خائفة من فكرة الطلاق وفي نفس الوقت خائفة من الرجوع للذل والإهانة

ارجوكم اقروا للاخر و اقروا التعليقات قبل الرد و ماتكسلوش انا محتاجه جدا رأيكم و بالله عليكم ادعولى كتير كل ما تفتكرونى. انا على خلاف مع زوجى هحاول احكى قد ما اقدر لانها قصه تفاصيلها كتير اتجوزت بعد قصه حب و مشاكل كتير و فسخ خطوبتنا اكتر من مره و اهلى بعد ما كانوا موافقين عليه رفضوه بعد المشاكل فى الخطوبه و حاول كتير يرجع لدرجة ان قال لوالدتى هسيب البلد بتاعتى و هاجى اعيش فى بلدكم بس اتجوزها و خدوا عليا اي ضمانات و ماكانش معاه امكانيه يجيب شقه فى بلدى لان الاسعار عاليه فيها فكان بيقول لامى انه هيعيش في بلدنا و شايف ان والدتى هتقوله خلاص ابنى فى عمارتنا شقه ..والدتى قالتله فى شقه في بيتنا مبنيه خلاص و متوصلها ميا و كهربا خدها ..قالها بس انا مش عايزها باسمى لانها فى بيتكم ..والدتى قالتله خلاص هي بتاعتكم بس مش هكتبها باسم مراتك بردو(اللي هى انا) الفتره دى عشان عارفه انها ممكن تبيعها عشان خاطرك او تحت ضغط منك لكن هي فى الاول و الاخر بتاعتكم ماحدش يقدر يخرجكم منها و كان الاتفاق كالآتى ......... كتب شيك بقيمة مؤخرى لانه عالي شويه نسبيا ...هو قال هكتب شيك بالقايمه ومش هكتب قايمه .... و شيك بباقي تمن الشقه لانه كان دفع فيها جزء و والدتى قالتله انا هشطبهالكم على حسابى .اما بالنسبه لباقي تمن الشقه فادفعه براحتك ماتلتزمش ولا تضغط نفسك بمواعيد ..و حصل الجواز ..... من اول الجواز و اى مشكله تحصل يقولى انتى فاكره انك هتكسرينى بالشيكات و انا مش هعيش في شقتكم ..ايا كانت المشكله يقول كده و مرة فى مرة بقى بيغلط و يتطاول عليا و مايحترمنيش و انا والله ماكنتش بطلع حاجه لاهلى ابدا ..مره فى مره بقى هو اللي يكلم والدتى يزعق عليها فى التليفون و مايقولهاش سبب واضح للمشكله اللي بيننا لا كان يتصل يزعق و يقفل فى وشها(( انا وهو كنا في بلد عربي لشغله )).. بقى فى اغلب المشاكل يقولى هطلقك هطلقك هطلقك و انزلك مصر من بكره و ماكانش بيعمل حاجه ... اخر مشكله بقى هو متطفل جدا فى امور البيت ان اي حاجه يقول تبقى هنا او مكانها هنا فاحنا كنا ناقلين شقه جديده فى البلد العربي و كان في مشكله ان الغساله لو اتحطت فى حمام الضيوف هتقفله تماما و ماحدش يقدر يستخدمه ابدا لا كحمام ولا دش ولا اي حاجه و انا كنت بقترح يحطها فى الحمام اللى جنب الغرف لانه اوسع و بكده هنقدر نستخدم الحمامين كحمام اما الاستحمام هيكون فى حمام الضيوف فقط و احنا كده كده فردين بس فى الشقه يعنى ..قالى لا انا كده مرتاح اكتر ......قولتله براحتك والله انا كان رأيي كذا بس خلاص اللي تشوفه ..راح فجأه لقيته بيقولى طيب غورى فى داهيه ياللا علشان اجيب السباك ..انا اتصدمت صدمه فظيعه لانى كنت بكلمه بأدب ماقدرتش امسك نفسي و قولتله انت اللى تروح فى داهيه ...المشكله فضلت تتطور و يغلط فيا جامد و يقول انا هعرفك قيمتك و هربيكى و يلعن معرفتك و كذا و كلم والدتى قالها بنتك انا مش طايقها و هديها بالجزمه و اطلقها و اشحنهالك فى شنطه !! و قالى هطلقك وانزلك مصر من بكره ..قولتله انت مش راجل الراجل مش بيهين مراته ولا واخد شرع وبنا و الطلاق لعبه و هو كان عنده شغل فى مصر فكان حاجزلى قبله بيومين انزل مصر ..كنا حاجزين من قبل الخناقه اصلا ..المهم و هو بيوصلنى المطار جايب اكل و بيقولى افطرى قولتله بطنى وجعانى ((انا طبيعتى فى السفر بطنى بتوجع خصوصا انى نازله زعلانه كمان)) ..راح اتعصب و شتم و رمى الاكل فى الشارع و قالى انتى كافره بالنعمه و مش محترمه و زيك و احسن منك كتير و يقبلوا باقل من اللى عملتهولك و انا هنزل كمان يومين اطلقك و ماعدتش طايقك ..دخلت المطار مارضيتش ارد على مكالماته تانى .. واول مره اعرف اخويا اللى قالهولى و اخويا عامله بمنتهى الادب اقسم بالله و قاله انت بتهددها كل شويه بالطلاق فاحنا موافقين ع الطلاق و اول حاجه قبل اى كلام هتاخد شيك اللى بتمن الشقه و احنا مابنظلمش حد ...الموضوع تطور كتير مره يقول ان فيا عيوب كتير و مره يقول انتو مسكتو فكلمته طلاق و مره يتكلم فمؤخر و شيكات ..قال كلام كتير جدا و كل شويه يقوله اختك بقالها شهرين ماعرفش عنها حاجه و كل حاجه يقولى امك عملت امك قالت بشكل مهين جدا. ..فالموضوع دلوقتى واقف على الطلاق و هو بيقول يا اعيش فى شقه فى بلدى و نستقل يا نتطلق ..وانا بعد الجواز انا واهلى مكنش في مشكله نعيش في بلده و كنت بدور معاه على شقه انا اعتراضي على انه بيحطلي شروط رغم انه غلطان فيا ..انا خايفه من الطلاق جدا جدا و فى نفس الوقت مش عاوزه اتهان و هو بيقول اعتذار مش هعتذر قدام حد الاعتذار هيبقى لما تيجي بيتك و تعامل بينى و بين اهلك هيبقى فى اضيق حدود و خصوصا امك و ماحدش عمله حاجه والله العظيم .. انا بمصر من شهر فبراير و الى الان لم يغير تفكيره و شايف انى جيت استخبيت عند اهلى و بتحامى فيهم و انى عاصيه ليه و ازاي بروح و اجى من غير ما يكون عارف رغم انى مش بخرج من البيت. و فى كلامه مع اهلى اى ليا يحلف مش داخل بيتن اهلى تانى و كل مره كان يحلف. من شهرين جه قابل والدتى علشان يروحوا للماذون فاتقابلوا الاول فى كافيه عشان او حالب يتكلم فى المؤخر و الحاجات دى. ..قعد يقول انتم طردتونى من البيت و مش داخله تانى مع انه كان جاى ع الماذون اصلا كل كلامه دلوقتى انى قد ايه مش كويسه و مش مرتاح معايا و ان كل ده تراكمات. مع ان اقسم بالله على طول يقولى انى مخليه بالى من البيت و انا زوجه كويسه و انه مبسوط قوى ان ربنا كرمه بيا و بيقول انه كان بيشتغل كتير عشان مايرجعش البيت من كتر ما متضايق مع ان والله ما حصل و كان يساعات بتوصل ان ياخدنى معاه شغله و نخرج كمان بعد الشغل و كان بمزاجه بيقضي كل وقته معايا فى المشاكل بيقلب عليا و على امى و اهلى لانه بردو فى العادى يقول انه رغم كان في خلافات بينه و بين امى لكنه بيحبها جدا و شايفها عظيمه و ربت ولادها صح فى وفاة الاب و ان كان نفسه تكون والدته بدل امه و فجأه يقلب عليها و يقولى دى سبب كل مشاكلى فى الحياه انا مش عارفه اعمل ايه بجد فى تفاصيل كتير ماحكيتهاش بس والله مقهوره