منذ أول أسبوع زواج اكتشفت أن زوجي نكدي

انا سيدة عمري 28 عام متزوجة منذ عام وعندي بنت. ساكنة مع أهل زوجي في نفس العمارة لكن ليا شقة مستقلة بناها زوجي. مشكلتي هي زوجي من اول اسبوع زواج ادركت انه من النوع النكدي من أقل واتفه الأمور يتضايق وياخد جنب باليوم واليومين كل اسبوع ميعديش غير يتلكك على اقل حاجة وتقلب بنكد وكمان معاملة اهله وخاصة والدته كانت وحشة جدا رغم محاولاتي الكتير للتقرب منها بالهدايا وغيره بس يفضل تلقيح الكلام وتشويه صورتي عند الجيران مستمر وتحملت الحاجتين دول عادي لان مفيش حد كامل وعشت لحد م ساءت حالتي النفسية بعد وفاة والدي واكتشافنا في نفس توقيت الوفاة لمرض امي ولقيت عدم تقدير من زوجي او أهله لظرفي وعدم مراعتهم لمشاعري نهائيا حتى وقت العزاء نفسه خاصة اني بنت وحيدة وامي واخواتي الولاد في حاجتي وبدأ يتهمني دايما بالتقصير معاه وفي البيت رغم اني كنت حامل في اخر شهرين وبقا يضغط عليا بشكل مستمر وجت ولادتي وانا بتعامل بنفس المعاملة وبردو مفيش تقدير بدون تفاصيل لحد م اشتكيت لامي في يوم وجت هي واخويا واللي حصل انهم اتهانوا واخو زوجي الكبير ضرب اخويا واتفاجأت يومها بحقيقة الناس اللي انا عايشة معاهم بعدها زوجي وعدني برد حقهم وطبعا رجع في كلامه وجاب الغلط علي أهلي معرفش ازاي الحيت عليه كتير نمشي من البيت ونأجر بره مع استعدادي لدفع الايجار لكنه رفض فضلت قاعدة في البيت وانا نفسيا مدمرة لحد م زوجي بدأ يضايقني كل م اجي اروح لأهلي واخر حاجة واسفة على الاطالة انه مد ايده وضربني ادام اهله وامه شتمتني بافظع الشتايم وانا رديت عليها ساعتها بالمثل لاني عارفة ان زوجي مش هيعمل حاجة جم اهلي وخدوني بالعافية وانا حاليا عندهم بفكر هل استمر او لا.. زوجي زي اي شاب هو بيصلي وكان بيصرف بشكل كويس على البيت لكنه سلبي جدا ومش بيراعي اي ظروف مريت بيها وانا لله الحمد بشتغل في مكان مركزه الاجتماعي كويس جدا واقدر اعول نفسي .انصحوني اعمل ايه