نحن أسرة لكن لا روابط توحدنا ولا مشاعر تجمعنا

السلام عليكم / عندي مشكلة متأزمة منها من ونا صغيره للان عمري ٢٤ سنة متخرجة وتخصصي رياض اطفال ... تعبت من المشاكل بين امي و ابويا دايماً يضاربو مافي يوم يعدي بهدوء لازم مضاربات وياليت يدخلو غرفتهم ويضاربو لا قدامنا و يصرخو بأعلى صوت والله المشكلة قد ماتكون تافهه تكبر ... ابويا مقاطع اهل امي ومايطيقهم بالمرة واهل ابوه وامو مافي بيننا تواصل ولا نعرفهم بالمرة ... اعمامنا اوقات يدخلو لكن ابويا مايسمع الا كلام نفسو وراسو مهما تتكلمي مايشوف نفسو غلطان بالمرة ولا يحب يعتذر لاحد ... ولايحب احد يدخل من برا بمواضيع البيت بمعنى دي اسرار والمفروض ما تتطلع لبرا ... امي ماعندها دخل ولا وظيفة تصرف بيها على نفسها ... وابويا يقولها انا مخليكي عندي عشان اولادي وبس وهو ترى كبير داخل على الستينات ومتقاعد وحالو زي المراهقين يكلم بنات ويخرج برا اوقات يكلمهم عشان محد يسمع وكل شويا يهدد بتزوج التانية ... ويقولنا دام واقفين بصف امكم اطلعو معاها الله يردكم و اكفوني خيركم وشركم ... مفكر انو رح نساندو بغلطو ونقعد معاه عشان فلوسو ... مابدو يستوعب ولا باي طريقة انو غلطان ... وبسببهم الاثنين صرنا انا واخواني مفرقين ... اخواني الاثنين الكبار مايكلمو بعض قرابة سنة ونص او سنتين بسبب ابويا ... والان انا واختي الكبيرة مانتكلم بسبب امي ... امي تحب اختي الكبيرة وتفضلها على الكل مهما تسوي وتفرق بيني وبينها اوقات لكن هيا شايفة انو ما بتفرق بالمرة ... و لو احيكها او اقولها سر يخصني او استشيرها بشيء لازم تروح تقول لاختي الكبيرة و فوقها خالاتي وتنشر كل شيء وصرت اكتم بداخلي و ما اقولها حاجة لاني تكلمت وجربت و مشيت اكتر من مرة ومافي فايدة ... وكل مايصير شيء تقولي خليكي زي اختك سوي زيها مادرست ماستر انتي لا تتدرسي ... ماتوظفت انتي كمان كل حاجة تربطني بيها تعبت وانا اشرح هيا غير ونا غير انا ليا احتياجات غير وهيا غير شخصياتنا تختلف لكن للأسف ... كل ماسوي حاجة تفهمها على انها غيره ونا اغار من اختي الكبيرة والصغيرة الا عمرها ١٣ سنه وتعبت ونا اقولها انا طبيعتي كدا ماتبا تفهم ... دايماً تشكك فيا وفوقها صحبتي تروح تقولها ليش بنتي متعلقة فيكي و تراها تغار عليكي من اخواتها ... والله اشياء سخيفة ماتجي فبالي يفكرو فيها وياليت احد يسألني ولا يكلمني ادري بالصدفة ... امي مطلعة اختي محور الكون الطيبة الا مافي زيها بالعالم الا ماتغلط ... ونا اسوء البشر و في مرة دعت عليا انا واخواني عشانها وماسوينا لها شيء ... والان من كثرة الخلافات بينها وبين ابويا قالبة عليا الكل ... السبب الاساسي " ممرضة جدتي ام ابويا سافرت وهيا ست كبيرة تجاوزت 80 سنه عندها بدايات زهايمر و ماتقدر تقضي حاجاتها بنفسها لازم احد يساعدها ويوقفها ويغسلها ويروشها ... ابويا عشان سفر الممرضة وجلست 4 شهور عندنا وعمرها 50 سنة وصارت خلافات بينها وبين ابويا وماتفقو و سفرها ... امي ارسلتلي مسج بالواتس تقولي بلغي ابوكي يقوم امو وينضفها و يروشها ويفطرها بنفسو ولا يجي يصحيني لانو كتوفي توجعني وكمان مو قال عليا بطالة و غلط عليا فخليه يشيل امو بنفسه ... طبعاً انا سكت ماقلتلو كلامها عشان مابدي مشاكل ... وصحاني من النوم عشان اقوم جدتي واروشها واوضيها و البسها وهو ساعدني ... وبعد ماخلصت قالي الله يرضى عليكي يا بنتي اختي الكبيرة مارضيت تساعدو عشان ترضي ماما وتبين لها انها صح وواقفة معاها ونا الغلط ... دعا لي ابويا و جدتي ولمن عرفت امي اني روشت جدتي قلبت عليا وكل شويا تقولي روحي خدي الرضا من ابوكي ... وكل شويا تقولي انتي تبع ابوكي بمعنى واقفة معاه ضدي ومفهمه اخواني الشيء دا ... و امس صارت مشكلة وامي تقولو لا تتشطر على اختي الكبيرة روح للي معاك مو هيا تبعك ليش تسكت لها ... انا مو واقفة لا معاه ولا معاها لانو الاثنين بنظري غلطانين هيا تبا تقهرو وهو بدو يذلها ... تاني شيء جدتي ايش دخلها ايش ذنبها بمواضيعكم !!!! ثالث شيء رضا الله من رضا الوالدين ماقال رضا واحد فيهم !!! رابعاً ليش يحطونا في مواقف زي دي !!!! يعني يا اوقف مع امي ضد ابويا واخد رضاها ي العكس وكل واحد يدعي في عيالو وكل شويا تهديد اغضب عليك واغضب عليها !!! يعني التربية و الرضا صح بطريقة دي !!!! انا حيادية وماحب ادخل بينهم عشان مانحط بمواقف زي دي بس ماتبا تفهم امي الشيء دا واختي تعبي براسها اني اتجسس لحساب ابويا واقولو كل شيء عشان تكسبها والله ماني غبية لدرجة دي ونا عارفة انو الشيء دا غلط وبيهدم البيت ... والله حتى الشغالة تقولي صح الا سويته جدتك مالها ذنب وخليكي بعيدة عن مشاكلهم ... ابويا مهما كان بطال طيب او شرير يفضل ابويا ومن واجبي اطيعو ومهما غلط احاول اعدل او انصحو وادعي لو ربي يهديه .. تعب والله كل يوم نفس المشاكل و الصياح و المضاربات ومافي اي نتيجة !!!! معد احس بأمان نفسي كل شويا توتر وخوف وقلق ومحد بدو يدخل ولا احد بدو وجع الراس لنفسو كل واحد ملهي بحياتو ... امي مهما اوقف معاها اساعدها اكلمها انصحها ولاشيء ماتفتكر لي اي شيء طيب على طول في القائمة السوداء ، حتى الزواج كرهتو وصرت اخاف اتزوج و اخلف عيال واعاملهم بنفس طريقتهم و اوجعهم و اجرحهم واسبب لهم مشاكل نفسيه وعقد ... وامي وابويا دايماً يقولو كلام سلبي عن الزواج وانو زوجي بيكون مثل ابويا ونا بكون مثل امي .. ابويا يقولي اصحك تخلي زوجك خروف وتدلدلي رجلك عليه ... خليكي في بيتك لا تكملي ماستر و لا تتوظفي محد فاضي يوصلك ... كلمة زوجك هيا الا تمشي ، وماما تقولي لا تسمعي كلامو واصحك تفكري انو في رجال يحب مرتو و لاتكوني طيبة على نياتك لانو رح تاخدي على راسك ولاتحسبي الزواج شيء حلو وفرحة كلو مشاكل ونكد وغيروو كثير ... طاقات سلبية بكل مكان ... والله حتى على كثر مو تخصصي رياض اطفال وعن الاسرة و التربية والدراسات النفسية الا اني كرهت تخصصي احاول قد ماقدر اطبق من الا درستو فيهم لكن مع الاسف مافي اي تجاوب من ولا احد ، اخواني الاولاد الكبار اقول اوقات يحظهم يقومو يروحو دواماتهم ويرجعو بالليل ينامو او يروحو النادي او مع اصحابهم ويرجعو ينامو ولا يحبو يدخلو ولا يتكلمو خلاص طفشوو كل واحد يلا نفسو اختي الكبيرة ٢٤ ساعة مع امي ي تعبي براسها ي تخطط لمشاكل ... اخر شيء قالت لامي اتركي البيت وخلينا نروح عند جدتي ام ماما ونقعد بييتها واطلقي خلاص طفشنا وبيت جدتي صغير وجدتي ماتبا امي تجي عندها تقولها خليكي في بيتك واتحملي ليش تخربي بيتك وخليه يحب ويتمعشق ويتزوج المهم اقعدي ببيتك لا تتطلعي .... الخلاصة ابا حل والله مرة نفسيتي تعبت غلطت لمن ساعدت جدتي !!!! غلطت لمن كسبت رضا ابويا ودعالي بكل خير !!!! ابا نصيحة وحلول صح لانو مرة تعبت من كتر الهم و التعب صرت ادور حسابات بتويتر عن تطوير الذات و اقراء واتعلم وعن الدين ومن كثر الخوف والقلق صرت اداوم على سورة البقرة و سورة يس كل يوم اقراهم و اوقات كل نهاية اسبوع صرت اروح اسوي عمره بس زعلت من امي ونا رايحة الحرم وجالسة اسبح ربي واستغفر والمسبحة بيدي تقولي انتبهي لنيتك اهم شيء نيتك قلتلها ربي عالم بنيتي ..تحسسني رايحة اسوي شيء غلط بالحرم مرة ضايقتني بعبادتي يشككو وبحياتي كمان محد معاية ولا احد قلبو عليا امي همها اختي و ابويا جوالو ماينزل من يدو عمري ماحسيت ايش يعني اسرة وحدة قلوبنا على بعض نخاف على بعض نحب بعض نحمي بعض نتعلم من بعض واسرارانا عند بعض ماتتطلع لبرا عمري ماحسيت بالشيء دا ولا ام تطبطب ولا اب يحن ههههه ابويا يحن على الشغالات اكتر مننا اوقات.....متحسره " صلاح الوالدين من صلاح الابناء " دي المقوله الا اقولها دايماً ياليت ينتبهو لنا ومايفرقو بيننا ياليت يشجعونا نكمل ونمشي بحياتنا صح ونتوجه صح منهم لكن مع الاسف مافي شيء بيتعدل كل واحد صار يهمو نفسو ومنتظرين متى كل وحدة من البنات تتزوج وتروح عند زوجها ويرتاحو مننا زي كأننا هم وثقل على كثر الخطاب الا جو ماعمري شفت ضحكة او فرحة احد فيهم دايماً مشاكل ومشاحنات الله مستعان صرت والله انتظر متى ربي يكتب نصيبي واتزوج واخرج من القوقعة دي لاني تعبت مابدهم يصلحو من نفسهم ولا يعدلو شيء ... ايش الحل !!!