مستعدة أن أبدأ حياتي معه وأراعي أطفاله

انا بنت عاديه جدا في كل حاجة . جمالي عادي او يمكن كويس وفيه ناس بتقول عليا حلوة . حقيقي مش عارفه . عاديه في لبسي و في تعاملاتي يمكن بيميزني بس اني من عيله كبيرة شويه وليها اسمها وكدا او يمكن دي نعمه ونقمة في نفس الوقت . طول عمري وانا جبانه جدا وبحب معملش مشاكل ونفسي اكون مداريه من كل الناس لغايه ما اتنيلت علي عيني وحبيت . حبيت واحد اكبر مني ب 10 سنين وانا الي حد ما صغيرة شويه نسبيا . من عيله ومحترم جدا بس مشكلته انه ارمل وعنده اطفال وعلاقته قويه جدا بعيلتي بالذات والدي وفضلت احبه بيني وبين نفسي لغايه ما في يوم اتجرأت وقولتله اني بحبه ولقيته متقبل الامر عادي جدا ومتقبل اني بحبه بس قالي انه مينفعش يقرب مني انا بالذات عشان مش عاوز يظلمني معاه و يشيلني مسئوليه بيت واطفال مع اني قولتله اني راضيه وعادي بس هوا مرضيش و كمان عشان هوا اختار ان علاقته ب اهلي اهم بكتير من واحده بتحبه . انا بالنسباله عادي بيرتاحلي بس مش بيحبني حب الارتباط وكدا ودايما بيقولي اني غاليه عنده وانه معجب بطيبتي وان علاقتي بربنا حلوة والناس بتحبني بس هوا تقيل اوي وانا مش عارفه هوا تقيل في معاملته عشان ابعد عنه ولا عشان هوا اصلا مش عاوز حد يقرب منه . المشكله اني بحبه لدرجه الجنون ونفسي اتجنبه خالص بس مش قادرة . والدي بيعتبره زي ابنه بالظبط فساعات بقول لنفسي ماهو ممكن بابا يرضي بيه عشان هوا زي ابنه بالظبط واكتر وساعات اقول لنفسي لأ بابا بيحبني انا اكتر حد في الدنيا وعمره ما هيوافق اني ابدأ حياتي مع واحد كان ليه حياه قبلي وليه منها زوجه واطفال وعاش حاجات انا معشتهاش .هوا عنده حق يخاف ؟؟وفعلا الموضوع معقد ؟؟انا مستعده بجد اني ابدأ حياتي معاه ومتحمله كافه النتايج بجد وهراعيه وهراعي ربنا في ولاده جدا . انصحوني اعمل ايه . وادعولي بالخير لاني بجد مبقتش عارفه الخير فين في قربه ولا في بعده .