أمنيتي أن ارتبط بطريقة شرعية

أنا عندي 30 سنة مش متجوزة، مش متدينة بشكل قوي ومقصرة في حاجات كثير، إنما نفسي طول الوقت اتجوز بطريقة شرعية جداً، يعني نفسي حد يعجب بيا يخطبني، إنما للاسف كل الناس دلوقتي بقت بترتبط الاول شوية بعدين يتخطبوا، وكل مرة أطلب كدة من المتقدم ليا، يرفض ويمشي :)الغريبة أنه المرة دي أنا سمعت كلام وحش قوي كأنه أنا ما صدقت ألاقي واحد يعجب بيا مع إنه الحمد لله ده مش حقيقي خالص، إنما أنا عندي واحد معجب بيا يبقي يتقدم لأهلي ويبقي فيه رؤية شرعية ثلاث مرات وبعد كدة خطوبة، الناس بتشوف إن البنت اللي بتفكر كدة قديمة وجاهلة وصغيرة وكلام كثير وحش.الغلط بقي صح والصح بقي غلط، حاجة غريبة لما يوصل بينا الحال أنه الصح بقي يخلي المتقدمين يطفشوا، كأني لما برفض الارتباط بعمل حاجة غلط، منهم ناس حسسوني إني غريبة جاية من كوكب تاني، مش عارفة أوصل لحلول وسطى، أنا مقتنعة برأيي وحتى لو مكنتش ملتزمة جدا فأنا عايزة جوازي يمشي بطريقة صح، بخاف على نفسي جدا من إني أحب حد بطريقة مش صح، ومش شايفة ده عيب أو غلط بس كل الناس غيري شايفينه عيب وغلط وجهل وتخلف وازاي التفكير ده يجتمع مع شخصية مثقفة ومستقلة جدا...... أنا آسفة على الإطالة.