي في البيت، واتصلت فيهم وحدة وحدة وعزمتهم، وجوزي اتصل باخواتو، مع إننا ما غلطناش مع حد، بس عايزة جوزي يرتاح من طرف خواتو، ويبقى راسو مرفوع من تصرفاتي، وهم ليهم ربنا بيحاسبهم، لكن خايفة يكون تصرفي غلط، وإني بكون كدا بقلل من قيمة نفسي وقيمة جوزي، وخايفة يفهموها إني أنا برمي نفسي عليهم، مع إني حاسة نفسي من جوا إني مبسوطة كدا، علأقل عشان أشيل اللوم عن نفسي، إنتو رأيكو إيه؟