كيف يمكن لشخص لم يراك ولم يسمع صوتك أن يحلل شخصيتك شكرا حلوها

مرحبا .. انا عرضت مشكلتي مرة عندكم هون بالموقع وحابة اشكر جميع من علق والخبيرة د.سناء الرائعه وصدقا ترجمتك لمشكلتي كانت صحيحة ١٠٠٪ .. سبحان الله كيف ممكن لشخص ما بيعرفك ولا شافك ولا سمع صوتك بس مجرد رسالة عرضت فيها مشكلة وقمتي بتفسير شخصيتي (( طبعا كان تحليلك امرين الاول انعدام الثقة بالنفس مع خوف دفين وطيف من الرهاب .. والثاني هو عدم معرفة قيمتي ودوري بهذه الحياة )) ونصحتيني بقوة لماذا افعل كذا the power of why وحكتيلي اليوم يلي بتقدري فيه دورك وقيمتك بين يلي حولك ولنفسك بيكون يوم وذكرى تستحق الاحتفال ك يوم ميلاد الك .... بحب اقلك انك صدقتي كل الصدق بكلامك وبالفعل انا بدات اتعالج من فترتها بموضوع الرهاب والخوف وانعدام الثقة بالنفس وبحثت ووجدت فيديوهات واكثر شيء طبقته هو حديث النفس الايجابي (( انا طبعا دائما ما احدث نفسي بطريقة سلبية جدا )) بالبداية ما كنت مقتنعه بس مع التمرين والوقت بلشت اشعر بتحسن كبير .. وحطيت مخاوفي كلها قدامي وبلشت احل فيها وللامانة وبفضل الله سورة الناس قرائتها قبل النوم ١٠٠ مرة تمسح من قلبك وعقلك كل المخاوف والدعاء بالعلاج والاستغفار وقراءة سورة يس على ماء وشربها يوميا من افضل العلاجات للوسوسة والخوف والرهاب ... ومن ثم قررت انه بكل ساعه بتمر علي اسأل نفسي انا شو بدي اعمل الان؟ وليش ؟ ولما تحطي الاسباب انها ارضاءا لله .. ولنفسك ايضا انه انا لما اقوم ارتب البيت واجلي وانظف وارتب اغراضي انا رح تتغير نفسيتي رح افرغ طاقاتي رح انبسط كتير لما بشوف البيت صار حلو ومرتب وانيق ... كمان افكر ليش اعمل وصفات عناية بالبشرة من تبخير وتنظيف وتقشير وترطيب وخلطات عناية بالشعر كمان مش مشان الناس مشاني انا مشان اشوف نفسي بافضل حال ممكن انه اصلله مشان احب نفسي اكتر ولما جربت مرة و اجبرت نفسي بالالتزام لمرة وحدة بس وشفت النتائج بنفسيتي وبشكلي بالفعل قررت اتخذها عادة عندي ... وانا بالاساس كانت مشكلتي مسؤولياتي يعني بكره المسؤولية جدا رغم انه كنت بالسابق ايضا ملتزمة من ناحية دراسة اعمال لكن كنت اقوم فيها بكره كبير ... بس نزلت هاد الكلام مشان اتشكركم جدا ومشان احكي واوصل فكرة لاي شخص بدو يتغير او عنده مشكلة لا تتردد ابدا بمشاركتها ولما تسمع الحل اسمعه كتير منيح اقرأه عشر مرات باليوم وطبق طبق طبق وابحث عن علاجات وعن طرق ولو كان بالبداية لا مقتنع ولا داخل مخك هالحكي ولا حاسس انه جد هيك علاج مشكلتي لانه جد لما تباشر بالحل ولو تمثيل بتمثل ع نفسك وتشوف نتائج افضل كل مرة رح تتمسك كثير بالعلاج ورح تتطور وتطور طريقة تفكيرك ومشاعرك وتعاملك مع نفسك وتقديرك لذاتك .. الحمد لله انه لاول مرة بنبسط من نفسي وبحب نفسي وبرى انه عندي صفات ايجابية ولما صرت اسمع المدح من الاشخاص اصبحت ردة فعلي احسن وافضل واشعر بانه بفضل الله ربنا ميزني بطريقة فريدة ولازم اشكره عليها واثبت نفسي .. والله رؤيتك لنفسك ونظرتك لنفسك وطريقة حديثك مع نفسك اهم اهم اهم من اي شيء اخر ... لانه انا عشت بمجتمع الكل ينظرلي باني القدوة والمثل الاعلى لكل من حولي وانه ما صار زيي ولكن كنت تعيسة مريضة نفسيا بيني وبين حالي واستغرب من كلامهم ومن مدحهم وهاد الشعور كان يقتلني كثير .. ولكن بعد فترة من العلاج المكثف ولما فكرت انه هيك مشكلة بدها مني اني اتخلى واضحي عن كتير شغلات مهمه واتفضالها تماما واعطيها وقت طويل حتى اتحسن فيها وقتها ارتحت وارتحت كثير .. والاجمل من ذلك انه تطوري لنفسي زاد كثير وثقتي زادت و انه اشخاص من المقربين لي والمطلعين على حياتي بيحكولي انتي انسانه ثانية تماما ك روح ك تطور ك ككل .... لكن لسه حتى تكسب الثقة بنفسك بدك تضلك ورا حالك وما تسهى عن هيك شيء ابدا بدك تضلك ع طول حاطط عيونك بس ع كيف تعيش حياة كريمة اكثر تعيش برضا عن نفسك وما توقف ابدا ولا تحكي خلص انا اكتفيت .. وبالنهاية حابب ارجع اتشكر دكتورة سناء واطلب منها انها تعطيني نصائح اكثر وعلاجات اكثر وان شاء الله بلتزم فيهم