ضعف شخصيته أمام أهله أدخلتني بدوامه كبيرة

السلام عليكم ..انا واحدة متزوجة حديثا من شهر ، بلاحظ على جوزى حاجات غريبة انه لما يرن عليه اهله بالذات امه ياخد التليفون بعيد عنى ويكلمها ويوطى صوته ولمدة نصف ساعة مثلا ولو عديت فى المكان اللى بيتكلم فيه عشان اجيب غرض منه يشاورلى ويقولى فى حاجة.انا مش عارفة ليه بيعتبرنى غريبة وبيحسسنى انه فى اسرار بعيدة عنى فببقى متضايقة جدا من الطريقة دى، ده غير مكالماته بالساعة والساعتين مع زميلة له فى الشغل اكبر منه ب ١٨سنة كل يوم يروح وحكى معاها بالساعة والساعتين ويبقى بردو بيتكلم فى مكان تانى ويوطى صوته جدا ويبقى حريص انى ما اسمعوش. مرة كنت فى المطبخ بعمل اكل و حطيت الاكل على النار ودخلت عليه القوضة لقيته نايم على السرير وبيتكلم فى التليفون بميوعة جدا روحت قعدت جنبه عشان اشوف اخرته ايه كمل عادى لمدة ٥دقايق بس بيسمع بس وبيقول اه ،نعم ،فعلا ،من غير كلام واضح،بعد ما قفل قولتله كنت بتكلم مين قالى وانتى مالك مش هقولك انا متعودش حد يسالنى السؤال ده قولتله بس طريقة كلامك كانت فعلا غريبة ولا هتكلم والدك او والدتك او اختك بالطريقة دى دى كانت زى طريقتك وانت بتكلمنى واحنا مخطوبين بدلع كدة.قالى اعملى اللى انتى عايزاه مش هريحك ولاهقولك كنت بكلم مين .قولتله انت مش بتحبنى وبتخدعنى ده ابسط حاجة لما اسالك من حقى انك تريحنى حتى بالاجابة ،ده انت لو كنت كدبت عليا وقولتلى بكلم اختى كنت هصدقك ،لانى محتاجة اطمن بس .المهم سيبتله القوضة وروحت القوضة التانية وقعدت اعيط واصلى وادعى ربنا انه يساعدنى علشان طريقته وارتباكه كان فعلا مبين انه كان بيكلم واحدة تانية وطريقة كلامه ليها فى التليفون كانت كان فى حب بينهم .المهم انا من اليوم ده وانا مش واثقة فيه مش عارفة ايه سر مكالماته دى و طول مدةالمكالمات وصوته الواطى. بعد اليوم ده بقى يجى من الشغل يتغدى وينزل بالساعتين ويرجع على العشاء وميقوليش حتى رايح فين وهو نازل ولو سالته عادى يعنى بحق انى مراته وقاعدة معاه فى نفس البيت يبصلى بقرف وميردش وينزل مع انى مش ببقى بحقق معاه لا والله بساله بطريقة كويسة عاديةببقى عايزة اطمن عليه ،هل يعقل يعنى انى ابقى قاعدة كدة مليش لزمة مش عرفة حاجة عن جوزى،المهم هو يا اما ما يردش عليا يا اما يقولى متعودتش بردو اقول رايح فين لحد مع انى كنت بشوف والدته فى فترة خطوبتنا بتبقى عارفة عنه النفس ورايح فين وجاى منين ما بيقدرش يعمل حاجة الا لما يقولها للاسف اكتشفت انه ضعيف الشخصية جدا جدا ،يعنى لو هو بيتعامل مع حد وعارفه وعارف انه محترم وعنده اخلاق وجاء احد وقاله ان فلان ده بلا اخلاق يصدقه ويبدا يشك فيه بالرغم من انه عارفه وفى عشرة وعيش وملح بينهم فورا ينسى حاجة وينكر افضاله ومعروفه ويصدق عليه الكلام. انا بستغرب منه جدا انا عمرى ما شوفت راجل ليل ونهار يتكلم فى التليفونات ويهتم اوى بالقيل والقال ،وليل نهار والدته ترن عليه اوعلى الارضى وتسال عن تفاصيلنا وهو يحكيلها عن التقرير اليومى لدرجة انها بتعرف منه بطبخ ايه وبتتدخل فى طرق عمل الحاجات واتفاجئ انه بيشترى مثلا محسن كيك ويقولى ماما قالت حطيها فى العجين علشان بتبقى احلى بستغرب ان والدته بتتكلم معاه فى حاجات الستات وطرق عمل الاكل ، واخر حاجة كمان بتتدخل فى لبسى وعايزاه يغير استايل لبسى عشان عاجبها مع ان والله كل الناس بتمدح زوقى واختيارات لبسى وبيقولولى ان ذوقى حلو وشيك جدا واصلا والدته واخته مش بيعرفو يلبسوا شيك وذوقهم مش حلو خالص وعايزنى البس زيهم وعلى ذوقهم راح خدنى واشترالى حاجات اقنعنى انها شيك خالص وجيبتها وندمت بعد كدة علشان حسيت انهم مستواهم اقل من باقى لبسى وكذا حد يشوفنى لابساهم يقولى انت عندك حاجات احلى دول مش حلوين .انا تعبت جوزى مش عارفة اتعامل معاه، مشكلة كلامه فى التليفونات وضعف شخصيته و تحكم اهله ده غير انه علطول شايل هم مسئولية الجواز ومشيلنى الهم. غير ان كل ما نتناقش يتخانق ويزعق ويقولى مش بحب النقاش هى الكلمة بقولها مرة وحدة ومش بكررها تانى ويضرب فيا بالساعات ولما يهدا يطبطب ليا ويقولى تعالى بقى اما استمتع بيكى ويمارس معى العلاقة الحميمية ولا كان فى حاجة حصلت. انا بجد تعبانة ونفسيتى وحشة جدا مش عارفة الاقيها منين ولا منين حاسة بجوازتى دى انى دخلت دوامة مش عارفة اخرج منها. ارجووووووكم ساعدونى اعمل ايه.