ماذا يحدث عندما تكشف أسرارك

السلام عليكم ورحمه الله وبركاته انا اشكر كل القائمين علي الموقع الممتاز وانا من متابعيه ومن المستفيدين منه واطمع انكم انكم تقفو معايا في المحنه اللي انا فيها انتو ممكن تشوفو الموضوع بسيط بس انا شايفاه صعب ماذا يحدث عندما تكشف أسرارك فأنا ياجماعه انا تربيت في بيت ملتزم ومحترم وفيه مبادئ وانا احب اهلي واحب نظامهم ومش متمرده علي هذا النظام بل بالعكس وانما نشات في بيئه كل حاجه تتقال في البيت يبقي سر من وانا طفله كل ماحد يتكلم قدامنا ماما تقول محدش يطلع سر البيت وكنا بنسمع الكلام واحنا وصغيرين جيت بقي بعد ماتجوزت حصل عندي مشاكل كتيره جدا ابتديت بقي كل مااشوف حد احكيلو عن حياتي اي حد واحكيلو اي موضوع بالتفصيل الممل

حاسه اني كنت عندي كبت علشان اهلي كان عندهم كل حاجه سر واستمريت في اني احكي لكل صحباتي واهلي عن حياتي لحد النهارده بس انا من النهارده عايزه اتغير عايزه افتح صفحه جديده مع نفسي عايزه ارجع اكتم اسراري من تاني لاني حصل معايا موقف هو اللي خلاني اقف مع نفسي الموقف هو ان كان فيه واحده جارتنا وصاحبتي خالص كنت بعتبرها اكتر من اختي وربنا علي مااقول شهيد كنت بعاملها بما يرضي الله وبنيه صافيه معاها فجاه البنت دي خاصمتني من غير سبب والله من غير سبب وانا عندي عزه نفس مابيهمنيش حد لو باعني ببيعو

علي الرغم من دا كلو قلتها العشره مابتهون غير علي ولاد الحرام واحنا اكتر من الاخوات بلاش نخسر بعض قالتلي العيب من عندي وانتي ماشفتش حد كويس زيك سكت منها واحترمت قرارها بس مش دا اللي تاعبني اللي تاعبني اني انا كنت حكيت ليها سر عن حماتي ممكن اتطلق فيه بس انا برضو مش خايفه اني اتطلق انا السر دا ماما قالتهولي لان مافيش حد يعرفو غير ماما انا اللي خايفه منو ان لو البنت دي قالت السر دا حيحصل مشاكل كتير وامي حتزعل مني ومحدش هيحترمني بعد كده ومش حقدر حتي ابص في اهلي

انا اتمني انكم تساعدوني اني لو حصل والبنت دي قالت علي السر اواجه الموضوع ازاي وازاي افتح صفحه جديده في حياتي وابطل افشي اسراري انا عرفت قيمه كلام ماما لما كانت بتقول كل حاجه لازم تبقي سر ارجوكم ارجوكم انا عارفه اني غلطت بس انا عايزه العلاج لان نفسيتي تعبانه جدا انا مابنامش بالليل بسبب خوفي من ان كل اسراري مع الناس اسفه طولت عليكم وجزاكم الله كل خير