أريد رضاهما معاً ولكن أمي لا تفهم هذا

السلام عليكم ... عندي استفسار متعبني مرة ... ١- اذا صارت مشكلة بين امي و ابويا بصرف النظر مين الغطان فيهم ، لكن بالنهاية اخواتي واخواني واقفين مع امي لدرجة اخويا يستقوي على ابويا و التاني يتكلم معاه ويطردو من الغرفة مهما كان السبب و امي بدل ماتقولهم عيب ومايصير وتوضح لهم الغلط الا واقفة بصفهم وانو الشيء دا صح و واحد من اخواني مايكلم ابويا بيكمل سنتين وصار يحقد عليه و يكرهو و اوقات يشتمو ... والام تعزز للسلوك الخطأ وتكبر لهم راسهم ... ٢- امي وابويا اضاربو واخواني واخواتي واقفين مع امي ونا موقفي حيادي لا مع امي و لا مع ابويا ولا احب ادخل بمشاكلهم ... طبعاً امي لمن ماشافت مني اي ردت فعل فهمت اني واقفه ضدها واني بصف ابويا والبقية بصفها ... ونا شرحت لها وقلتلها شيء بديهي اخد موقف حيادي بالنهاية انتي امي و هو ابويا وبدي رضاكم الاثنين مو عشان ما اعطيت اي ردت فعل او اي انطباع بمعنى انا واقفة معاه لكن مع الاسف مافي فايدة اختي الكبيرة تعاملني كاني عدوة لها ، ابويا يفضلني على الكل و امي تفضل اختي الكبيرة على الكل وبعد المشكلة ابويا زعل وغضب وقال لاخواني فلان طردني و فلان حاول يمد يدو عليا و فلانه طولت لسانها عليا انا مو ناسي الا انتو عملتوه كبرتكم وتعبت عليكم بالنهاية تعملو كدا معايه ... فاختي كاسبه امي بصفها كل شيء تقولو حتى لو غلط امي تتطبقو كلمة اختي لو ايش هيا الا صح ، امي شايفة محد يحبها ويخاف عليها اكثر من اختي وقالتلي محد دافع عني الا اختك ، قلتلها والمطلوب مني يعني اطول لساني واشتم ابويا ولا اضربو ولا ايش بالضبط !!!!!!!!!!! ابويا بعد دا كلو اتجنب كل البيت معد صار يطلب من احد شيء غيري انا ، فطبعاً اختي على طول قالت لامي و لاخواني و الاهل كلهم انو انا محد يتكلم معايه بالمرة وبحدود واي شيء انا اقولو لشغالة ولا لاي مخلوق تجو وتبلغوني لاني انا بنقل كل شيء بيصير لابويا زي كاني جاسوسة ليه ... وامي مرسلة رسالة للشغالة بالواتس تقولها لاتكلمي فلانه عشان بتوصل الكلام لابوها ... اقسم بالله صدمتني الشغالة وجرحتني بكلامها لمن عرفت انو امي تقول كدا للناس الا حوليا وتوصيهم حتى الشغالة ، يعني حتى الشغالة جاتها الحركة دي صعبة امك وقريبة منك وقالت عنك كدا ايش بقت للغريب !!!!!!! وصرت كل ماخرج من غرفتي اختي تجي ورايا تسمع ايش اقول للشغالة او تنتظر لين اخرج و تكلمها تقولها ايش تبا منك !!!! مو عيشة دي صرت محاسبة بكلامي وخرجاتي و مو اي احد اكلمو معد عندي ثقة في احد وصرت اتجنبهم .... وعلى ايش تفاهه حتى جدتي ام ابويا قلبو عليها وهيا ست عجوزة كبيرة بالسن ... ابويا طلب مني اكل وعملتو " شوفو هيا بصفو " طلب اخدم جدتي امو اساعدها البسها افطرها اعطيها ادويتها وعملت الا يباه " برضو شوفو هيا بصفو " ومرة بابا دعا لي وقالي يابنتي روحي ربي يرضى عليكي مرتين والله مايرضى حتى انو يثقل عليا بطلباته تقوم امي تقولي روحي خدي الرضى حق ابوكي منتي تبعو .... اقسم بالله صرت اشوفهم زي المرضى اختي و اخواني اي شيء يشكو فيه اي كلمة اتكلمها يعني اقصدهم ... واختي زي الا تكذب الكذبه وتصدقها وتروح تعبي راس امي بيها وامي تصدق كل شيء ومسسسستحيل تكذبها و لو اكلمها واتناقش معاها ماترضى احد يتكلم عن اختي الكبيرة بكلمة على طول تهدد لا تخليني اغضب عليكي !!!!!! واخواني بدت تعبي راسهم كمان ضدي ومحد بدو يكلمني الكل يتجنبني ... انا اعرف انو رضا الله من رضا الوالدين ونا بدي رضاهم الاثنين لكن مع الاسف امي ماتبا تفهم / امي و اختي اتهموني وظلموني واتكلمو عليا عند اقرب الناس ليا من اهلي والكل صار يتجنبني بسبب كلامهم والله جرح مانساه منهم / الام الصح ماتصلح الخطا بخطا / والا زعلني اكتر يتكلمو من ورايا وقدامي ينافقو ماكانهم قالو حاجة صرت اشوف وجه امي ونفسي اقولها يكفي كذب وخداع ونفاق كل شيء بتقوله بيوصلني لا تتصنعو قدامي المحبة لا تزيفو كلامكم قدامي انا كاشفتكم بس ساكته ... وصرت بالوقت الا هما يصحو فيه انا اروح انام ولمن ينامو انا اصحى من نومي عشان مابدي احتك باحد فيهم ولا اشوف النفاق الا بيسوه مابدي مشاكل تعبت نفسيتي ، فكرة انك منبوذة من الكل و مظلومة و محد يكلمك و دايماً لوحدك وانو مافي احد تتكلمي معاه ومافي احد تثقي فيه متعبه جداً وانا حاولت اتكلم واشرح واناقش لكن مافي اي امل منهم ، صرت اصلي واقعد على سجادتي واتكلم مع ربي وابكي كل يوم وادعي ، وصرت اخاف من بكرة كل يوم اقول ايش فيه مصيبة او مشكلة بيركبوها عليا ايش الصدمة الا حشوفها بكرة منهم واحس قلب قابض منهم حتى اختي الصغيرة اخر العنقود حاطينها جاسوسة عليا متى نامت متى اكلت ايش بتسوي بغرفتها مين تكلم وعمرها ١٤ سنة وبيحاولو يخلوها تكرهني واصلاً صارت كمان تكره ابويا وتعيب فيه ... وطبعاً لو قلت لابويا كل دا الا بيصير بيقلب الدنيا عليهم صعب مرة " اختي الكبيرة و اخواني خسرو ابويا " وصارو بس تفكيرهم كيف ينتقمو وحاقدين عليه ... اختي ٣٠ سنة و اخويا التاني ٢٩ سنة والا بعدو ٢٦ سنة ونا ٢٤ سنة و اصغر وحدة ١٤ سنة والله انا اشوف محد بيخرب البيت ويشتتنا غير اختي الكبيرة بدل ماتصلح الوضع تقول لامي اخرجي خدي عفشك روحي عند امك وخالي ونقعد عندهم / ٣٠ سنة عمرها وماتزوجت وتقولك السبب ابويا " الزواج قسمه ونصيب من ربي ولو تنطبق السماء و الارض ولكي نصيب فشيء حتاخدية " لكن ماتبا تفهم ، كملي دراستك ماتبا مالها مزاج ، اتوظفي مابدي تبا تتوظف في اماكن فيها اختلاط وابويا معارض فكرة الاختلاط بس لكن ما منعها من الوظيفة وبرضو تقول كل شيء سيء بسبب ابويا و ابوكم مريض / امي واقفة معاها بكل شيء لدرجة انا تشك فيا وتقولها ترى بنتك تكلم شباب و لا تروح تحضر دورات وتقابل من وراكي عشان تبا اجلس بالبيت لا اشتغل ولا اكمل دراستي ... اعطوني حل للجنان دا ترى واللهي تعبت نفسياً النكبة اني خريجة رياض اطفال واعرف كل شيء يخص الاسرة وطريقة الحل و التعامل بس على قد ماحاولت اني اصحح و اعالج مافي فايدة والله ولا الاحزاب والله ادعي ربي يعتقني ويجيب نصيبي واطلع من البيت دا !!!! انا غلطانه في شيء ، غلطت اني ماوقفت مع امي زي اخواني !!!