قصة ابي وامي ان تصلح متأخرا أفضل من ألا تصلح اطلاقا

قصة ابي وامي ان تصلح متأخرا أفضل من ألا تصلح اطلاقا السلام عليكم قراء منصتي المفضلة خلوني احكيلكم قصة بابا وماما لاني فخورة بيهم جدا وباللي وصلوله انا عندي 26 سنة وعندي اخين واخت أصغر مني لكن قريبين مني في السن، حياتنا مستقرة ماديا وكلنا اتخرجنا من جامعات وكليات عالية لكن السبب في كل ده ماما لوحدها كانت بتشتغل 18 ساعة في اليوم لمدة 25 سنة من اول ماتتجوزت لان بابا دخله كان قليل ولما ربنا رزقه ماتغيرش كتير كان بيفضل اهله ثم نفسه واحنا في المرتبة التالتة ابويا طيب جدا لكنه قليل الحيلة زي مادايما جدتي بتقولي ، واخواته دايما بيستغلوه ومهما ماما نبته ماسمعش، طبعا لان كل حاجة في البيت ماشية كويس بسبب ماما ، مصاريف المدارس والجامعات والاكل والشرب وحتى مصاريفنا الشخصية بعد ما كبرنا لغاية ماشتغلنا، ده خلانا نشيل من بابا ساعات كتير جدا خصوصا وحالة ماما الصحية وشكلها بيتغير سنة ورا سنة سبحان الله اللي خلاها تستحمل كل ده عشاننا وماتطلبش تنفصل عشان شكلنا الاجتماعي قدام الناس، وطبعا على مدار السنين دي كلها خناقات ومشاكل بتخلص بتدخل القرايب او بانه يسيب البيت شهرين وبعدين يرجع، اخر 3 سنين الوضع بقى لا يحتمل لينا كلنا خصوصا بعد مانا اتتخطبت واخويا كمان خطب،مصاريف زيادة وبرده على ماما لوحدها، اعتقد في الفترة دي ماما ابتدت تكره بابا فعلا وبصراحة انا كمان بقيت مش عايزة أتكلم معاه، بابا بعد سنة عن البيت يمكن كانت هروب من المسئووليات واحنا ماتأثرناش كتير لاننا متعودين على غيابه بالشهور وكده كده مالوش دور في البيت، من سنة ونص تقريبا ماما قالت انها هاتنفصل يعني هاتنفصل وكان اول مرة تبقى جادة زي المرة دي، وانا عرفت انه فعلا مش تهديد، هو وجوده زي عدمه ففضلت انه مايتحسبش عليها زوج وخلاص، وخدت انا مبادرة اني اضغط على بابا عشان ينفصلوا لان كنت شايفة ان ماما من حقها نلبي ليها اي طلب يحسسها ب 1% حتى من الراحة، بابا بقى يماطل اسابيع لغاية ما حصل التحول، حس بالضياع زي ما قالي بالظبط، عنده 60 سنة هايعيش لوحده من غير زوجة ومن غير اولاد ، اول مرة اشوفه بيعيط وبيعترف انه غلطان كل السنين اللي فاتت، وان اللي بينهم عشرة طويلة ماينفعش تنتهي ، وان كلنا هانتجوز ومالهومش غير بعض، طبعاً ده كان بالنسبالي انانية لانه هو بس اللي محتاجها ، غير ان محدش هايرجع ويصلح 27 سنة جواز ، اتأثرت وعيطت انا كمان لكن كنت شايفة ان ماما مستحيل توافق لان اللي فات مش شوية، لكن بابا اصر اصرار واحد مراهق بيجري ورا بنت الجيران اللي رافضاه، باباه متفاءل وحالم عموماً ومكبر للدنيا جدا ، فكان مصر انه هايعرف يصلح كل حاجة، انا كمان لما فكرت صعبوا عليا هما الاتنين، كلنا هانتجوز فعلا وكل واحد فيهم هايبقى لوحده، وفعلا بدات خطة مع بابا، اتنازل عن نصيبه في الورث مقابل جزء يتحصل عليه من اخواته فوري ، واداه لماما عشان تكفي كل التزامات البيت والديون وقالها انه مش عايز حاجة غير انه يرجع يلمهم بيت زي زمان، بقى يبعتلها ورد وهو ماعملش كده في ايام الخطوبة حتى ههههههه ماما طيبة جداً ولانت وبابا كان مراهن على طيبتها واصلها انا اتجوزت انا واخويا وفاضل اخت واخويا التاني لكن انا دلوقتي متطمنة عليهمواول مرة احس باستقرار اسري وسعادة من سنين كتير، بابا كل مايشوفني وتيجي اي مناسبة يقولي لو قدامك يوم واحد في الحياة وفي ايدك حاجة ممكن تغيريها اعمليها، الوقت مش متأخر