أهل زوجي يريدون ختان ابنتي بالقوة

السلام عليكم، أهل زوجي يريدون ختان ابنتي، فهل يجب موافقة كلا الوالدين على الختان؟ مشكلتي اني مقيمه في بيت عيلة جوزي وهو مسافر للعمل واهله متدخلين في حياتي انا واولادي اكثر من اللازم وجوزي شخصيته ضعيفه معاهم خصوصا اخته الكبيره اللي بتدخل حتى في لبسي وعملت معايا مشاكل كتير وطبعا نص كلامها كدب وتأليف وجوزي مبيقدرش على زعلها نهائي عشان هي اللي مربياه

وانا بعدي حاجات كتير عشان الحياه تمشي لدرجة انه خلاني لازم استاذن منها عشان اخرج من البيت خطوه واحده وقالي معلش زي والدتك وبعدين بدأت تزعقلي على لبس بنتي الكبيره عشان بتلبس بنطلونات ضيقه زي صحباتها في السن ده وهي اصلا لسه طفله ١٦ سنه وطبعا رفضت اجبر بنتي على لبس معين لكن سايستها وقلتلها لما تكبر شويه هخليها تلبس واسع ودلوقتي طلعتلي بموضوع جديد عايزه تختن البنت

وانا رفضت وكلمت جوزي وحاول يقنعها لكن هي مصممه تختن البنت زي ما عملت في بناتها حاولت افهمها مفيش فايده وكمان استغلت اني كنت بزور ابن اختي في المستشفى وطلعت شقتي هي وبنتها ومسكو البنت ونيموها في الارض وكشفت عليها بالعافيه وبنتها مكتفه بنتي وكانت مرعوبه وبتعيط ولما اتخانقت معاها قالتلي بنتك لازم تطاهر وشفرتها متحدده من فوق الهدوم ولقيتها مصوره البنت من تحت وورتني الصوره وعشان اقفل الموضوع خدت البنت للدكتوره وكشفت عليها وقالت انها ممكن تعملها تجميل للشفرتين عشان كبار شويه

لكن انا رفضت عشان خفت عليها وقلت لجوزي الكلام ده فقعد يكلمني بالدين ويقول الختان سنه للست والراجل وقلتله انت موافق انها تعمل كده في بنتنا قالي انا هتصرف وكالعاده معملش حاجه وكمان بدأ يقتنع بكلام اخواته وبقيت لوحدي ضدهم كلهم وبيضغطو عليا عشان ينفذو عاداتهم وخلاص وبقيت حاسه انهم هيختنو البنت من ورايا او حتى هياخدوها غصب عني ومش هقدر عليهم عشان هم جبروت وعارفين ان مفيش حد معايا يوقفهم عند حدهم وجوزي خاضع ليهم ومش عارفه اتصرف ازاي