زوجي سبب نجاحي

انا الحمد لله مش عندي مشكله بس عندي تجربه حلوة أوي وصعبة أنا لما سافرت لزوجي معجبهوش وضعى لإنى مكنتش بعتمد علي نفسي في أي حاجة وكنت ضعيفة الشخصيه بدء يخلينى أعتمد علي نفسي في الأول كنت بحس أنه بيضغط عليا بس الأن الحمد لله عرفت أهمية الي عمله معايا وحاسة بفرق وهو حاسس بالفرق ده بس لسا بيقولي لسا مش بقيتى 100% يادوب بين 50، و 70% اول ما سفرت بدء بطلبات البيت انا كنت بخاف انزل اجيب طلبات البيت لانى مش عارفه البلد هو قالي انا مش فاضي وعندي شغل كتير وبدءت انزل واجيب طلبات البيت وأفاصل كمان ملحوظه انا كنت بنزل اجيب الطلبات مع بنتى الصغيره يعنى بشيلها واشيل الطلبات ودرجة الحرارة كانت 40 فيما فوق . وبعد كدة حاسيت انى عاوزة اشتغل هو وافق بس قالي عاوزة تشتغلي دوري انتى علي شغل انا ماليش دعوه مع إنه يقدر يساعدنى ويشغلنى في مكان كويس بس هو رفض وفعلا اشتغلت ومساعدنيش في اي حاجه وبعد كده جتلي فرصت عمل تانيه بس بظروف أصعب ميت مره من الوظيفه الأولي يعنى بدوام 10 ساعات ومفيش أجازة الا يوم الجمعه والوظيفه دي كانت تحدي بالنسبه ليا لانى مكنتش بعرف اتكلم انجليزى ومكنتش بعرف أتعامل مع حد والوظيفه دي كان الإنجليزى أهم شئ وكان تعاملي مع رجاله بس الحمد لله قدرت أثبت نفسي الحمد لله وهو دلوقتى الي بيقولي لازم تستريحي شويه وبقا يساعدنى في تربية بنتى وبجد بدءت أحس بإمكانياتى وثقتى في نفسي زادت الحمد لله أهم حاجه انا بطلت اقول الكلمة الي بتنرفزه (مش عارفة أعمل أيه).