تغلبت على العادة السرية بالدعاء والصلاة ونقلت تجربتي لطالبتي

السلام عليكم ورحمة الله بدي اكتب بالعامية مو بالفصحى بعد اذنكم مشان يكون الكلام من القلب للقلب سبق قبل سنة ونزلت سؤال هون على حلوها بشتكي فيه من العادة السرية وبطلب حلول لأخلص منها أدمنت الإباحي وتعبت جداً حسيت حالي ما بقدر أطلع من هاد المستنقع، والكارثة إني (ظاهرياً) وقدام الناس ملتزمة ما تركت طريقة اقدر اطلع فيها من هاد المستنقع ما قدرت! حسيت بيأس صرت بس اشوف حالي بالمراي احس اني بشعة كتير قد م الذنب معذبني وطافي نور وجهي انا بلشت بالعادة السرية من وانا صغيرة وما كنت بعرف ابداً انها حرام، بس عرفت حاولت اتركها وجرني الشيطان لمستنقع الاباحي الي بلش من خلال (فيلم انمي بريء ظاهرياً) لكنه كان مليء بمشاهد رجعتني لنقطة الصفر انا اسفة ع الوضوح المطلق بكلامي بس بدي كل حد وقع بهاد المستنقع يعرف انها مو النهاية، بدي كمان الكل يعرف انو افلام الانمي انفلات اخلاقي وبتجر بالبطيء لوحل الاباحي حقيقة وبدون اي مبالغة بيوم من الايام اجت وحدة من طالباتي تسألني كيف بتقدر تترك العادة السرية ولسوء الصدف (بس جريتها بالكلام) اكتشفت انها برضه مدمنة اباحي عن طريق افلام الانمي وقتها حضنتها وصرت ابكي انا وياها وانا بحكي (يا رب هاد امتحان أكبر مما بتحمل) قلتلها تمهلني وقت لأجاوبها وانقطعت عن البشر فعلياً حسيت الكون توقف في بنت عم بتضيع طلبت مني مساعدة باشي انا مو قادرة اساعد حالي فيه كتير كنت من الشعور بالذنب على وشك اتهور واعترف لكل الناس اني مو الانسانة الي عارفينها بعدين اتذكر انو المجاهرة بالذنب هي ذنب كبير فأتراجع بليلة من الليالي قمت توضيت وصليت ركعتين حاجة وصرت ابكي بقهر وادعي من كل قلبي (اللهم أطفئ شهوتي إلا بما يرضيك، اللهم طهر قلبي وبصري وسمعي من كل ما يغضبك) وضليت ادعي من كل قلبي بعدين قررت أتصالح مع طبيعتي البشرية وانو فش حد بيتعافى من الإدمان بمجرّد قرار! صرت احدد لحالي مرة بالاسبوع بس اسمح لحالي بالحرام وبعدها اقوم اتصدق، اصلي للفجر، استغفر كتير، اعمل اي اشي اغيظ فيه الشيطان عشان ما يرجع يزينلي الحرام بعدين مرة بالشهر ، وانا متواصلة بالدعاء بكل صلاة بكل ساعة اجابة، وكل شي بعمله أدل طالبتي عليه وأحس بفرحة عارمة لما تقلي انها بتتحسن والأهم اني شغلت نفسي بشغل البيت، زيارات، قراءة، هلكت حالي بوظيفتي بكل معنى الكلمة عشان اغفى من غير ما احس وما يكون في مجال اصلاً افكر وبعدها اجا الامتحان الاكبر فترة الحظر! لا شغل ولا مشغلة الحمد لله بس ٢٤ ساعة قاعدة اجاهد بحالي رتبت البيت وغيرت ديكوره وادرس اخواني الاصغر مني اخترع اي اشي اشغل حالي فيه بس يضل وقت الفراغ اكبر من حجمه المسموح كان امتحان صعب صعب بس قدرت اتجاوز بفضل الله وبفضل الدعاء، كنت بس اعمل الحرام اغيظ الشيطان بعمل صالح، صرت بس افكر فيه مجرد تفكير اقوم اعمل اي اشي يغيظ الشيطان والاشي صار سهل بفضل الله لحد الان بحس مرات اني محتاجة احتياج حقيقي للحظة من العادة السرية بس اذكر حالي انو الشيطان مو محتاج مني الا تنازل واحد فقط ليقدر يوقعني بوحل الي اكتر من 6 اشهر نضفانة منه بفضل الله اي ذنب في الحياة بتقرروا تتركوه حيكون في اختبارات حقيقية تقيس صدق توبتكم، اذا تجاوزتوها بتكونوا على الي بعدها أقدر واذا فشلتوا فيها لا تيأسوا استغفروا وادعوا ربنا يقدركم على تركها ويرحم صدق محاولاتكم ويتوب عليكم ويغنيكم بحلاله عن الحرام واهم نقطة (غيظوا الشيطان بيترككم بحالكم) شكراً لقراءتكم وادعولي ولطالبتي بالثبات (هي ما بتعرف اكيد اني كنت متلها) ربنا يحرّم على قلبي وقلبكم كل لذة حرام ويحسن حياتنا ومماتنا