صبرت 11 سنة على أمل أن يتغير لكنه يزيد في عناده

السلام عليكمانا متزوجه من ١١ سنه ولدي ٤ اطفال حياتي معه كلها مشاكل وعدم احترام وعدم تقدير وهو إنسان على قد حاله وانا مقدره هالشي واشتغل وقاعده اصرف على نفسي وعلى عيالي من لَبْس وطلعات والسلفيات اللي خذتها كله عشانه مره لأسهم وبعدها أخذت مرتين للبيت عشان البنيان والتشطيب وعشان بس نطلع ونسكن في بيتنا وقلت معليه هذا بيتي لكن لا يحترمني جدام عيالي ولا جدام الخدم ولا حتي جدام امه صار يتمادى وكانت في بداية حياتي معاه كان يمد يده علي وكانت على أتفه الأسباب وتحملت عشان مارد بيت ابوي مطلقه وبعدها جبت العيال وحاليا سكنا البيت لكن من سكنت البيت واحنا زادت المشاكل من بينا وهو قام يتمادى وكله يهددني بالطلاق وامس كانت مشكله كبيره قام يصارخ ويدزني وقعدني عالارض بالغصب وكان متنرفز حده لانه طول فترة شهر تقريبا كنت شبه ساكته عنه او مابي احتك فيه كلش لانه تعبت من المشاكل اللي يسويها على هالسنين اللي استحملتها معاه مافي اي فايده ولا حتى ذرة احساس اتم اصيح جدامه ولا يهمه والشي اللي ذابحني صار يسب اهلي وأهلي يحبونه ومايدرون عن المشاكل اللي تصير مابي امي وأبوي يتعبون وعيالي صارو يتأثرون من اللي يسويه ومن افعاله الغبيه اللي مايحسب لها حساب والبيت صار قديم لانه مايهتم فيه ومن اخر اهتماماته انا وعيالي تعبت ودي انفصل عنه بس مابي امي وأبوي يتعبون وعيالي يتعبون ويتأثرون لانه بنتي قامت تصيح امس يوم جافت ابوها يعاملني بهالطريقه وشلون قاسي علي وقامت تقولي ليش حياتنا جذي وكان امس يهددني بالضرب ومنعني من ابوي وامي وأهلي كلهم ومن الطلعات ومن أعراس وربعي في سبيل انه ما يطلقني وانا رضيت عشان عيالي وماعندي مكان اروح له مادري محتاره وتعبانه ولا عندي اي حل لمشكلتي وشلون حياتي انقلبت لحزن وكابه وضيق وحرمان وإهانات وتجريح وضرب ماعرف شسوي لمن ألجأ انا مش مقطوعه من شجره لكني ضعيفه من هالناحيه وايد يهددني بالطلاق لكن عيالي كاسريني وامس سالت بنتي على انها صغيره قلت بنروح بيت يدج قامت تصيح اكثر وقالت لا ماما لا هاي بيتنا معناته ماتبيني انفصل واتطلق عشانها سكت واستحملت إهانات ابوها بس انا خايفه انه المره اليايه يتجرا ويمد يده علي ويتمادى اكثر مع اني اتحاشاه صرت أكرهه كره العمى أكرهه كره لدرجه أتمنى انه يموت مادري شبسوي ابي حل جدا تعبانه ومرهقه جدا متالمه ولا اقدر اشتكي لأحد لغير الله مابي أزيد الناس هم فوق همها تعبت تعبت ١١ سنه وانا ساكته ومتحمله عشان العيال على امل لنه بيتغير لكن كافي فايده ابدا ظلم وكره وحزن حياتي معاه لكن حسبي الله ونعم الوكيل لا حول ولا قوة الا بالله العلي العظيم