لازم تتعودي تقعدي بالبيت وانا ساكن بعمارة العيلة

السلام عليكم انا بنت باواخر العشرينات ،، متعلمة وبشتغل الحمدلله ،، من فترة اتقدم شخص لخطبتي بطريقة تقليدية وجلسنا مع بعض عدة جلسات بمعرفة الاهل واهالينا تعرفو على بعض و زارو بعض اكتر من مرة ((وقرانا فاتحتنا )) ،، الشب كان فيه معظم الصفات الي ببحث عنها بشريك الحياة ،، بس كانت تواجهنا مشكلة واحدة ،، انا بنت شخصيتي مستقلة ومعتمدة على نفسي من عمر ال18 وبشتغل من وقتها وبصرف على نفسي مع انو وضع اهلي جيد والحمدلله ،،، وشغلي شي جدا مهم في حياتي وتعبت كتير لوصلت للمنصب الي انا فيه ،، المهم في بداية التعارف الشب طلب مني اترك شغلي لانو بدو زوجتو تكون متفرغة الو وللبيت والولاد ولانو وضعو المادي جيد ومش بحاجة اني اشتغل،،، انا لاني شارية الشب وفعلا حابة احط الاولوية لبيتي ما رفضت وتقبلت الموضوع بعد ما تناقشنا فيه ،، بعدها صار يدقق ع موضوع طلعاتي مع صحباتي و ع التاخير وانو لازم اخد اذنو بكل طلعة وانا كنت قدر المستطاع متفهمة واحتويت الموضوع قد ما بقدر و صرت اخفف طلعات واخد اذنو قبل اي مشوار ،، ما كان في بينا مشاكل غير على هادي الامور ،، كل شي كان بينا زابط وكنا متفاهمين ومنسجمين جدا لغاية في يوم من الايام ،، كنا بنحكي عادي ع التلفون ورجع انفتح موضوع الطلعات وخبرني انو زهق قد ما بنحكي بالموضوع وانا طلبت منو انو نوصل لاتفاق معين لحتى نخفف المشاكل ،، مثل انو نتفق اني اطلع بس مرتين او 3 مرات بالاسبوع وانا وقتها بقدر ازبط كل اموري وحتى الاشياء الي بضطر اني اطلع واشتريها لنفسي خلال الفترة الي بسمحلي اطلع فيها ،، بس هو ما كان متفهم ابدا وعصب وحكالي انا ما بناسبني هيك وانتي لازم تتعودي تقعدي بالبيت وانا ساكن بعمارة العيلة وما بدي وجع راس بكرة الكل يصير يحكيلي مرتك طلعت وتاخرت او كتير بتطلع !!!! مع انو لما خبرني انو رح يسكن تحت اهلو،،، حكتلو انا بدي توعدني بالاستقلالية و الخصوصية باول جلسة جلسنا فيها ووعدني بهالشي !!! المهم باخر المكالمة تصافينا لاني ما حبيت اجادلو وقتها وما ناقشت كتير وتقبلت كلامو وبعدها سكرنا الخط بعد بساعتين رن بحكيلي انو انا منزعج لانو كتير بنتقاتل ع مواضيع مش مستاهلة وانو حاسس انو احنا تسرعنا ولازم نعطي حالنا فرصة ونفكر اكتر وانو رح يرجع يفكر بموضوع الارتباط كلو و يستخير 3 ايام وبعدها يقرر شو بدو يعمل !!!انا حكتلو مفترض نقعد قبل ونتناقش وبعدها بتفكر ،، رفض الموضوع وسكرنا الخط وبنفس اليوم المسا ببعتلي مسج انو انا استخرت وما ارتحت والله مو كاتب نصيب وهلأ ابوي بحكي مع ابوكي وبنهي الموضوع !!!!! حاولت ارن عليه مارد ،، طلبت منو بمسج يرد علي ويكون زلمة ويواجهني ويفهمني السبب رفض وعملي بلوك !!! وتاني يوم بعتلي مسج انو خبري ابوكي باللي صار !! حتى ما تنازل هو او احد من اهلو يحكو مع اهلي حسب الاصول ويعتذرو !!!!!!! كان الي صار صدمة بالنسبة الي ،، لانو الشب كان محترم وملتزم ومتفهم وكنا متفاهمين ومتفقين على كل شي ،، وكلامو وتصرفاتو وشخصيتو معي كلها بتوحي بانو زلمة وبعرف يفكر ويتصرف قعدت اسبوع تقريبا بحالة اكتئاب وحزن ،، و عزت علي كرامتي كيف انو رمى كل شي ودار ضهرو وما كلف خاطرو حتى يرفع تلفون ويفهمني ويعتذر مني او حتى يعتذر من اهلي !! بعرف انو الي صار خير الي وانو هالشخص جبان وما بقدر يواجه حدا وانو اضعف من انو يتحمل مسؤولية قرارو وشخص متل هيك ما بصلح يكون زوج تعتمدي عليه ،،، بس انا مش قادرة اتخطى الموضوع ،، الطريقة الي تركني فيها كل ما بتذكر الي صار بحس حالي رح اموت من الطريقة الي تعامل معي فيها وكلها قلة دين واحترام واخلاق ساعدوني كيف اتصرف ؟؟ شو اعمل ؟؟ كيف اتخلص من هاد التفكير ؟؟كنت متخيلة مع الوقت رح يحس بقيمتي وباللي عملو و ع الاقل يحكي معي ويعتذرلي !! بس هاد ما صار والموضوع صارلو شهر وانا متاكدة انو كمل حياتو هلا عادي وعايش ولا كانو الي حق عليه قدام ربنا وانو ظلمني بطريقة تصرفو هادي انا الحمدلله قوية وما توقفت حياتي بسببو لسا بشتغل وبطلع وبشوف الناس وبعمل كل شي بحبو وببسطني بس لسا بيجي ببالي الي صار ومش عارفة كيف اسكر هالموضوع ويبطل يجي ببالي ؟؟؟؟ وانسى الي صار واتخطاه