أخي طردني من البيت لأني لم أعد أصرف عليه

صباح الخير، أخي طردني من البيت لأني لم أعد أصرف عليه، كل عام وأنتم بخير، أنا آنسة أبلغ من العمر 39 سنة، اتعرضت لصعوبات كتير ف حياتي بدءاً من التعامل مع حالات نفسية من أقرب الناس ليا ومعاملة اضطهاد من زوجة أخ وصلت لطردي من بيت أخويا، أنا مش بقول إني ملاك بس إللي شوفته مكانش قليل

إشتغلت في شركة بريطانية، ونظراً لقلة خبرتي وتسرعي وقعت في عدة مشاكل مالية وصلت إلى عدة ديون، وللأسف وقعت في بلاء عظيم من 4 سنين وهو شخص كان بيدعي إنه بيحبني وطلع شيطان بمعنى الكلمة، عشان أكون صادقة معاكم أنا معرفش مخي كان فين ساعتها

أنا الحمد لله كنت في ضهر أخويا في ماديات البيت عشان كنت قاعدة فيه، أنا وماما وأخويا كان معتبرني ماكينة فلوس بمعنى الكلمة، دة غير تعامل أمي الجاف والمادي، وأعتقد إن ده كان سبب رئيسي فإن الشخص ده يضحك عليا

حصلت مشكلة علاقة غير كاملة بيني وبين الشخص ده وتقدروا تقولوا إنه بيعبد الفلوس حرفياً وكان بيهددني، بعد ما كنت الحمد لله عندي عربية وإقامة في دولة خليجية وبشتغل إضافي وبساعد أي حد محتاج إلا إن الشخص ده دمرني حرفياً من ناحية إنه دخلني في ديون وابتزاز ومشاكل مادية، تشويه سمعتي عند نسايبنا وقرايبنا بالباطل، وأخواتي طبعاً مش طايقين سيرتي حرفياً

مخبيش عليكم إن كلمات الحسد كانت بتتقال ليا عيني عينك في وشي، بس أنا حرفياً غرست في الوحل من أكتر من أربع سنين لدرجة أخويا كان في البلد العربي ده وأنا ف مصر ونزل وإتعدى عليا بالضرب في بلدي الأم وكان فاكر إنه كده بيربيني

طبعاً انا اتهنت كتير بسبب الديون وأخواتي مش في دماغهم غير إني أراعي أمي وفي نفس الوقت هما شايفين إني جبتلهم العار، مرت أربع سنين على الموضوع ده ومن ضمن المشاكل إللي واجهتها هي مشكلة إيصال أمانة في مصر إتاخد عليا بسبب إني حاولت أسد الديون دي عن طريق شخص تاني وأخدت منه تعهدات مالية وكان مفروض أدخل معاه في شراكة ولما هددته باللجوء للقضاء برضه راح اشتكى عليا لأخويا، يعني نصاب وبجح، علماً بأني ياما شوفت ظلم على إيد أخويا بسبب زوجته وحماه وأخت زوجته

حالياً اضطررت أعين شركة تمريض لرعاية أمي واضطررت أرجع للبلد العربي تاني عشان أرجع فلوس الناس، مع العلم إنه أمي متعلقة بيا بشكل كبير بس هي فاهمة وضعي، وطبعاً مع علامات كبر السن بدو أخواتي يحسوا بالمعاناة إللي كنت فيها أيام ما كنت بعالج أمي من ورم الحمد لله هي خفت منه

دلوقت أنا الحمد لله حصلت شغل في البلد العربي وبديت أستقر لكن أخواتي للأسف قاطعوني مع العلم إنه محدش فيهم فكر يساعدني في حل المشكلة بتاعة الديون، وطبعاً مقاطعة حتى ف العيد، وأحلف إنه كلهم حرفياً مكانوش بيرفعوا تلفون لأمي إلا فين وفين

أنا حاسة إني منبوذة وعايزة أوقف على رجلي من تاني وأكون أحسن من الأول وأخواتي مش شايفين غير إني استغفلتهم وسافرت من غير معرفتهم، مع العلم إنهم شافوا قذارات تعامل مرات أخويا ومكنش بيرمشلهم جفن، وسمعوا إهاناتي وطردي المسبق من بيت أخويا

أنا عارفة إني غلطت لما سافرت بدون علمهم بس أخويا ماخدها حجة إنه ميخلينيش أسافر بسبب العلاقة القديمة، لدرجة كان بيفتح كاميرا مع أخواتي وبيتفاخر إنه ضربني وبيربيني، أنا بصلي والحمد لله رجعت لربنا وتوبت من القرف القديم ولولا خوفي من ربنا كان زماني منتحرة من زمان

الكل أجمع على إنهم مش حينفعوني ومش عايزيني غير جليسة لأمي، أنا معنديش مانع أراعي أمي بس بالعقل، إذا كان أخويا فب يوم وليلة لمجرد إنه استلم مرتب أعلى طردني برا بيته وقالي يلا على بلدك، أنا أضمن منين لو اتجوزت زوجي حيعمل ايه

سؤالي دلوقت، هل أستمر في طريقي وشغلي الحلال وأنزل لأمي أجازات ولا أرجع لبلدي الي مش حعرف أسد فيها الدين مع العلم إن الوضع الصحي لأمي ممتاز الحمد لله