الناس تخاف من جديتي الزائدة

بنت عندي 30 سنة، مشكلتي ممكن تكون تافهة بالنسبة للناس بس حابة أسمع رأيكوا، أنا بشتغل وانسانة جادة والحقيقة إن دي المشكلة... الناس حواليا شايفين إني جديتي زايدة وإن محدش بيتجرأ يقرب مني أو يكلمني في ارتباط وجواز، بعد سنين في مكان شغلي اتعرف إني مبرتبطش وإن اللي شايف أنه عايز يرتبط بيا لازم يتقدم رسمي، المشكلة أنه انا مش شايفة نفسي جادة زيادة عن اللزوم ولا حاجة أنا عادي اللي بيكلمني برد عليه بذوق ومش بغلط في حد بس كمان مش بهزر ومش بضحك معاهم، تقريبا الناس بتشوفني نكدية أو كئيبة بس أنا عكس كدة خالص في البيت إنما أنا بخاف على نفسي وبخاف أفتح باب لكل من هب ودب.واحد زميلي من الشغل اتقدملي ومحصلش نصيب بس قالي أنه كان بقاله كثير عايز يفاتحني في انه عايز يخطبني بس كان خايف مني، وواحدة زميلتي جت قالتلي انه حد قالها قبل ما يخطب أنه كان عايز يخطبني بس خاف مني... انا مبخوفش يعني والمنطقي أنه محدش هيكلمني محترم وهضايقه يعني... تفتكروا فعلا عندي مشكلة أو تكون شخصيتي جادة زيادة عن اللزوم، وهل كل الرجالة مبتفهمش أنه احنا في الشغل شخصية وفي البيت شخصية تانية؟ أنا بصراحة معنديش استعداد اغير من نفسي في الشغل أنا شايفة إني انا صح، وبتعامل صح والمفروض أي راجل في مكان شغل يعرف أنه البنات الجادة والحادة على رأي زمايلي مش طول الوقت كدة إنما مش هتعرف تتصرف برة البيت زي جوة لأنها بتحترم نفسها...