موضوعة بقالب ويجب أن أنفذ تطلعات عائلتي

السلام عليكم .مشكلتي مختلفه عن المشاكل اللي هنا انا طول عمري كنت محطوطه في قالب معين ومطلوب مني انفذ كل تطلعات عيلتي اللي انا بجد بعشقهم طلعت دكتوره تلقائي من غير حتي تفكير وافكر ليه انا من يوم ما اتولدت وانا بتعامل علي اني انا دكتوره هو محدش اجبرني علي حاجه بس هما كلهم ساعات بحس بعبأ كبير عليا وان كلهم باصين ليا علي اني مكان بابا الله يرحمه ايوه انا بالنسبه ليهم مكان الاب مش مسموح ليا ان اغلط ولا افكر في حاجه بابا ماكنش هيعملها المهم اتخرجت واتجوزت والحمد لله جوزي محترم ومتفهم لطبيعه اهلي المشكله بدأت لما جوزي سافر وطبعا عاوزني معاه وانا كمان مقدرش استغني عنه ونفسي ابني يبقي جنب ابوه برضه بس اهلي مش متقبلين ده ودايما محسسني اني خيبت املهم وامل بابا لما اخدت اجازه وسافرت واني لازم اشتغل واحقق امال بابا وان بابا ماكنش هيوافق وانا نفسي ارضيهم وفي نفس الوقت برضه مش قادره ابعد عن جوزي ودلوقت هما بيقولولي ان معدتش بحبهم ولا هما فارقين معايا بس انا نفسي يفهموني