نصيحتي أن تحكمي عقلك قبل قلبك

اكتب موضوعى اليوم كى يتعلم الجميع من اخطائى ،انا واحدة عندى ٢٥سنة مطلقة، اتربيت ببيت عائلة محافظة ومستوى اجتماعى جيد جدا والحمد لله طول عمرى الناس بتقول عليا من صغرى انى هادية ومؤدبة وبسمع الكلام وشاطرة فى الدراسة ومسالمة جدا ومش بعمل مشاكل مع حد ابدا دايما فى حالى ودايما كنت متربية ان مفيش اختلاط بين الولد والبنت فعمرى ما صاحبت ولاد ابدا ولا مجرد زمالة حتى . المهم كبرت ودخلت الجامعة وكليتى من افضل الكليات وكنت شاطرة فيها واتخرجت منها بتقدير عالى جدا ،واشتغلت الحمد لله علطول ، اول ايام شغلى كنت بتفرج على الناس من حولياواشوف الانفتاح اللى عايشين فيه وبتضايق لما بشوف فى بنات بتتصرف تصرفات غير لائقة مع الولاد .المهم كنت فى حالى بعمل شغلى كل يوم واروح وكنت بحاول انهم ما ياثروش عليا. الحمد لله ربنا انعم عليا بنعمة الجمال فكان يتقدم ليا ناس كتير خاصة بعد ذهابى للعم،كان يرانى ناس كثيرة هناك ويعجبو بى ويتقدمولى بطريقة رسمية بس ما كانش بيحصل نصيب ،كان بيبقى فى عدم توافق فى حاجة دايما اما فى المستوى المادى او التعليمى او الاجتماعى. كانو بيلاقو رفض من اهلى لانهم غير مناسبين واهلى يتمنون لى الافضل.المهم كل ده مر فى شهورى الاولى من العمل الى ان جاء وتقدم لى واحد ايضا بطريقة رسمية فى البيت وكان شكلا مقبول جدا ومستواه الاجتماعى والمادى جيد جدا وفى الكلام لن يذكر لنا تعليمه ولن اعرف كيف نسينا ان نساله عنه.يمكن علشان النصيب.المهم كان جاهز ويبدو فى الظاهر لنا انه جيد ومناسب ويوجد توافق بيننا وبينه فسال والدى عنه وعن عائلته فقال الناس انهم غامضين شوية وانهم فى حالهم ومحترمين .المهم قعدنا واتفقنا على كل حاجة واتفقنا ايضا على شراء متطلبات الزواج من مسئول عن الاجهزة الكهربائية مثلا ومن مسئول عن العفش وهكذا واتفقنا وبارك لنا العائلتان ،وانا كنت معرفهوش بس بقول فى نفسى شكله طيب ومؤدب ،علما انى كنت ما بعرفش احكم على الناس وماليش تجارب او خبرة فى الحياه ومااتعاملتش كتير مع الناس اهلى كانو مقفلين عليا ومش بيتركونى اخرج لوحدى الا للجامعة او العمل لانهم بيخافو عليا جدا .المهم تمت الخطبة وانا كنت فرحانة وبرتب لحياتى زى اى بنت بتفرح ونفسها يكون لها بيت واولاد.بدا يتكلم معايا فى التليفون تانى يوم الخطوبة وكان ساحرنى بكلامه وبيقولى كلام حلو اوى وبيدلعنى وبيقولى انه معجب بيا اوى ولما شافنى عجبته اوى وانه بيحبنى وفرحان بيا.المهم فضل ورايا لحد ما حبيييييته جدا واتعلقت بيه جدااااااا.وبعدين بدا فى المشاكل معايا باتهامى بانى مش امينةة على الاسرار وبيشك من. غير دليل انى بحكى للناس عن الكلام اللى بيتقال والاسرار اللى بيننا.وانا ادافع عن نفسى ،كل ده غير انى كنت عارفة ان فى واحدة بتسلطه عليا تبقاله زميلة فى الشغل بس هى اد والدتى وهو متعلق بيها وبيسمع كلامها وهى ما كانتش بتحبنى وكانت بتغير عليه منى كانها حماتى وعملت مواقف كتيييييييييير سيئة توضح انها عايزة توقع وتفرق بيننا ، المهم انه كان بيسمع منها. ويجى يتهمنى وبيتاثر بكلامها ويتخانق معايا وانا مش قادرة استوعب اللى بيحصل ازاى يسمحلها اصلا تتدخل بينا كدة وازاى يعد معاها ويديها فرصة يسمعها بتتكلم عليا فيها،والله قالت عليا كل حاجة وحشة تتقال فى حق البنت وظلمتنى كتيييير وقهرتنى بس انا كنت مش برضى اتخانق معاه لما يجى يتهمنى علشان مخسرهوش وابقى عملتلها اللى هى عايزاه.والله العظيم استحملت كتيييير اللى محدش يقدر يستحمله،ابشع احساس فى الدنيا فعلا الظلم،اصلا الست دى سمعتها وحشة وكل الناس فى العمل بتتكلم عليها وبتقول انها شيطانة ومحدش بيحبها ،وناس كتييير حظرتنى من التعامل معاها اول ما عرفو انى اتخطبتله علشان عارفين قربهم من بعض،وانها هتحاول توقع بيننا.بس انا مكنتش بصدق وبقول مش هظلمها طالما ماشوفتش بعينى مش هحكم.بس كل كلامهم طلع صحوكمان طلع ولاحاجة بالنسبة للى شوفته.الست دى طلعت معروفة انها خرابة بيوت وخطفت راجل من مراته واتجوزته وخليته يطلقها.بس طبعا كل ده انا ما عرفوش غير بعد طلاقى منه ،لو كنت اعرف كل ده كنت بعدت عن كل المشاكل دى. المهم مرت خطوبتنا واحنا على هذا الحال وانا على امل ان الحق هيظهر وانه حاله هيتعدل وهيبطل بعدالجواز بعد ما يعرفنى انى مستحيل اعمل الحاجات اللى بيتهمنى فيها ،كان بيحكيلها اللى بيتقال بيننا فتلف وتقوله انها سمعت الكلام ده من فلان اللى عندنا فى الشغل ،فيجى يمسك فيا ويتخانق وهكذا ده مثال بسيط اللى كان قاهرنى انه هو الخائن اللى بيطلع اسرارنا ليها وكمان يتهمنى انى انا اللى بعمل كدة.المهم علشان ده النصيب انا كنت ساكتة على كل الظلم فى حق نفسى،انا ندمانة اشد الندم انى ظلمت نفسى كدة،المهم قبل الفرح بفترة بسيطة غير كل كلامه واتفاقاته مع والدى بخصوص شراء اللوازم وقال على حاجات كتير ماقولتش!! وانا من غبائى طلبت من والدى يدفع مكانه و يسامحه على اخلافه للوعود وقولتله معلش هو اتزنق جامد فى الفلوس ،وده طبعا من تمثيله عليا انه مزنوق ،اكتشفت بعدين انه مش مزنوق ومعاه ودائع بالبنك بس بعد الجواز طبعا اكتشفت متاخر اوى.المهم والدى شافنى متعلقة بيه اوى وبعد الحاحى وافق ،هتصدقو لو قولت انه انا دفعت اكتر من نص مصارريف الجوازة كلها دفعت معاه فى كل حاجة حتى مخدة السرير دفعنى فيها!! المهم ،كله نصيب تمت الجوازة وقضينا اول شهر كويسين وفجاة اتغير وبان على حقيقته معايا،انا استحملت معاه كتير فى الخطوبة علشان كنت فاكراه بيحبنى،لكن اكتشفت انه انانى مش بيحب حد خالص وعنده الناس كلها وحشين وهو احسن واحد فى الدنيا،علطول تريقة عليا وانتقاد ومفيش حاجة بترضى ،يشهد ربنا كنت بتعب اد ايه فى البيت خاصة انى كنت بشتغل بس كنت بعرف انظم وقتى واحضر الاكل قبل ما اننزل الشغل واجى اسخن وناكل وتنضيف البيت ونظافتى الشخصية واهتمامى بنفسى كنت بحاول اخلى البيت جنة،هو ما قدرش واى تصرف منى مايعجبوش حتى لو تافه جدا يزعق ويغلط فيا و فى اهلى بعد اللى عملوه معاه و بعد مساعدتهم ليه يشتم عليهم ويغلط فيهم ويضربنى،اخر حاجة كنت اتصورها الضرب،كان بيضربنى ومش اى ضرب لا ضرب تعذيب لمدة ساعات ،ده غير اثاره اللى ورمت وشوهت جسمى،ومكنتش بشتكي لحد من ضربى ،وكلامه مع الستات فى التليفون اللى اشتريتهوله هدية فى الخطوبة من غير مناسبة لما حسيت انه عايز يجيب موبايل بس مزنوق عشان مصاريف الزواج،اخرتها بيخونى عليه،وبخله واخذه مرتبى بحجة ديونه اللى اكتشفت انها مفيش وكمان عنده مكانها ودايع وشهادات فى البنك!! .ااااااه من اللى اتحملته كل ده بدافع الحب،كان بيستغل انى بحبه وعارف انى مقدرش استغنى عنه،فقال يمحى شخصيتى ويودى ويجيب فيا ويعيش مرتاح من غير ما يعملى حساب ولا يخاف على مشاعرى.المهم من كتر اتهاماته ليا من الخطوبة انى بحكى الاسرار،خلانى اشك فى نفسى وفى كل زمايلى فى الشغل مع انى والله مش بحكيلهم حاجة بس بقيت انطوائية جدا وبعدت عن كل الناس وعن اصحابى علشانه،اكتشفت انه كان عايز كدة علشان يقطعنى من كل الناس ويكره الناس فيا ويمتلكنى وابقى ليه لوحده ،يضربنى ويذلنى ويعاملنى زى الخدامة وعايز يبيع شبكتى وكان بياخد كل مرتبى ويعطينى مصروفى زى الاطفال.ومش عايز يخلف خايف من المسئولية..انا جيت فى الاخر فاااااااااااااض بيا وتعبت وعلطول متوترة ومريضة بسببه،اخر مرة ضربنى فيها كلمت اهلى جاءو واخذونى وطلقونى منه بعد ٣شهور جواز وعذاب وجحيم وتعذيب نفسى وجسدى.بعد التجربة دى انا عشت طبعا شهور منهارة بس محدش بيتعلم ببلاش،اتعلمت ان كرامتى اهم حاجة فى حياتى،وان مفيش حب بدون احترام ومودةو رحمة ،من غير دول يبقى استعباد مش حب،الحمد للهه انى اتطلقت بدرى وبدون اطفال، ربنا رحمنى منه ،لقانى راضية الظلم لنفسى بس هو كبير ورحمته واسعة فلم يرضى لى بالظلم اكتر من هكذا،وانا عند حسن ظنى بربنا وواثقة ثقة كبيرة جدا انه مش هيسيبلى حقى منه ومن زميلته اللى ظلمتنى ظلم قاسى،وبقول دايما حسبى الله ونعم الوكيل فيهم.انا عايزة اوجه رسالة لكل البنات تفكر كويس قبل ما ترتبط وتتعلق بشخص هل هو جدير بالثقة وجدير بالحب والتعلق والمشاعر اللى هتديهاله،ام لا،علشان وقت ما هتحبى او هتتعلقى مش هتشوفى صح ولا هتعرفى تميزى اذا كان بيحبك ولا بيستضعفك ويستغلك.فكرى كويس واحكمى بعقلك قبل قلبك ،ما تغلطوش غلطتى ،حبى وتعلقى بيه كان بيخلينى تايهة ومش عارفة اوزن الامور،وكمان ماتغلطوش غلطتى انى كنت بخبى عن اهلى وبدارى عليه،كان بيتفق معايا على كدة ان اهلنا ماندخلهمش ،بس طلع بيضحك عليا وحاكى لامه على تفاصيل التفاصيل معنا وكمان بيشتكيلهم منى.ارجوكم انشروا رسالتى كى تكون توعية لكل البنات وبالذات اللى مش عندهم خبرة زيى فى الحياه.سامحونى على الاطالة لكنى حبيت الافادة لكم يا اخواتى.