بعد الطلاق يريد العودة معتمدا على طيبتي لأنه لا أحد سيقبل بظروفه

انا امراه تجاوزت الأربعين من عمرى على قدر بسيط من الجمال متعلمه مثقفه متدينه يشهد لى الجميع بالاخلاق من صغري وانا اعانى من معايره اقرب الناس لى عن قله جمالى وكان يقال لى مين ها يرضى يتقدم لك ومرت بيا السنين وكان يتقدم لى عدد قليل من الخطاب بس ما كنش بيحصل نصيب وكان نفسي زاى اى بنت انى ارتبط ويكون لى اسره وكان نفسي ارتبط بانسان طيب وحنين لانى رومانسيه جدا ومن صغرى مفتقده الحنان والكلمه الحلوه حتى مرت بي السنين وتجاوزت الاربعين وابتدايت انسي موضوع الارتباط واعيش حياتى العمليه فقط إلا أنه من سنتين تقريبا تقدم لى زميل فى العمل يصغرنى فى العمر لم تكن بيننا اى تعاملات تقريبا توسط لى بعض الزملاء كى اوافق عليه كنت معترضه جدا على فرق السن ولكن مع الحاحه وان موضوع السن مش فارق معه نهائى وانه مطلق ويرغب في الاستقرار ويبحث عن الاخلاق في المقدمه ومع الالحاح والرغبه ال انا حستها معه وافقت على الرغم من قله امكانياته واقنعت اهلى وتمت الخطوبه وكنت اسعد انسانه فى الدنيا لانى لاول مره احس انى مرغوبه وسمعت الكلام الحلو ال كان نفسي اسمعه ولكن بعد اقل من شهرين وبدون اسباب مقنعه فسخ الخطوبه طبعا انا اتصدمت وادمرت نفسيا جدا وهو السبب ال حاول يقنعنى بيه انه عنده مشاكل تمنع جوازنا وهى مشاكل روحانية خاصه بالسحر والجن ولانى كنت ارتبط بيه جدا صدقته والتمست له العذر لانى انسانه بشهاده الجميع طيبه جدا امتاز بحسن النيه مع الجميع وليس لى اى تجارب عاطفيه سابقه فعلا صدقته وعرضت عليه اننا نتجوز وانا ها استحمل معه اى حاجه رفض وقالى مش ها تقدرى تستحملى فسخنا الخطوبه حوالى سنه ونصف وبما اننا نعمل فى نفس المكان فكنا نتقابل في العمل وما قدرتش انساه وكان فيه تواصل ما بينا ومقابلات لانى كنت مصدقه انه غاصب عنه زاى ما كان بيقولى كان فيه تواصل بنا وكلام وكل فتره تحصل مشكله نتخاصم ونرجع تاني نتصالح لحد تقريبا من تسع اشهر رجع كلمنى تانى نادم ومصمم ان احنا نتجوز ونرجع لبعض طبعا انا فرحت جدا لانى بحبه جدا على الرغم من قله إمكانياته اهلى كانوا رافضين جدا وقفت قدام الكل وصممت انى ارجع له وكنا متفقين من ساعه الخطوبه اننا ها نتجوز فى شقه والدتى لانها مسنه لحد هو ما يخلص توضيب الشقه الخاصة به وفعلا بعد الحاح منى وافق اهلى بالعافيه على زواجنا وتم الزواج بعد اسبوعين كنت اسعد انسانه فى الدنيا لانى ها احقق حلمي في الاستقرار وانى يكون لى اسره وكان امنيه حياتي اسمع كلام حلو والاقى انسان يخدنى فى حضنه واحس انى مرغوبة تمت الجوازه فعلا وانا تقريبا تحملت كل المصاريف هو ال عمله جاب اوضه النوم وللعلم انها اصلا كانت عنده من فتره تحملت كل المصاريف وقدرت ظروفه وإمكانياته لا ظروفه المادية ضعيفة جدا تزوجنا فى شقه والدتى ومن بدايه الزواج اتعرضت الإهانات والتجريح وكنت بعدى ويرجع يصالحنى ويعتذر وكنت بسامح بسرعه لان ده طبعى ولانى بحبه وعايزه استقر علاقته بامى واخواتى كانت رسميه جدا لانهم ما كانوش راضين عن الجوازه اصلا امى ما كنتش بترتاح له وكانت معاملتها معه محدوده جدا وابتدات تحصل بينهم مشاكل وانا ال كنت بضيع فى النصف مش عارفه اتصرف ازاي بين زوجى وامى عرضت عليه المساعده في تجهيز الشقه فى اسرع وقت ممكن علشان اعيش فيها وابعد عن المشاكل لانى كنت بحلم بالاستقرار قلت له نوضب الشقه ونمشى وها ارضى باقل الامكانيات وها اساعد فى التوضيب علشان نبعد عن المشاكل لاحظت انه بياجل فى موضوع التوضيب مع انى كنت انا ال ها اوضب الشقه عمال بياجل فى موضوع التوضيب ويقعد يقولى والدتك كبيره لازم نستحملها ولازم نكسب ثوابها لحدمن شهرين بالظبط لاقيته يوم صحى من النوم حصلت مشكله بسيطه جدا لاقيته بيقولى احنا لازم نطلق انا نفسي ابقا اب مع العلم انه عنده مشاكل تاجل وتمنع الانجاب ومحتاج عمليه وان مراته السابقة لم تنجب منه وتزوجت من اخر بعد الطلاق وانجبت سمعت منه فى اليوم ده كلام جارح وانه نفسه يبقا اب وانا سنى كبير وممكن ما اخلفش معايره وتجريح وانى جربت الجواز بفلوسي طبعا انا اتصدمت كنت مش مستوعبه حاجه خالص حواليا ومش مركزه في اى حاجه جاب ورقه وكتب انى استلمت القيمه ومضانى عليها وانا مش مركزه ومش مستوعبه حاجه وخدنى من غير ما حد يعرف وأدنى لحد الماذون وقال للماذون انها متنازله عن كل حقوقها حاطنى قدام الامر الواقع وانا ما عرفتش انطق من الصدمه وخد منى كمان حق الماذون وطلقنى بعد كل ال انا عملته معه وانى قدرت ظروفه وإمكانياته المتواضعة طلقنى وخلانى اتنازل عن كل حاجه من فتره وهو بيحاول الاتصال بى طبعا انا ما بردش عليه من اسبوع بعت رساله على الواتس بيقولى ان هو ال اتظلم لانى خدت اوضه النوم ال هو جابها لانها فى شقه والدتى وهو مضنى انى استلمت القيمه ومن يومين بعت رساله تانى تهنئه بمناسبه رمضان وبرضه عايش في دور الضحية المظلوم وطلب اكتر من مره انه يقابلنى وانا برفض نهائي ويقعد يقولى ما احنا كنا بنتقابل لما سبنا بعض بعد الخطوبه طبعا انا برفض نهائي يروح عملى بلوك على الواتس كل الناس ال تعرفه وحتى اهلى متوقعين انه ها يحاول يرجع تانى لان مفيش اى واحده ها ترضى بظروفه وإمكانياته المتواضعة جدا وانه ها يعتمد على طيبتى ولانه عارف ومتاكد من حبى الشديد لى وانى بسامح بسرعه بس اهانته ليا وتجريحه ليا كان كتير اوى ومش قادره انسي كلامه وتجريحه وانه استغل طيبتى وضعفى وصدمتى وحطنى قدام الامر الواقع ومضنى عن تنازل عن حقوقى واستحل حقوقى بعد كل ال انا عملته معه ووقوفى جانبه انا اسفه على الاطاله بس فعلا انا مصدومه وتعبانه نفسيا جدا ها انا فعلا استحق ال عمله فيا وهل ينفع شخصية زاى ده اديله فرصة تانيه وارجع له وهل ها اقدر اساعده تانى واقف جانبه تانى هل ها اقدر احس معه بالامان تانى شكرا